រាជធានីភ្នំពេញ ៖ តារាកំប្លែងជើងចាស់នាយ គ្រាវ បានទទួលមរណភាពហើយ ក្នុងជន្មាយុ៥៩ឆ្នាំ បន្ទាប់ពីលោកបានតស៊ូជន្នះជំងឺប្រចាំកាយប្រមាណជិត១០ឆ្នាំមកនេះ។ តារាកំប្លែងរូបនេះ បានទទួលមរណភាពនៅថ្ងៃទី២០ ខែតុលា ឆ្នាំ២០២១ នេះវេលាម៉ោង១២ថ្ងៃត្រង់ នៅគេហដ្ឋានរបស់លោកក្នុងសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ។
បើតាមកូនប្រុសរបស់នាយ គ្រាវ បានអះអាងប្រាប់កោះសន្តិភាពតាមទូរស័ព្ទថា ឪពុករបស់លោកបានចាប់ផ្តើមធ្វើទុក្ខខ្លាំងនូវជំងឺទឹកនោមផ្អែម និងលើសឈាម ចាប់តាំងពីថ្ងៃទី៨ ខែតុលា ឆ្នាំ២០២១មក។ លោកបញ្ជាក់ថា ដោយសារជំងឺកាន់តែមានសភាពធ្ងន់ធ្ងរ ដែលក្រុមគ្រូពេទ្យមិនអាចសង្គ្រោះបាន ទើបឪពុករបស់លោកបានទទួលមរណភាពនាពេលនេះតែម្តង។
លោកថា ឪពុករបស់លោកបានពើបប្រទះជំងឺប្រចាំកាយខាងលើនេះ ប្រមាណជា៦ឆ្នាំហើយ ខណៈពេលជំងឺនេះបានធ្វើអោយឪពុកលោកមិនអាចដើរបានឡើយ ពោលគឺបានតែជិះរទះរុញតែប៉ុណ្ណោះ។ យ៉ាងណាបើតាមកូននាយ គ្រាវ បានប្រាប់ថា សម្រាប់ការបូជាឪពុកលោកនៅពេលណានោះ គឺនៅមិនច្បាស់នៅឡើយទេ ដោយត្រូវរង់ចាំក្រុមគ្រួសារពិភាក្សាគ្នាជាមុនសិន។
ដោយឡែកបើតាមលោកហេង ឡុង ក៏បាបង្ហោះលើបណ្តាញសង្គមផងដែរថា ខ្ញុំបាទ មានសេចក្តីរន្ធត់ចិត្តយ៉ាងក្រៃលែង និងសោកស្តាយជាទីបំផុត ក្រោយទទួលដំណឹងថា តារាកំប្លែងជើងចាស លោក នូ សារុំ ហៅនាយគ្រៀវ បានទទួលមរណភាពនៅថ្ងៃពុធ ១៤កើត ខែអស្សុជ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២០ ខែតុលា ឆ្នាំ២០២១ វេលាម៉ោង ១២:៣០នាទី ថ្ងៃត្រង់ ក្នុងជន្មាយុ៥៩ឆ្នាំ ដោយរោគាពាធ ។
បច្ចុប្បន្នស.ពលោក នូ សារុំ ហៅនាយគ្រៀវ តម្កល់នៅផ្ទះលេខ២៣៩ ផ្លូវ៣៥៧ សង្កាត់ច្បារអំពៅ ខណ្ឌច្បារអំពៅ នៅគេហដ្ឋាននៃស.ព ឬបងប្អូនសិល្បករសិល្បការិនី និងបងប្អូនដែលគាំទ្រលោកពូ អាចចូលរួមបច្ច័យបុណ្យស.ព តាមលេខទូរស័ព្ទគ្រួសារនៃស.ព 017 855 628/061 750 705 សូមអរគុណ ។
ជាការកត់សម្គាល់ក្នុងជីវភាពខ្វះខាតនាយ គ្រាវ ដែលមានកូន៤នាក់ កន្លងមក បានស្រែងយំបង្ហូរទឹកភ្នែកសុំការសណ្តោសពីសប្បុរសជនានាជួយសម្រាលដល់ទុក្ខលំបាក ត្បិតខ្លួនបានបាត់បង់សមត្ថភាពសម្តែងទាំងស្រុងដោយសារជំងឺ។ ស្ថិតនៅក្នុងគ្រាដ៏លំបាកនេះនាពេលកន្លងមក នាយ គ្រាវ តែងតែទទួលការឧបត្ថម្ភជាប្រចាំខែពីសមាគមសិល្បករខ្មែរ និងស្ថាប័នផ្សេងៗជាបន្តបន្ទាប់។
ត្បិតជាតារាកំប្លែងល្បីឈ្មោះដូចតារាកំប្លែងមួយចំនួនទៀតក៏ដោយ ប៉ុន្តែនាយ គ្រាវ ត្រូវបានចាត់ទុកជាតារាកំប្លែងមួយរូបដែលមានភាពកំប្លែងស្ងួតមួយ ដែលតែងតែបង្ហាញវត្តមានសម្តែងជាតារាកំប្លែងជើងចាស់ដូចជា នាយ សង់ ស៊ីស នាយ វីតាមីនសេ នាយ សាន ម៉ៅ និងតារាកំប្លែងមួយចំនួនទៀត។ យ៉ាងណា ដំណឹងមរណភាពរបស់តារាកំប្លែងនាយ គ្រាវ នាពេលនេះចាត់ទុកជាដំណឹងដ៏សោកសៅ និងសោកស្តាយសម្រាប់ការបាត់បង់តារាកំប្លែងជើងចាស់មួយរូបដែលធ្លាប់ផ្តល់សំណើចដល់ទស្សនិកជន៕
ចែករំលែកព័តមាននេះ