ខេត្តកំពង់ស្ពឺ ៖ ស្ត្រីឈ្មោះកេត រ៉ាវី ត្រូវជាម្តាយបានឱ្យកោះសន្តិភាពដឹង កាលពីល្ងាចថ្ងៃទី១៨ មីនា ២០១៦ ថា កូនស្រីគាត់ឈ្មោះនីតា បានបាត់ពីផ្ទះតាំងពីថ្ងៃទី១០ មីនា មកម្ល៉េះ ដោយមិនដឹងនៅទីណា ។
កូនស្រីគាត់បានចាកចេញពីផ្ទះស្ថិតនៅភូមិត្រពាំងក្អែក ឃុំវាលពង់ ស្រុកឧដុង្គ ខេត្តកំពង់ស្ពឺ ដែលធ្វើឱ្យក្រុមគ្រួសារទាំងអស់ គឺមានការបារម្ភជាខ្លាំង ជាពិសេសរូបគាត់ជាម្តាយ ឥលូវនេះបានធ្លាក់ខ្លួនឈឺហើយ ។ ការបាត់នេះ គឺទំនងជាខឹងជាមួយបងស្រី ដែលបានស្តីបន្ទោសណែនាំ មិនឱ្យដើរលេងនៅពេលយប់ព្រលប់ ជាមួយមិត្តភក្តិពេលបើកប្រាក់ខែរួច ។
មុនពេលបាត់ខ្លួនកូននីតា (នារីបាត់ខ្លួន) គឺបានឱ្យប្អូនស្រីជូនទៅផ្សារត្រាច ដោយប្រាប់ថា ទៅចូលរួមការមិត្តភក្តិ ហើយចាប់តាំងពីថ្ងៃនោះមក ក៏បាត់ដំណឹងសូន្យឈឹងតែម្តង ទោះជាបងប្អូន និងក្រុមគ្រួសារ តាមរកគ្រប់ទីកន្លែងយ៉ាងណា ក៏មិនប្រទះឃើញដែរ ។ ក្នុងនោះបានទៅរកដល់រោងចក្រដែលនាងធ្វើការ ពេលសួរខាងរោងចក្រ ក៏ឆ្លើយថា មិនឃើញមកធ្វើការជាច្រើនថ្ងៃហើយ ។
ស្ត្រីជាម្តាយបន្តថា គាត់ជាម្តាយមិនសូវបាននៅផ្ទះទេ គឺរវល់ទៅច្រៀងនៅតាមពិធីមង្គលការនានា ដើម្បីបានប្រាក់ចិញ្ចឹមគ្រួសារ ។ គាត់ជាឣ្នកចម្រៀង គឺមិនសូវមានពេលនៅជិតកូនបានជាប់លាប់ឡើយ ។ រហូតមកដល់ពេលនេះ នៅមិនទាន់បានដំណឹងពីកូនស្រីហើយលេខទូរស័ព្ទរបស់នាង ក៏តេមិនចូលទៀត រឹតតែធ្វើឱ្យគាត់មានការពិបាកចិត្តជាខ្លាំង រហូតធ្លាក់ខ្លួនឈឺ ។ រូបគាត់មានការបារម្ភពីសុវត្ថិភាពកូនស្រី ខ្លាចក្រែងកូនចាញ់បោកជនខិលខូច នាំឱ្យនាងដើរធ្លាក់ទៅក្នុងផ្លូវឣបាយផ្សេងៗ ។
ចុងក្រោយ ម្តាយក៏បានផ្តាំផ្ញើសុំឱ្យកូនស្រីវិលត្រឡប់មកផ្ទះវិញ គឺមិនដេញដោលអ្វីឡើយ សុំតែកូនស្រីវិលមក រស់នៅជួបជុំគ្រួសារវិញទេ ។
ចែករំលែកព័តមាននេះ