ខេត្តបាត់ដំបង ៖ ប្រភពបានបង្ហើបឱ្យដឹងថា ហាងខារ៉ាអូខេមួយកន្លែង កំពុងបើករកស៊ីយ៉ាងរលូនក្នុងស្ថានីយប្រេងឥន្ធនៈដ៏ធំមួយនៅចំណុចច្រមុះជ្រូកជាប់ផ្លូវជាតិលេខ៥ ក្នុងភូមិរំចេក៤ សង្កាត់រតនះ ក្រុងបាត់ដំបង ដែលត្រូវគេសង្ស័យថា គ្មានច្បាប់អនុញ្ញាតនោះទេ។
ខារ៉ាអូខេដែលបង្កប់ក្នុងស្ថានីយប្រេងខាងលើនេះ គឺមានទីតាំងនៅច្រមុះជ្រូក ផ្លូវចូលទៅកាន់ស្នងការដ្ឋាននគរបាលខេត្ត តែមិនបានទាក់ភ្នែកសមត្ថកិច្ចទេ តាំងពីចាប់ដំណើការមក ។ ប៉ុន្តែ ក៏មានមន្ត្រីមួយចំនួនបានរិះគន់ដែរ ដោយសារតែខារ៉ាអូខេនេះ កំពុងពង្វក់យ៉ាងខ្លាំងដល់យុវសិស្ស ។ ខារ៉ាអូខេនោះ កំពុងទាក់ទាញអតិថិជន ភាគច្រើនគឺជាក្រុមយុវសិស្ស ដែលនាំគ្នាមកយ៉ាងពពាក់ពពូន ចូលច្រៀងមិនថាយប់ ឬថ្ងៃទេ។
ប្រភពពីក្រុមយុវសិស្សបានឱ្យដឹងដែរថា ខារ៉ាអូខេនោះ បានដំណើការច្រើនខែហើយ គឺមានតែសិស្សសាលាទេ ដែលចូលច្រៀង ជាពិសេសយុវសិស្ស ដែលមានគូស្នេហ៍ ។ ដោយយុវសិស្សមួយចំនួនមិនចូលសាលាទេ គឺនាំគូស្នេហ៍ចូលច្រៀងខារ៉ាអូខេយ៉ាងសប្បាយ ។
មន្ត្រីម្នាក់បានបញ្ជាក់ថា គាត់បានឃ្លាំមើលប៉ុន្មានថ្ងៃមុននេះ គឺភ្ញៀវភាគច្រើនសុទ្ធតែកូនសិស្សចេញ-ចូលៗ តាំងពីព្រឹក រហូតដល់យប់ ។ គាត់សង្ស័យក្រុមយុវសិស្សប្រុស-ស្រី ដែលពពាក់ពពូនក្នុងបន្ទប់ខារ៉ាអូខេនោះ មិនត្រឹមតែចូលច្រៀងខារ៉ាអូខេទេ ទំនងជាអាចប្រើគ្រឿងញៀនទៀតផង ។
មន្ត្រីដដែលនេះបានអំពាវនាវដល់សមត្ថកិច្ចជំនាញ ឬអាជ្ញាធរមួលដ្ឋាន ជួយចុះពិនិត្យមើលទីតាំងខារ៉ាអូខេដែលបង្កប់ខ្លួនក្នុងស្ថានីយប្រេងខាងលើនេះផង ។
ចែករំលែកព័តមាននេះ