ខេត្តកំពង់ឆ្នាំង ៖ ទីបំផុត លោកយាយព្រះជន្ម៩៣ឆ្នាំ រស់នៅភូមិថ្លុកជ្រៅ ឃុំពេជ្រចង្វា ស្រុកបរិបូណ៌ បានទទួលការចាក់វ៉ាក់សាំងការពារជំងឺកូវីដ-១៩តាមសំណូមពររបស់លោកយាយរួចហើយ នៅព្រឹកថ្ងៃទី១៦ តុលា…
ខេត្តកំពង់ឆ្នាំង ៖ ទីបំផុត លោកយាយព្រះជន្ម៩៣ឆ្នាំ រស់នៅភូមិថ្លុកជ្រៅ ឃុំពេជ្រចង្វា ស្រុកបរិបូណ៌ បានទទួលការចាក់វ៉ាក់សាំងការពារជំងឺកូវីដ-១៩តាមសំណូមពររបស់លោកយាយរួចហើយ នៅព្រឹកថ្ងៃទី១៦ តុលា ឆ្នាំ២០២១ នេះ បន្ទាប់ពីលោកយាយ ប្រាប់ថា ចង់ចាក់វ៉ាក់សាំងការពារជំងឺកូវីដ១៩ដូចគេដែរ តែមិនអាចធ្វើដំណើរទៅចាក់បាន ។ សូមរំលឹកថា៖ លោកជំទាវ ឱ វណ្ណឌីន ៖ គ្រូពេទ្យនឹងចាក់វ៉ាក់សាំងជូនដូនចាស់វ័យជិត១០០ឆ្នាំដល់ផ្ទះនាថ្ងៃស្អែកតាមការស្នើសុំ
សូមរំលឹកថា ក្រោយពីសារព័ត៌មានកោះសន្តិភាពបានចុះផ្សាយពីលោកយាយឈ្មោះ សៅ ហោន អាយុ៩៣ឆ្នាំ មានទីលំនៅភូមិថ្លុកជ្រៅ ឃុំពេជ្រចង្វា ស្រុកបរិបូណ៌ ដែលបានបញ្ជាក់ថា លោកយាយចង់ចាក់ថ្នាំការពារជំងឺកូវីដ១៩ដូចគេដែរ ប៉ុន្តែគ្មានលទ្ធភាព ធ្វើដំណើរផ្លូវឆ្ងាយបានរួចមក ។ នៅព្រឹកថ្ងៃទី១៦ តុលា ឆ្ន២០២១ នេះ មន្ទីរសុខាភិបាលខេត្តកំពង់ឆ្នាំង បានបញ្ជូនក្រុមគ្រូពេទ្យ នៃមណ្ឌលសុខភាព ស្រុកបរិបូណ៌ ទៅចាក់ថ្នាំជូនលោកយាយដល់លំនៅដ្ឋានលោកយាយតែម្តង ។
លោក ឈុន ប៊ុនថា ប្រធានមណ្ឌលសុខភាពស្រុកបរិបូណ៌បានបញ្ជាក់ថា ក្រោយពីទទួលទទួលណែនាំពីប្រធានមន្ទីរសុខាភិបាលខេត្តកំពង់ឆ្នាំងស្ដីពីលោកយាយ សៅ ហោន អាយុ៩៣ឆ្នាំ ដែលចង់ចាក់វ៉ាក់សាំងការពារកូវីត-១៩ ទើបនៅព្រឹកនេះ ក្រុមការងាររបស់មណ្ឌលសុខភាពស្រុកបរិបូណ៌បានយកវ៉ាក់សាំង ទៅចាក់ជូនលោកយាយ ដោយផ្ទាល់ដល់លំនៅដ្ឋានតែម្តង ។
មុនពេលចាក់វ៉ាក់សាំងជូនលោកយាយ ដែលមានព្រះជន្ម៩៣ឆ្នាំ គឺក្រុមគ្រូពេទ្យបានពិនិត្យសុខភាពលោកយាយ ទៅតាមជំនាញ ជាមុនទើបសម្រេចចាក់វ៉ាក់សាំងជូនលោកយាយជាក្រោយ។ លោក ឈុន ប៊ុនថា បានបន្តថា ក្នុងឱកាសនោះដែរ ដោយមើលឃើញលោកយាយមានជីវភាពខ្វះខាត ដែលស្ថានភាពគួរអាណិត ក្រុមគ្រូពេទ្យ រៃថវិកាគ្នាបានចំនួន១០ម៉ឺនរៀលជូនលោកយាយ ព្រមទាំងជូននូវ មី១កេះ ត្រីខ១យួរ ទឹកផ្លែឈើ ទឹកសុទ្ឋ ទឹកស៊ីអ៊ីវ និងទឹកត្រី ជូនលោកយាយផងដែរ ។
ក្នុងឱកាសនោះ លោកយាយ សៅ ហោន ក៏បានថ្លែងអំណរគុណដល់ក្រុមគ្រូពេទ្យ ដែលមិនត្រឹមតែ យកវ៉ាក់សាំង ការពារកូវីត មកចាក់ជូនលោក យាយដល់លំនៅដ្ឋានប៉ុណ្ណោះទេ ថែមទាំងជូនអំណោយជូនលោកយាយថែមទៀត លោកយាយពិតជាត្រេកអរជាអនេកកាប្បការ ៕
ចែករំលែកព័តមាននេះ