រាជធានីភ្នំពេញ ៖ បុរសម្នាក់កំពុងតែខ្វាយខ្វល់ ដោយសារតែបាត់ប្រពន្ធជាទីស្រឡាញ់១ថ្ងៃ១យប់ហើយ មិនដឹងថា នាងទៅណានោះទេ កាលពីវេលាម៉ោង៦ព្រឹកថ្ងៃទី១៥ មីនា គឺបាត់ពីក្នុងផ្ទះជួលនៅភូមិទួលសង្កែ
រាជធានីភ្នំពេញ ៖ បុរសម្នាក់កំពុងតែខ្វាយខ្វល់ ដោយសារតែបាត់ប្រពន្ធជាទីស្រឡាញ់១ថ្ងៃ១យប់ហើយ មិនដឹងថា នាងទៅណានោះទេ កាលពីវេលាម៉ោង៦ព្រឹកថ្ងៃទី១៥ មីនា គឺបាត់ពីក្នុងផ្ទះជួលនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ ។
បើតាមការបញ្ជាក់ពីបុរសដែលជាប្តីបានប្រាប់ថា នៅមុនពេលកើតហេតុរូបខ្លួន និងប្រពន្ធមិនមានទំនាស់ពាក្យសម្ដីអ្វីនឹងគ្នានោះទេ គឺព្រឹកឡើងគាត់ជាប្តីក្រោកទៅធ្វើការតាំងពីម៉ោង៥និង៣០នាទីព្រឹក ។ ចំណែកឯប្រពន្ធរបស់ខ្លួនទៅធ្វើការនៅម៉ោង៦និង៣០នាទីព្រឹក គឺបានចេញទៅធ្វើការនៅរោងចក្រកាត់ដេរឈ្មោះ រ៉ូសីុង ។ ពេលកំពុងធ្វើការ ស្រាប់តែប្អូនបង្កើតរបស់ខ្លួនដែលធ្វើការនៅរោងចក្រជាមួយគ្នានោះ បានទូរស័ព្ទមកប្រាប់ថា មិនបានឃើញបងថ្លៃមកធ្វើការនោះទេ ។
ក្រោយពីបានទទួលដំណឹងនេះហើយ ខ្លួនក៏បានប្រញាប់ប្រញាល់ត្រឡប់មកផ្ទះជួលវិញ និងបានស្វែងរកប្រពន្ធគ្រប់ទីកន្លែង ។
បុរសជាប្តីបន្តទៀតថា រូបគាត់និងប្រពន្ធបានឈានដល់ការរួមរស់ជាមួយគ្នាពេលធ្វើការជាមួយគ្នា ហើយបានស្រឡាញ់គ្នាចិត្តនិងចិត្តអស់រយៈពេល៤ឆ្នាំហើយ ទើបខ្លួនបានទៅប្រាប់ឪពុកម្តាយអោយចូលស្តីដណ្តឹង និងរៀបមង្គលការតាមប្រពៃណី ។
ក្រោយពីពួកគាត់ទាំង២នាក់ បានចាប់ដៃគ្នាជាប្ដីប្រពន្ធមកបានរយៈពេល១២ឆ្នាំហើយ និងមានកូនស្រីម្នាក់អាយុ១១ឆ្នាំហើយដែរ ។
ស្ត្រីជាប្រពន្ធដែលបាត់ខ្លួននោះឈ្មោះ ភី ចន្ទ្រា អាយុ២៨ឆ្នាំ ជាកម្មការិនី និងមានផ្ទៃពោះចំនួន២ខែកន្លះហើយ ។ ចំណែកបុរសជាប្តីឈ្មោះ អ៊ុំ វីរៈ អាយុ៣៦ឆ្នាំ ជាអ្នកបើករថយន្តឱ្យក្រុមហ៊ុនឯកជនមួយ ស្នាក់នៅកន្លែងកើតហេតុខាងលើ និងមានស្រុកកំណើតនៅស្រុកស្ទឹងត្រង់ ខេត្តកំពង់ចាមទាំង២នាក់ប្តីប្រពន្ធ ។
នៅព្រឹកថ្ងៃទី១៦ មីនា ដោយបារម្ភពេកទើបរូបគាត់បានសម្រេចចិត្តមកដាក់ពាក្យបណ្តឹងនៅប៉ុស្តិ៍នគរបាលទួលសង្កែ ដើម្បីឱ្យជួយអន្តរាគមន៍ស្វែងរកប្រពន្ធរបស់គាត់ផង។
តាមបុរសជាប្តីបានឱ្យដឹងថា មុនពេលបាត់ខ្លួន ប្រពន្ធរបស់គាត់គឺនាងដេញតុងទីនបានហើយ ក៏បាត់ខ្លួនរួមជាមួយប្រាក់នោះ ។ ទោះបីជាយ៉ាងណាគេមានការសង្ស័យថា ស្ត្រីជាប្រពន្ធអាចនឹងខឹងប្តីពីរឿងអ្វីមួយ ឬអាច នាងមានថ្មីបានជារត់ចោលប្តី និងកូនបែបនេះ។ នៅចំពោះមុខសមត្ថកិច្ចបុរសជាប្តី មានទឹកមុខស្រងូតស្រងាត់ និងបានសំណូមពរឱ្យប្រពន្ធវិលត្រឡប់ ទោះបីមានរឿងអ្វីបងមិនប្រកាន់ឡើយ បើគ្មានរូបអូនទេ ជីវិតបងនិងកូនអស់ភាពកក់ក្ដៅ ហើយសូមអូនវិលវិញម៉ោ ៕
ចែករំលែកព័តមាននេះ