ខេត្តកណ្តាល ៖ ក្មេងស្រីបានទៅរាវលៀសបណ្តាលឱ្យលង់ស្លាប់ ដែលហេតុការណ៍នេះ បង្កឱ្យភ្ញាក់ផ្អើលកាលពីវេលាម៉ោង០៥ និង៣០នាទីល្ងាចថ្ងៃទី១៣ មីនា ២០១៦ ស្ថិតនៅចំណុចផ្ទៃបឹងកោះអន្ទះបាញ់ ក្នុងភូមិខ្នោការ ឃុំបារុង ស្រុកល្វាឯម ខេត្តកណ្តាល ។
ក្មេងស្រីរងគ្រោះឈ្មោះធឿន ស្រីពីន អាយុ១១ឆ្នាំ ជាសិស្ស មានទីលំនៅភូមិ-ឃុំកើតហេតុខាងលើ ។
នៅវេលាម៉ោង១០ព្រឹកថ្ងៃដដែល ក្មេងស្រីរងគ្រោះបានចេញទៅរាវលៀសជាមួយក្មេងស្រី២នាក់ទៀត មានអាយុប្រហែលគ្នា ដែលនៅផ្ទះជិតៗគ្នា ។ លុះដល់វេលាម៉ោង១១ និង០០នាទីព្រឹក ក្មេងស្រី២នាក់ដែលទៅរាវលៀសជាមួយនោះ បានមកផ្ទះមុន ដោយឡែក ក្មេងស្រីរងគ្រោះ នៅបន្តរាវលៀសតែម្នាក់ឯង ។
ម្តាយមីងក្មេងស្រីរងគ្រោះឈ្មោះស៊ី ពៅ រកក្មួយហូបបាយ មិនឃើញរហូតដល់ម៉ោងជាង៥ល្ងាចថ្ងៃដដែល ទើបមានការភ្ញាក់ផ្អើលឆោឡោឡើង បន្ទាប់ពីមានអ្នកជិតខាងនាំគ្នាយកអួនទៅអូស នៅចំណុចផ្ទៃបឹងកន្លែង ដែលក្មេងស្រីរងគ្រោះទៅរាវលៀស ប្រទះឃើញសពក្មេងស្រីរងគ្រោះលង់ទឹកបឹងជម្រៅប្រហែល២ម៉ែត្រ ស្លាប់បាត់ទៅហើយ ។
ចែករំលែកព័តមាននេះ