ខេត្តកំពង់ស្ពឺ ៖ នាព្រឹកថ្ងៃទី១៤ ខែមីនា នៅមជ្ឈមណ្ឌលជាតិរក្សាសន្តិភាព ACO មានរៀបចំបើកវគ្គហ្វឹកហ្វឺនលំហាត់ឆ្មាំអង្គរឆ្នាំ២០១៦ ក្រោមវត្តមានរបស់លោកឧត្តមសេនីយ៍ឯក ជា សារ៉ន មេបញ្ជាការរង
ខេត្តកំពង់ស្ពឺ ៖ នាព្រឹកថ្ងៃទី១៤ ខែមីនា នៅមជ្ឈមណ្ឌលជាតិរក្សាសន្តិភាព ACO មានរៀបចំបើកវគ្គហ្វឹកហ្វឺនលំហាត់ឆ្មាំអង្គរឆ្នាំ២០១៦ ក្រោមវត្តមានរបស់លោកឧត្តមសេនីយ៍ឯក ជា សារ៉ន មេបញ្ជាការរង និងជានាយសេនាធិការកងទ័ពជើងគោក លោកជំទាវ ជូលី ជុង(JULIE CHUNG) តំណាងស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជា លោកឧត្តមសេនីយ៍ទោ EDWARD F.DOORMAN មេបញ្ជាការទីបញ្ជាការទ្រទ្រង់ទី៨នៃកងទ័ពជើងគោកសហរដ្ឋអាមេរិកប្រចាំតំបន់ប៉ាស៊ីហ្វិក ។
ក្នុងឱកាសនោះ ក៏មានការចូលរួមពីអនុព័ន្ធយោធា អាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទផងដែរ ។
ពិធីបើកវគ្គហ្វឹកហ្វឺនលំហាត់ឆ្មាំអង្គរឆ្នាំ២០១៦ គឺជាលំហាត់ទ្វេភាគី រវាងកងយោធពលខេមរភូមិន្ទជាមួយកងទ័ពជើងគោកសហរដ្ឋអាមេរិកប្រចាំតំបន់ប៉ាស៊ីហ្វិក ដែលចាប់ផ្តើមពីថ្ងៃទី១៤ ខែមីនា ដល់ទី២៦ ខែមីនា ឆ្នាំ២០១៦ ។ កម្មសិក្សាការីដែលចូលរួមក្នុងលំហាត់ឆ្មាំអង្គរនេះ មានចំនួនសរុប៥០៨នាក់ក្នុងនោះកងទ័ពជើងគោកសហរដ្ឋអាមេរិក១០៨នាក់ និងកងយោធពលខេមរភូមិន្ទ៤០០នាក់ ។
លោកឧត្តមសេនីយ៍ទោ EDWARD F.DOORMAN មានប្រសាសន៍ថា សមយុទ្ធឆ្មាំអង្គរ២០១៦ដែលកម្ពុជាធ្វើជាម្ចាស់ផ្ទះ គឺជាសមយុទ្ធដែលឧបត្ថម្ភដោយបញ្ជាការដ្ឋានកងទ័ពជើងគោកសហរដ្ឋអាមេរិកប្រចាំតំបន់អាស៊ីប៉ាស៊ីហ្វិក (USARPAC) និងជាសមយុទ្ធទ្វេភាគីប្រចាំឆ្នាំដែលធ្វើឡើងដោយកងកម្លាំងកងទ័ពសហរដ្ឋអាមេរិក និងកម្លាំងទ័ពកម្ពុជា។សមយុទ្ធនេះ លើកកម្ពស់ភាពត្រៀមជាស្រេចនិងអន្តរប្រតិបត្តិការ ។
លោកមេបញ្ជាការបន្តថា សមយុទ្ធឆ្មាំអង្គរ២០១៦ បន្តការខិតខំដ៏សំខាន់មួយដែលមានរយៈពេល៧ឆ្នាំមកហើយ ដោយUSARPAC និងបញ្ជាការដ្ឋាននៃកងទ័ពសហរដ្ឋអាមេរិកនៅតំបន់អាស៊ីប៉ាស៊ីហ្វឹក (PACOM) សមត្ថភាពក្នុងការធ្វើសកម្មភាពផ្តល់ជំនួយមនុស្សធម៌និងជំនួយសង្គ្រោះបន្ទាន់នៅប្រទេសកម្ពុជា ។ សមយុទ្ធនេះ រួមចំណែកដោយផ្ទាល់ដល់ការសម្រេចគោលបំណងសន្តិសុខរបស់សហរដ្ឋអាមេរិកនិងប្រទេសកម្ពុជា ដោយមានការហ្វឹកហ្វឹនដ៏តឹងតែងសម្រាប់ប្រទេសទាំងពីរ ។ កងកម្លាំងកម្ពុជាដែលចូលរួម មកពីកងយោធពលខេមរភូមិន្ទ មជ្ឈមណ្ឌលជាតិសម្រាប់ថែរក្សាសន្តិភាព មជ្ឈមណ្ឌលកម្ចាត់មីននិងយុទ្ធភណ្ឌសល់ពីសង្គ្រាម និងកងរាជអាវុធហត្ថ ។
លោកជំទាវ ជូលី ជុង តំណាងស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជាបានថ្លែងថា ការហ្វឹកហ្វឺននឹងផ្តោតសំខាន់ទៅលើប្រតិបត្តិការផ្តល់ជំនួយមនុស្សធម៌ និងជំនួយសង្គ្រោះបន្ទាន់ ជាមួយនឹងដំណើរការសិក្សាស៊ីជម្រៅ ការកសាងនិងពង្រីកក្រុមបុគ្គលិកយា់ងម៉ត់ចត់ ហើយនិងធ្វើការហ្វឹកហ្វឺនតាមប្រព័ន្ធទំនាក់ទំនង និងការធ្វើត្រាប់តាមកុំព្យូទ័រជាក់ស្តែង ដែលមានភាពចាំបាច់់សម្រាប់បេសកកម្មសន្តិសុខដ៏ស្មុគស្មាញ ។
សមយុទ្ធឆ្មាំអង្គរ២០១៦នេះ លើកកម្ពស់យ៉ាងសកម្មដល់ស្ថិរភាពតំបន់ និងកិច្ចសហប្រតិបត្តិការតំបន់ ដោយជំរុញកិច្ចសហប្រតិបត្តិការទ្វេភាគីរវាងដៃគូក្នុងតំបន់ ។ នេះជាការផ្លាស់ប្តូរគ្នាទៅវិញទៅមក ។ បុគ្គលិកយោធាសហរដ្ឋអាមេរិកដែលចូលរួមក្នុងសមយុទ្ធឆ្មាំអង្គរ២០១៦ នឹងទទួលបទពិសោធន៍តាមរយៈការធ្វើការជាមួយសមភាគីកម្ពុជា ហើយភាគីកម្ពុជាក៏នឹងទទួលបានបទពិសោធន៍ពីបុគ្គលិកយោធាសហរដ្ឋអាមេរិកដូចគ្នា ។
លោកឧត្តមសេនីយ៍ឯក ជា សារ៉ន មានប្រសាសន៍ថា តាងនាមក្រសួងការពារជាតិ អគ្គបញ្ជាការ មេបញ្ជាការកងទ័ពជើងគោកនៃកងយោធពលខេមរភូមិន្ទ សូមសម្តែងការសាទរយ៉ាងកក់ក្តៅចំពោះវត្តមានរបស់លោកជំទាវតំណាងស្ថានទូត លោកមេបញ្ជាការ និងសហការី ព្រមទាំងកម្មសិក្សាការីទាំងអស់ដែលបានចូលរួមក្នុងលំហាត់ហ្វឹកហ្វឺនឆ្មាំអង្គរ២០១៦នេះ ។ ក្នុងឱកាសនេះដែរ លោកក៏សូមពាំនាំនូវការផ្តាំផ្ញើសាកសួរសុខទុក្ខ និងនឹករឭកដ៏ជ្រាលជ្រៅពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ពីលោកឧបនាយករដ្ឋមន្ត្រីរដ្ឋមន្ត្រីក្រសួងការពារជាតិ លោកនាយឧត្តមសេនីយ៍អគ្គមេបញ្ជាការ-អគ្គមេបញ្ជាការរងនៃកងយោធពលខេមរភូមិន្ទ ចំពោះថ្នាក់ដឹកនាំលំហាត់ យោធាចារ្យ និងកម្មសិក្សាការីទាំងអស់ក្នុងមនោសញ្ចេតនាគោរពស្រឡាញ់ ជូនដល់ថ្នាក់ដឹកនាំ យោធាចារ្យ និងកម្មសិក្សាការីកម្ពុជា និងអាមេរិក ទទួលបាននូវសុខភាពល្អបរិបូរណ៍ កម្លាំងពលំមាំមួន ក្នុងការចូលរួមធ្វើលំហាត់ ពិសេសសូមឱ្យការស្នាក់នៅលើទឹកដីនៃព្រះរាជាណាចក្រកម្ពុជារបស់កងទ័ពសហរដ្ឋអាមេរិកប្រកបតែសេចក្តីសុខសុវត្ថិភាព ។
លោកឧត្តមសេនីយ៍ឯក ជា សារ៉ន ក៏បានថ្លែងនូវការកោតសរសើរនិងវាយតម្លៃខ្ពស់ចំពោះអនុគណៈកម្មការក្រុមការងារធ្វើលំហាត់ទាំងពីរកម្ពុជានិងសហរដ្ឋអាមេរិក ដែលបានធ្វើកិច្ចសហប្រតិបត្តិការយ៉ាងល្អប្រសើរ ពាក់ព័ន្ធនឹងការងារត្រៀមរៀបចំធ្វើលំហាត់ តាំងពីដំណាក់កាលដំបូងរហូតដល់មានពិធីបើកវគ្គលំហាត់ឆ្មាំអង្គរនៅពេលនេះ ។ នេះគឺជាលំហាត់ហ្វឹកហ្វឺនឆ្មាំអង្គរលើកទី៧ ហើយក៏ជាលំហាត់ហ្វឹកហ្វឺនឆ្មាំអង្គរលើកទី៣ដែរ ដែលកងទ័ពជើងគោកនៃកងយោធពលខេមរភូមិន្ទ ដើរតួជាស្នូលក្នុងការចូលរួមធ្វើលំហាត់ជាមួយកងទ័ពជើងគោកសហរដ្ឋអាមេរិកប្រចាំតំបន់អាស៊ីប៉ាស៊ីហ្វិក ។ លោកឧត្តមសេនីយ៍ឯក បន្តថា ប្រទេសកម្ពុជាគឺជាប្រទេសមួយដែលមានសង្គ្រាមផ្ទៃក្នុងអូសបន្លាយដ៏រ៉ាំរ៉ៃជាងគេក្នុងតំបន់អាស៊ីអាគ្នេយ៍ ៕
ចែករំលែកព័តមាននេះ