អភិបាលខេត្តសៀមរាប ចុះសួរសុខទុក្ខកងទ័ពសមរភូមិមុខ
ខេត្តសៀមរាប ៖ លោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប និងលោក នូ ផល្លា ប្រធានក្រុមប្រឹក្សាខេត្ត នៅថ្ងៃទី១២ ខែមីនា ឆ្នាំ២០១៦នេះ
ខេត្តសៀមរាប ៖ លោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប និងលោក នូ ផល្លា ប្រធានក្រុមប្រឹក្សាខេត្ត នៅថ្ងៃទី១២ ខែមីនា ឆ្នាំ២០១៦នេះ បានដឹកនាំគណៈប្រតិភូខេត្ត និងនាំយកនូវគ្រឿងឧបភោគបរិភោគ ដែលជាអំណោយរបស់រដ្ឋបាលខេត្តសៀមរាប ជូនដល់នាយទាហាន ពលទាហាន កងពលតូចអន្តរាគមន៍លេខ៥ នៃកងពលធំអន្តរាគមន៍លេខ២ ឈរជើងនៅភូមិពោធិ៍ចាស់ ឃុំបេង ស្រុកបន្ទាយអម្ពិល ខេត្តឧត្តរមានជ័យ សមរភូមិមុខទិសទី៣ នៃសមរភូមិមុខទិសយោធភូមិភាគទី៤ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ ដែលអមដំណើរដោយ ឯកឧត្តម លោកឧកញ៉ា លោកជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត អស់លោក លោកស្រីជាថ្នាក់ដឹកនាំមន្ទីរ ស្ថាប័ន អង្គភាព មន្ត្រីរាជការ ក្នុងនាមជាខេត្តសម្ព័ន្ធមេត្រីភាពជាមួយកងពលតូចអន្តរាគមន៍លេខ៥ ។ ក្នុងកិច្ចស្វាគមន៍របស់លោកឧត្តមសេនីយ៍ទោ សំរឹទ្ធ សារ៉េត មេបញ្ជាការកងពលតូចអន្តរាគមន៍លេខ៥ បានធ្វើសេចក្តីរាយការណ៍អំពីសភាពការណ៍សន្តិសុខ តាមបណ្តោយព្រំដែនកម្ពុជា-ថៃមានសភាពស្ងប់ស្ងាត់ល្អ ប៉ុន្តែកងកម្លាំងនៃកងយោធពលខេមរភូមិន្ទនៅតែបន្តការប្រុងប្រយ័ត្នជាប់ជានិច្ច ដើម្បីត្រៀមលក្ខណៈទប់ទល់ទៅនឹងល្បិច កលគ្រប់រូបភាពរបស់បច្ចាមិត្ត ដែលមានបំណងចង់ឈ្លានពានបូរណភាពទឹកដីរបស់កម្ពុជា ។
ម្យ៉ាងទៀតលើភារកិច្ចថែរក្សាសន្តិសុខ កងពលតូចអន្តរាគមន៍លេខ៥ បានយកចិត្តទុកដាក់ប្រើប្រាស់កម្លាំងសហការណ៍ជាមួយអាជ្ញាធរមូលដ្ឋាន ធ្វើសកម្មភាពការពារ សុវត្ថិភាពជូនប្រជាពលរដ្ឋ និងកម្មវិធីនានារបស់រាជរដ្ឋាភិបាលទាំងថ្នាក់ជាតិ និង អន្តរជាតិក្នុងខេត្តឧត្តរមានជ័យផងដែរ ក្នុងនោះលោកសេនីយ៍ទោ សំរឹទ្ធ សារ៉េត ក៏បានសម្តែងនូវអំណរគុណចំពោះគណៈប្រតិភូខេត្តសៀមរាបដែលជាខេត្តសម្ព័ន្ធមេត្រីភាពដោយកន្លងមកបានធ្វើកិច្ចសហប្រតិបត្តិការគ្នាបានល្អ ព្រមទាំងបានធ្វើការផ្គត់ផ្គង់ ឧបត្ថម្ភគាំទ្រ ក្នុងការកសាងទីតាំងអង្គភាពផងដែរ ។
មានប្រសាសន៍សំណេះសំណាលជាមួយនាយទាហាន និងពលទាហាននាឱកាសនោះ លោកបណ្ឌិត ឃឹម ប៊ុនសុង ក៍បានបញ្ជាក់ថា កន្លងមកប្រមុខរាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់សម្តេចសម្តេចតេជោ ហ៊ុន សែន នាយករដ្ឋមន្ត្រី បានយកចិត្តគិតគួរ ចំពោះសុខភាព និង ជីវភាពរស់នៅរបស់បងប្អូនកងយោធពលខេមរភូមិន្ទ ឈរជើងនៅសមរភូមិមុខ និងក្រុមគ្រួសារទ័ពនៅតំបន់ទិសទី៣ នៃយោធភូមិភាគទី៤ ក៏ដូចកងកម្លាំងប្រដាប់អាវុធ ការពារតាមបណ្តោយបន្ទាត់ព្រំដែនកម្ពុជា ថៃ ។
លោក បណ្ឌិតក៏បានធ្វើការក្រើនរំលឹក ដល់នាយទាហាន ពលទាហានទាំងអស់ ដោយបានបញ្ជាក់ថា ទោះបីស្ថានការណ៍នៅតាមបណ្តោយព្រំដែនកម្ពុជា ថៃ មានសភាពស្ងប់ស្ងាត់យ៉ាងណាក៏ដោយ បងប្អូនត្រូវយកចិត្តទុកដាក់ ក្នុងការហ្វឹកហាត់ឱ្យបានជាប្រចាំនូវយុទ្ធវិធីយុទ្ធសាស្ត្ររបស់កងទ័ពហើយបងប្អូនទាំងអស់ត្រូវត្រៀមលក្ខណៈនៅគ្រប់វិនាទី ក្នុងការជួយអន្តរាគមន៍នូវពេលមានសភាពការណ៍ណាមួយកើតឡើង។លោក បណ្ឌិតក៏បានលើកឡើងថា ក្រោមអនុសាសន៍របស់សម្តេច នាយករដ្ឋមន្ត្រី ដែលបានបំផុសឱ្យមានចលនាចងសម្ព័ន្ធមេត្រីភាពរវាងសមរភូមិក្រោយ និងជាមួយសមរភូមិមុខ ក្នុងកាលៈទេសៈមួយដូចដែលពាក្យស្លោកបូរាណខ្មែរបានពោលថា ធ្វើស្រែនឹងទឹក ធ្វើសឹកនឹងបាយ ដើម្បីពង្រឹងខឿនការពារជាតិរបស់ប្រជាជន។
លោកបណ្ឌិត ឃឹម ប៊ុនសុង ក៏បានលើកពីវីរភាពអង់អាចក្លាហាន លះបង់អ្វីៗគ្រប់បែបយ៉ាង រួមទាំងជីវិត និងសេចក្តីសុខផ្ទាល់ខ្លួន ដើម្បីជាតិ និងបូរណភាពដែនដីនៃមាតុភូមិ នៅតែមានតម្លៃជាដរាប សម្រាប់បុព្វហេតុបម្រើគោលនយោបាយរបស់រាជរដ្ឋាភិបាល លើទស្សនវិស័យ ធ្វើឱ្យសមរភូមិប្រយុទ្ធនៅព្រំដែន បានក្លាយជាតំបន់ព្រំដែនសន្តិភាព កិច្ចសហប្រតិបត្តិការណ៍ និងការអភិវឌ្ឍន៍ ។ លោកបណ្ឌិត ក៏បានផ្តាំផ្ញើដល់បងប្អូនកងកម្លាំងទាំងអស់ត្រូវយកចិត្តទុកដាក់ខ្ពស់ទៅលើបញ្ហាសុខភាព អនាម័យ និងធ្វើការកសាង ជម្រកក្នុងអង្គភាព ព្រមទាំងធ្វើការដាំដុះដំណាំបន្លែបង្ការ និងចិញ្ចឹមសត្វ ដើម្បីផ្គត់ផ្គង់ជីវភាពកងទ័ពក្នុងអង្គភាព និងគ្រួសារកងទ័ព ជាពិសេសលើការគ្រប់គ្រង និងថែរក្សានូវគ្រឿងបំពាក់សម្ភារកងទ័ពឱ្យបានល្អ ក្នុងការទ្រទ្រង់នៅពេលមានសភាពការណ៍ណាមួយកើតឡើង ព្រមទាំងចូលរួមអនុវត្តនូវគោលនយោបាយភូមិឃុំ មានសុវត្ថិភាព សំដៅឆ្ពោះទៅការអភិវឌ្ឍន៍រីកចម្រើនជូនដល់ប្រជាពលរដ្ឋ ឱ្យដល់ត្រើយសុភមង្គមតទៅថ្ងៃអនាគត ។
លោកបណ្ឌិត ឃឹម ប៊ុនសុង ក៏បានលើកឡើងបន្តថា ក្នុងឱកាសប្រជាពលរដ្ឋកម្ពុជា ទទួលអំណរសាទរ បុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ ក្នុងនាមខេត្តសម្ព័ន្ធមេត្រីភាព និងកងពលតូចអន្តរាគមន៍លេខ៥ គណៈអភិបាលខេត្តសៀមរាប ក៏បាននាំយកនូវ អំណោយជាគ្រឿងឧបភោគបរិភោគ ចំនួន១៨មុខ និងប្រេងម៉ាស៊ូត ១ពាន់លីត្រ,ស័ង្កសី ៥០០សន្លឹក ,តង់០១ផ្ទាំង ,ពុយដាក់ប្រេង ៥ និង ថវិកា១០លានរៀល និងចែកជូនកងទ័ពម្នាក់ៗ ៤ម៉ឺនរៀល ព្រមទាំងឧបត្ថម្ភដល់កងពលធំអន្តរាគមន៍លេខ២ នូវស្រាបៀរ៥០កេស ថវិកា៥លានរៀលផងដែរ ៕
ចែករំលែកព័តមាននេះ