នៅពេលដែលពេលវេលារំកិលទៅមុខ ការងារមួយចំនួនបានលេចឡើង ហើយការងារមួយចំនួនទៀតក៏ត្រូវហួសសម័យ និងបាត់បង់។ ក្នុងយុគសម័យឌីជីថល មនុស្សត្រូវធ្វើទំនើបកម្មចំណេះដឹងរបស់ពួកគេជាប់រហូត
នៅពេលដែលពេលវេលារំកិលទៅមុខ ការងារមួយចំនួនបានលេចឡើង ហើយការងារមួយចំនួនទៀតក៏ត្រូវហួសសម័យ និងបាត់បង់។ ក្នុងយុគសម័យឌីជីថល មនុស្សត្រូវធ្វើទំនើបកម្មចំណេះដឹងរបស់ពួកគេជាប់រហូត បើពុំនោះទេ គេអាចនឹងបាត់បង់ការងារ ឬមុខ របរ។
ពីមុនគេគិតថា មនុស្សត្រូវចេះអាន និងចេះសរសេរ។ ប៉ុន្តែក្នុងសម័យកាលឌីជីថលនេះ ការចេះអាន និងចេះសរសេរមិនត្រូវបានចាត់ទុកថា ជាមូលដ្ឋាននៃចំណេះដឹងទេ។ ការចេះប្រើកុំព្យូទ័រ និងអ៊ីនធើរណេត គឺជាកត្តាមូលដ្ឋានចំនួនពីរដែលមនុស្សគ្រប់រូបត្រូវចេះដឹងនៅក្នុងសម័យកាលនេះ។
ក្រឡេកត្រឡប់ក្រោយបន្តិចនៅក្នុងទស្សវត្សរ៍១៩៩០ អ្នកដែលគ្រាន់តែចេះប្រើកុំព្យូទ័រ ក៏អាចរកលុយចាយបានដែរនៅពេលនោះ។ ការវាយអត្ថបទកុំព្យូទ័រមួយទំព័រអាចរកបានចំនួនមួយដុល្លារ។ ការវាយអត្ថបទតាមកុំព្យូទ័របានក្លាយជាមុខរបរមួយដែលអាចរកប្រាក់ចំណូលគ្រាន់បើ ហើយសាលាបង្រៀនវាយអក្សរតាមកុំព្យូទ័រក៏កើតយ៉ាងច្រើន។ ប៉ុន្តែក្រោយមកមុខរបរនេះ ក៏បាត់បង់ ហើយរបរអ៊ីនធើរណេតបានចូលមកជំនួសវិញ។ នៅតាមដងផ្លូវសំខាន់ៗនៅក្នុងទីក្រុងភ្នំពេញ មានកន្លែងបម្រើសេវាកម្មអ៊ីនធើរណិតជាច្រើន។ ប៉ុន្តែមិនយូរប៉ុន្មានមកដល់ពេលនេះ របរសេវាអ៊ីនធើរណេតតាមដងផ្លូវ ក៏សឹងតែលុបបាត់ទាំងស្រុងចេញពីដងផ្លូវនៅទីក្រុងភ្នំពពេញ ដោយសារតែមនុស្សស្ទើរតែគ្រប់គ្នានៅភ្នំពេញបានប្រើប្រាស់អ៊ីនធើរណេតនៅផ្ទះ ឬក៏តាមស្មាតហ្វូនរបស់ពួកគេ។
ការកើតឡើង និងការបាត់ទៅវិញ នៃមុខរបរទាំងពីរនេះ បានប្រាប់ដល់ប្រជាជនកម្ពុជាថា បច្ចេកវិទ្យាបានធ្វើឱ្យមានការកកើតមុខរបរថ្មីៗ និងធ្វើឱ្យមុខរបរមួយចំនួនហួសសម័យកាល។ ដូច្នេះវាចាំបាច់ណាស់ដែលមនុស្សត្រូវតែធ្វើទំនើបកម្មចំណេះដឹងរបស់ពួកគេឱ្យបានទាន់ការរីកចម្រើនផ្នែកបច្ចេកវិទ្យា។ បើពុំនោះទេ ពួកគេមិនអាចចាប់យកឪកាសថ្មីនៃមុខរបរ និងការងារឡើយ។
បច្ចេកវិទ្យាបានផ្តល់ឪកាសកាន់តែច្រើនសម្រាប់មនុស្សដែលមានចំណេះដឹងដែលទំនើបទាន់សម័យកាល។ ប៉ុន្តែផ្ទុយទៅវិញ ជនក្រីក្រកម្ពុជាជាច្រើនប្រហែលជាមិនអាចទាញយកប្រយោជន៍ពីការរីកចម្រើនផ្នែកបច្ចេកវិទ្យានេះឡើយ។ នេះក៏ព្រោះតែពួកគេមិនមានលទ្ធភាពប្រើប្រាស់បច្ចេកវិទ្យាទាំងនោះ។ ដូច្នេះការពង្រីកបណ្តាញអ៊ីនធើរណេតឱ្យដល់ជនបទ គឺជារឿងល្អមួយ ដើម្បីជួយដល់ជនក្រីក្រកម្ពុជានៅតាមជនបទ។
នេះជាអ្វីដែលរដ្ឋាភិបាល និងអ្នកនយោបាយគួរគិតគូរ ដើម្បីធានាថា ទាំងអ្នកមាន និងអ្នកក្រមានលទ្ធភាពដូចគ្នាទទួលយកផលប្រយោជន៍ពីបច្ចេកវិទ្យាព័ត៌មាននេះ៕
ដោយ រ័ត្ន ធីយ៉ា
ចែករំលែកព័តមាននេះ