ខេត្តសៀមរាប ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា នៅព្រឹកថ្ងៃទី១១ មីនា នេះ ក្រោយពីបញ្ចប់ការចុះសួរសុខទុក្ខ និងផ្តល់អំណោយ
ខេត្តសៀមរាប ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា នៅព្រឹកថ្ងៃទី១១ មីនា នេះ ក្រោយពីបញ្ចប់ការចុះសួរសុខទុក្ខ និងផ្តល់អំណោយដល់ប្រជាពលរដ្ឋនៅខេត្តឧត្តរមានជ័យរួចមក សម្តេចក៏ឆ្លៀតឱកាសចូលទស្សនាប្រាសាទអង្គរវត្ត ដើម្បីថតរូបដើមឈើ ជាមួយលោកអភិបាលខេត្ត និងមន្ត្រីខណ្ឌរដ្ឋបាលព្រៃឈើខេត្ត ដែលសម្តេចបានដាំនៅក្នុងសួនឧទ្យានកាលពីពិធីបុណ្យឆ្លងសហស្សវត្សរ៍ឆ្នាំ២០០០មុន ព្រមទាំងបានថតរូបជាមួយអ្នកលក់ទឹកត្នោត នៅក្នុងប្រាសាទអង្គរវត្តយ៉ាងសប្បាយរីករាយទៀតផង ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈប្រព័ន្ធសង្គម Facebook ផ្ទាល់របស់សម្តេច ដែលបានសរសេរ និងបង្ហោះរូបភាពជាច្រើនសន្លឹក ស្តីពីសកម្មភាពដ៏សប្បាយរីករាយរបស់សម្តេចកិត្តិព្រឹទ្ធបណ្ឌិត ក្នុងឱកាសអញ្ជើញទស្សនាកម្សាន្តតំបន់អង្គរថា «ភរិយាខ្ញុំថ្ងៃនេះ ឆ្លៀតពេលទៅសួរសុខទុក្ខ និងផ្តល់ជំនួយសម្រាប់ប្រជាពលរដ្ឋនៅខេត្តឧត្តរមានជ័យរួចមក គាត់បានឆៀងចូលទៅទស្សនាប្រាសាទអង្គរវត្ត ដើម្បីថតរូបជាមួយដើមឈើ ដែលគាត់បានដាំជិត២០ឆ្នាំមុន ។ ហើយភរិយាខ្ញុំរែកទឹកត្នោត និងថតរូបជាមួយប្អូនលក់ទឹកត្នោតយ៉ាងសប្បាយរីករាយនៅមុខប្រាសាទអង្គរវត្ត ៕
ចែករំលែកព័តមាននេះ