ចប់ពិធីបុណ្យភ្ជុំភ្លាម រឿងរ៉ាវចោទប្រកាន់គ្នាទៅវិញទៅមកពីបញ្ហាលុយតុងទីន រវាងអ្នកសិល្បៈ៣រូប កាន់តែក្តៅគគុក ប្រៀបដូចទឹកលើចង្ក្រាន្តកំពុងពុះកញ្ជ្រោលយ៉ាងសន្ធឹក ដែលអ្នកគាំទ្ររបស់តារាទាំង៣ កំពុងតាមដានយ៉ាងខ្លាំងថា
រាជធានីភ្នំពេញ ៖ ចប់ពិធីបុណ្យភ្ជុំភ្លាម រឿងរ៉ាវចោទប្រកាន់គ្នាទៅវិញទៅមកពីបញ្ហាលុយតុងទីន រវាងអ្នកសិល្បៈ៣រូប កាន់តែក្តៅគគុក ប្រៀបដូចទឹកលើចង្ក្រាន្តកំពុងពុះកញ្ជ្រោលយ៉ាងសន្ធឹក ដែលអ្នកគាំទ្ររបស់តារាទាំង៣ កំពុងតាមដានយ៉ាងខ្លាំងថា តើរឿងលុយនោះ នរណាចោទប្រកាន់នរណាឱ្យពិតប្រាកដ? ។
អតីតតារាកំប្លែងអ្នកនាង ក្អយ បានចេញមុខប្រកាសរួមដៃជាមួយនឹងអ្នកនាង ខ្ញុង ត្រៀមវាយបកទៅកាន់អ្នកនាង សឿ សុធារ៉ា វិញ ពាក់ព័ន្ធនឹងលុយតុងទីន។ ដូចទៅនឹងអ្នកនាង ខ្ញុង ដែរ អ្នកនាង ក្អយ បានប្រកាសជាសាធារណៈថា ខ្លួននឹងធ្វើការកិច្ចការតាមផ្លូវច្បាប់ជាមួយអ្នកនាង សឿ សុធារ៉ា ដើម្បីទាមទារកិត្តិយស និងភាពត្រឹមត្រូវរបស់ខ្លួនមកវិញ។
នាងក្អយ គឺជាអតីតតារាកំប្លែងដ៏មានប្រជាប្រិយភាពកាលពីអំឡុង១០ឆ្នាំ មានឈ្មោះពិតថា ជួន ចាន់រតនា ដែលបច្ចុប្បន្នមានងារជាជំទាវផងនោះ បានប្រកាសត្រៀមខ្លួនចាត់ចែងតាមផ្លូវច្បាប់ទៅលើតារាសម្តែងអ្នកនាង សឿ សុធារ៉ា ដែលបានចោទប្រកាន់ថា រូបនាង (ក្អយ) នៅជំពាក់លុយតុងទីន ។
អ្នកនាងក្អយ បានបង្ហោះសារលើបណ្តាញសង្គមហ្វេសប៊ុករបស់អ្នកនាងមានខ្លឹមសារថា « ប៉ុន្មានថ្ងៃនេះ អាណិតតារាជើងចាស់ម្នាក់ដែលមានសតិដូចជាមិនសូវគ្រប់ណាស់ ទើបមិនតបត តែចង់រំលឹកដាស់តឿន អ្នកនាងថា ភ្ជុំចប់ហើយ ខ្ញុំនឹងស្រីញុង បានត្រៀមខ្លួនរួចហើយ ចុះអ្នកនាងវិញត្រៀមខ្លួនហើយរឺនៅ? សងកិត្តិយស និងភាពត្រឹមត្រូវខ្ញុំមកវិញ ណាសម្លាញ់» ។
សាររបស់អ្នកនាង ក្អយ នាពេលនេះបានធ្វើឡើង បន្ទាប់ពីអ្នកនាង សឿ សុធារ៉ា បានធ្វើការប្រកាសជាសាធារណៈវាយប្រហារចំៗឈ្មោះតារាពីរដួង គឺ អ្នកនាង ក្អយ និង នាង ស្រេង សុកាន់ដា ហៅ ខ្ញុង ឱ្យជួយដោះស្រាយលុយតុងទីនដែលមិនមានទាន់ទូទាត់អស់ឱ្យរូបនាង។
ការបើកចំពោះពីកូនតុងទីនទាំងពីរខាងលើរបស់អ្នកនាង សឿ សុធារ៉ា នេះដែរ បន្ទាប់ពីនាងបានកើតទុកមិនសុខចិត្តចំពោះកូនតុងទីននាងដទៃទៀត ក្នុងនោះក៏មានតារាកំប្លែងនាង ពីន ផងដែរ បានចេញមុខជាសាធារណៈអោយអ្នកនាង សងលុយតុងទីនដែលនៅសេសសល់នេះដូចគ្នា។
យ៉ាងណា បន្ទាប់ពីការប្រកាសរបស់អ្នកនាង សឿ សុធារ៉ា ខាងលើនេះ អ្នកនាង ខ្ញុង បានបង្ហោះសារផ្លោះពាក្យសម្តីទៅវិញទៅមកពេញបណ្តាញសង្គមហ្វេសប៊ុក។ ចុងក្រោយនេះ គេទើបតែឃើញនាង ក្អយ ក៏ទើបតែចេញមុខឆ្លើយតបទៅកាន់អ្នកនាង សឿ សុធារ៉ា វិញ។
ជាការកត់សម្គាល់ពាក់ព័ន្ធទៅនឹងជម្លោះលុយតុងទីនខាងលើនេះ គេនៅមិនទាន់ដឹងច្បាស់នៅឡើយទេថា តើភាគីខាងណាជាអ្នកខុស និងភាគីខាងណាជាអ្នកត្រូវនោះឡើយ? តែយ៉ាងណា បើក្រឡែកមើលទៅលើផេកហ្វេសប៊ុករបស់អ្នកនាង សឿ សុធារ៉ា វិញ បានបង្ហោះសារដ៏គួអោយកត់សម្គាល់មួយនៅថ្ងៃនេះថា ជីវិតមនុស្សទាំងអស់ខំប្រឹងទាំងយប់ទាំងថ្ងៃ ទាំងភ័យទាំងក្លាហាន តើក៏ព្រោះតែអ្វី? បើថា ដើម្បីក្រពះ ពួកយើងត្រូវទទួលស្គាល់គ្រប់គ្នាថា យើងត្រូវការអាហារមកទ្រទ្រង់ជីវិតយើងរស់បន្ត តើក្នុងមួយថ្ងៃពួកយើងហូបអាហារចំនួនប៉ុន្មានពេលបងប្អូន 3ពេល 4ពេល 5ពេល ឬក៏10ពេល? ហេតុអ្វីអ្នកខ្លះត្រូវតែលោភលន់ម្ល៉េះ? ខ្ញុំធ្វើបុណ្យ1រៀលខ្មែរក្តី សុំមេត្តាកុំអោយខ្ញុំជួបបន្តទៀត៕
ចែករំលែកព័តមាននេះ