រាជធានីភ្នំពេញ ៖ តារាសម្តែងលោកផែ សុផាន់ណា បានលើកទឹកចិត្តគូស្នេហ៍វ័យក្មេងស្រស់សោភាជាតារាសម្តែងដូចគ្នាដោយរៀបចំពិធីខួបកំណើតជូននាងយ៉ាងសប្បាយរីករាយ។ ពិធីខួបកំណើតនេះ
រាជធានីភ្នំពេញ ៖ តារាសម្តែងលោកផែ សុផាន់ណា បានលើកទឹកចិត្តគូស្នេហ៍វ័យក្មេងស្រស់សោភាជាតារាសម្តែងដូចគ្នាដោយរៀបចំពិធីខួបកំណើតជូននាងយ៉ាងសប្បាយរីករាយ។ ពិធីខួបកំណើតនេះរៀបចំកាលពីរាត្រីថ្ងៃទី៨ មីនា ឆ្នាំ២០១៦ នៅភោជនីយដ្ឋានវីហ្វ្រែនជិតផ្សារដេប៉ូ រាជធានីភ្នំពេញ។
បញ្ជាក់ប្រាប់អ្នកយកព័ត៌មានគ្រាកំពុងទទួលស្វាគមន៍ភ្ញៀវ និងមិត្តភក្តិក្នុងពិធីខួបកំណើតនោះ លោក ផែ សុផាន់ណា ឱ្យដឹងថា លោករៀបចំធ្វើពិធីខួបកំណើតជូនគូស្នេហ៍បណ្តូលចិត្តរបស់លោកនេះ ព្រោះតែយល់ថារវាងលោក និងម្ចាស់បេះដូង គឺកម្រមានកម្មវិធីជួបជុំមិត្តភក្តិណាស់ គឺមានតែកម្មវិធី ធម្មតាៗ។ ដោយគូស្នេហ៍កើតចំថ្ងៃ៨ មីនា ជាទិវាសិទ្ធិនារី ទើបលោកផាន់ណា រៀបចំពិធីខួបកំណើតជូននាង ដើម្បីលើកទឹកចិត្តឲ្យសមតាមការចង់បានរបស់លោកផង ។ លោកផាន់ណា ចង់មានកម្មវិធីជុំគ្នាទាំងមិត្តភក្តិសងខាង និងចាស់ទុំទើបបង្កើតកម្មវិធី ម្យ៉ាងចំទិវាសិទ្ធិនារីជាថ្ងៃពិសេស ។
លោកផែ សុផាន់ណា និងគូស្នេហ៍ស្គាល់គ្នារយៈពេល៣ឆ្នាំមកហើយ គ្រាដែលលោកទៅចូលរួមពិធីសម្ពោធភាពយន្ត ដែលលោកសម្តែង។ គ្រានោះលោកផាន់ណា សុំនាងរាប់អាន ។ ក្រោយមកទៅថតខារ៉ាអូខេជួបគ្នា ក៏សុំស្គាល់ឈ្មោះក្នុងហ្វេសប៊ុកទៀត ធ្វើឱ្យកាន់តែស្និទ្ធស្នាលឡើង ។ រយៈពេលមួយឆ្នាំ លោកផាន់ណា ដាច់ចិត្តសុំស្រឡាញ់នាង ព្រមទាំងមានការដឹងឮពីចាស់ទុំសងខាង ។
តារាសម្តែងឧស្សាហ៍បានតំណែងតួកាច និងឧស្សាហ៍ឃើញក្នុងវ៉ុលខារ៉ាអូខេរបស់ផលិតកម្មហង្សមាស ថោន និងសាន់ដេ លោកផាន់ណា ឲ្យដឹងថា ខាងស្រីចង់ចូលរោងការ ឆាប់ៗ ប៉ុន្តែលោកស្តាយការងារសិល្បៈដែលចេះតែរីកចម្រើនទៅមុខ ដោយមានគេហៅថតរហូត ទើបពន្យារពេលរៀបអាពាហ៍ពិពាហ៍ ។ ទោះជាយា៉ងណាក្តី លោកគ្រោងរៀបការនៅអំឡុងឆ្នាំ២០១៧ ទុកពេលរកប្រាក់សិន ។
ក្រោយរៀបការរួច លោកផែ សុផាន់ណា នឹងបន្ថយការងារសិល្បៈ ចំណែកអនាគតភរិយារបស់លោកប្រហែលជាឱ្យឈប់ពីអាជីពសិល្បៈព្រោះនាងមានមុខរបរលក់គ្រឿងសំអាងយ៉ាងមមាញឹកតាមអនឡាញ ។
ចំណែកកញ្ញាសាសា ខូល ដែលមានឈ្មោះពិតលី ស៊ីម៉ា ជាគូស្នេហ៍បញ្ជាក់ថា មានអ្នកស្រលាញ់នាងច្រើន តែនាងសម្រេចជ្រើសរើសអ្នកសិល្បៈដូចគ្នាធ្វើជាគូអនាគត ។ «វាជានិស្ស័យដែលយើងបានយល់ចិត្តគ្នាស្រឡាញ់គ្នា។ ម្យ៉ាងទៀតនាងខ្ញុំក៏ចង់តស៊ូនឹងពាក្យថា «យកអ្នកសិល្បៈងាយបែកគ្នា» នាងខ្ញុំនឹងប្រឹងជម្នះមិនឲ្យពាក្យនេះធ្លាក់មកលើរូបនាងខ្ញុំឡើយ ។
គាត់ជាមនុស្សល្អហ៊ានតស៊ូជាមួយការងារធ្វើការដោយចិត្តអំណត់ទោះជាហត់ក៏ស៊ូ ទោះគាត់ជាតារាត្រូវការភាពស្អាតក៏ដោយក៏មិនខ្វល់។ អ្វីដែលសំខាន់នោះសង្សាររបស់នាងខ្ញុំមិនបានធ្វើអ្វីមិនឲ្យតម្លៃនារីឡើយ គឺតែងតែឲ្យចាស់ទុំដឹងឮ នេះជាចំណុចសំខាន់មួយដែលនាងខ្ញុំបានមើលឃើញ» ។ កញ្ញាលី ស៊ីម៉ា ថ្លែងអំណរគុណលោកផែ សុផាន់ណា ដែលចាត់ចែងពិធីខួបកំណើតដល់នាងបានជួបជុំមិត្តភក្តិទាំងសងខាង ខណៈឆ្នាំនេះនាងមានអាយុ២៣ឆ្នាំគត់ ។
លោកផែ សុផាន់ណា មានអាយុ២៧ឆ្នាំធ្លាប់បង្ហាញស្នាដៃសម្តែងក្នុងខ្សែភាពយន្តរឿង«ចម្រៀងស្នេហ៍រលកជីវិត» កាលពី៥ឆ្នាំមុនបញ្ចាំងនៅទូរទស្សន៍ប៉ុស្តិ៍លេខ៥ ។ ក្រៅពីនោះ លោកផាន់ណា ថតខារ៉ាអូខេឱ្យផលិតកម្មហង្សមាស ថោន និងសាន់ដេ ព្រមទាំងសម្តែងរឿងភាគជាច្រើនឱ្យបណ្តាស្ថានីយទូរទស្សន៍នានា។ រឿងភាគដែលលោកផែ សុផាន់ណា ចូលរួមសម្តែង ហើយទើបបញ្ចាំងចប់មានចំណងជើងថា «ស្នេហ៍ឆ្លងភព» ៕
ចែករំលែកព័តមាននេះ