រាជធានីភ្នំពេញ ៖ ប្រឡូកអាជីពសិល្បៈត្រឹមតែមួយរយៈពេលខ្លីប៉ុណ្ណោះ កញ្ញាវ័យ២០ឆ្នាំ ស៊ូ ស៊ីរីកា រីកចម្រើនជាលំដាប់ ធ្វើឱ្យនាងរីករាយ និងមានមោទនភាព ។ ជាពិសេសពេលនេះស៊ីរីកា បានចូលជាសមាជិកថ្មីរបស់ផលិតកម្មថោន ។
រាជធានីភ្នំពេញ ៖ ប្រឡូកអាជីពសិល្បៈត្រឹមតែមួយរយៈពេលខ្លីប៉ុណ្ណោះ កញ្ញាវ័យ២០ឆ្នាំ ស៊ូ ស៊ីរីកា រីកចម្រើនជាលំដាប់ ធ្វើឱ្យនាងរីករាយ និងមានមោទនភាព ។ ជាពិសេសពេលនេះស៊ីរីកា បានចូលជាសមាជិកថ្មីរបស់ផលិតកម្មថោន ។
កញ្ញាស៊ូ ស៊ីរីកា គឺជាចៅស្រីរបស់អ្នកស្រីកែវ មន្ថា អតីតតារាភាពយន្តមានឈ្មោះល្បីកាលពីជំនាន់លោកគង់ សំអឿន ព្រមទាំងជាក្មួយរបស់អតីតតារាកំប្លែងអ្នកស្រីជុំ រស្មី ហៅស្រីទូច ។
តារាចម្រៀងស៊ូ ស៊ីរីកា អាចច្រៀងបានទាំងបទភាសាខ្មែរ ទាំងបទភាសាអង់គ្លេសយ៉ាងពីរោះ ។
កញ្ញាស៊ូ ស៊ីរីកា អតីតបេក្ខនារីក្នុងកម្មវិធីប្រឡងចម្រៀង «ឌឹវ៉យខេមបូឌា» រដូវកាលទី១ ។ កាលពីពេល ថ្មីៗកន្លងមករីកាឱ្យដឹងថា នាងបានដាក់ពាក្យប្រឡងក្នុងកម្មវិធីនោះ ព្រោះចង់ដឹងសមត្ថភាពរបស់ខ្លួនកម្រិតណា បន្ទាប់ពីបងប្អូន និងមិត្តភក្តិជំរុញលើកទឹកចិត្ត។ ទោះជាយ៉ាងណាក្តី រីកាបានឈានចូលត្រឹមវគ្គផ្សាយផ្ទាល់អាទិត្យទី២ប៉ុណ្ណោះក៏បាត់បង់ឱកាសបន្តទៅទៀត ។ គ្រានោះរីកាយល់ថាប្រឡូកក្នុងពិភពសិល្បៈពិបាកណាស់ មិនងាយធ្វើបានសមតាមបំណងឡើយ ។
ឱកាសថ្មីសម្រាប់ស៊ូ ស៊ីរីកា គឺក្រោយពីប្រឡងធ្លាក់មកមានស្ថានីយទូរទស្សន៍នានាទាក់ទងនាងឱ្យឡើងច្រៀងជាបន្តបន្ទាប់ ធ្វើឱ្យនាងមានទឹកចិត្តចង់បន្តលើវិថីសិល្បៈចម្រៀងទៅមុខទៀត ។
ពេលនេះកញ្ញាស៊ូ ស៊ីរីកា ត្រូវផលិតកម្មថោនបញ្ចូលជាតារាចម្រៀងពេញសិទ្ធិស្របតាមបំណងប្រាថ្នាដ៏សំខាន់ក្នុងជីវិតរបស់នាង ។ «យើងមានទីតាំងឈរជើង មានកន្លែងការងារបំពេញសមតាមចំណូលចិត្ត ។ នាងខ្ញុំមិននឹកស្មានថាខ្សែជីវិតសិល្បៈរបស់នាងខ្ញុំបានឈានមកដល់កម្រិតគេចាប់អារម្មណ៍ទេ ដោយសារទៅណាមកណាគេស្គាល់ខុសពីមុន ហើយហ៊្វ្រែនក្នុងហ្វេសប៊ុកក៏កាន់តែឱ្យកម្លាំងចិត្ត ។ បើនិយាយពីការងារវិញគឺនាងខ្ញុំមមាញឹកច្រើនដាច់ឆ្ងាយពីដំបូងទាំងច្រៀងតាមខេត្តក៏ដូចជាការបង្ហាញវត្តមាននៅតាមបណ្តាកញ្ចក់ទូរទស្សន៍នានា » ។ ស៊ូ ស៊ីរីកា និយាយបែបនេះ ។
ចូលផលិតកម្មថោនកញ្ញាស៊ូ ស៊ីរីកា មានបទចម្រៀងផ្ទាល់ខ្លួន៦បទទាំងបទញាក់ និងបទមនោសញ្ចេតនា ។ ក្នុងចំណោម៦បទនោះ បទមនោសញ្ចេតនា១បទមានការចាប់អារម្មណ៍ ពីប្រិយមិត្តអ្នកស្តាប់ ។ យុវវ័យបានសរសើរថាស៊ីរីកាមានទេពកោសល្យល្អគួរឱ្យចាប់អារម្មណ៍លើការបញ្ចេញក្បាច់រាំ ។ លទ្ធផលនេះមកពីរីកាខំហ្វឹកហាត់ ដើម្បីអភិវឌ្ឍខ្លួនឱ្យរីកចម្រើន ។
ស៊ូ ស៊ីរីកា ឱ្យដឹងថា អ្នកស្រីកែវ មន្ថា និងអ្នកស្រីជុំ រស្មី ជាអ្នកជួយបណ្តុះបណ្តាល និងផ្តល់ដំបូន្មានចំពោះបញ្ចេកទេសច្រៀងដល់នាង ទើបធ្វើឱ្យនាងរីកចម្រើនជាលំដាប់ ។ បច្ចុប្បន្នកញ្ញាស៊ូ ស៊ីរីកា ជានិស្សិតឆ្នាំទី២នៃសាកលវិទ្យាល័យមួយផងដែរ ៕
ចែករំលែកព័តមាននេះ