ខេត្តសៀមរាប ៖ បន្ទាប់ពីតុលាការសម្រេចឃុំខ្លួនអតីតនាយសង្កាត់រដ្ឋបាលព្រៃឈើ ក្នុងសង្កាត់ស្រែណូយ ឈ្មោះថោង សុខៃ ដែលជាប់ពាក់ព័ន្ធករណី (គំរាមសម្លាប់ និងប្រើហិង្សាទៅលើប្រពន្ធរបស់ខ្លួន) ក្រោយមកស្ត្រីដែលជាភរិយារបស់ជនសង្ស័យ បានស្នើសុំឱ្យស្ថាប័នតុលាការចាត់ការទៅតាមផ្លូវច្បាប់ បន្ទាប់ពីគាត់លេចឮថា មានអ្នករត់ការសុំឱ្យជនសង្ស័យនៅក្រៅឃុំ ។
ហេតុការណ៍ចុះឃាត់ខ្លួនជនសង្ស័យតាមដីការបស់តុលាការឱ្យនាំខ្លួនឈ្មោះថោង សុខៃ កាលពីវេលាម៉ោង០៣រសៀលថ្ងៃ០១ មីនា ២០១៦ ស្ថិតនៅក្នុងផ្ទះជនសង្ស័យក្នុងភូមិអូរប្រាសាទ ឃុំអូរប្រាសាទ ស្រុកមង្គលបុរី ខេត្តបន្ទាយមានជ័យ នាំយកមកទីបញ្ជាការដ្ឋានកងរាជអាវុធហត្ថខេត្តសៀមរាប ដើម្បីសួរនាំរួចបញ្ជូនទៅតុលាការ ។
លោក យិន ស្រាង នាយកក្រឡាបញ្ជីនែសាលាដំបូងខេត្តសៀមរាបបានឱ្យដឹងថា លោកថោង សុ ខៃ អាយុ៥៨ឆ្នាំ ជាអតីតមេព្រៃសង្កាត់ស្រែណូយ មានស្រុកកំណើតនៅភូមិគ្រួស ឃុំសំរោង ស្រុកពញ្ញាឮ ខេត្តកណ្តាល ។ បច្ចុប្បន្នស្នាក់នៅភូមិវាល សង្កាត់គោកចក ក្រុងសៀមរាប ត្រូវកម្លាំងអាវុធហត្ថខេត្តសៀមរាប សហការជាមួយកម្លាំងអាវុធហត្ថខេត្ត បន្ទាយមានជ័យចាប់ខ្លួន កាលពីរសៀលថ្ងៃទី១ មីនា ស្ថិតនៅខេត្តបន្ទាយមានជ័យ តាមដីកាបញ្ជាឱ្យចាប់ខ្លួនរបស់សាលាឧទ្ធរណ៍ក្រោមបទចោទប្រកាន់ ហិង្សាប្រព្រឹត្តដោយសហព័ន្ធ និងបទគំរាមកំហែងថា «នឹងសម្លាប់» តាមបញ្ញតិមាត្រា២២២ និងមាត្រា២៣៣នៃក្រមព្រហ្មទណ្ឌ ចេញដោយលោកឃុន លាងម៉េង ប្រធានក្រុមប្រឹក្សាជំនុំជម្រះសាលាឧទ្ធរណ៍ ដែលបានប្រព្រឹត្តិកាលពីថ្ងៃទី១៩ មីនា ២០១៥ ស្ថិតនៅភូមិវាល សង្កាត់គោកចក ក្រុងសៀមរាប ។ លោកបន្តថា ជននេះត្រូវបានឃុំខ្លួនដាក់ពន្ធនាគារហើយ រង់ចាំការបើកសាវនាការនាពេលខាងមុខនេះ ។
ចំណែកជនរងគ្រោះជាប្រពន្ធ គឺអ្នកស្រីយស់ លក្ខ័ណា បានរៀបរាប់ថា គាត់រស់នៅភូមិវាល សង្កាត់គោកចក ក្រុងសៀមរាប មានប្តី ឈ្មោះថោង សុខៃ អាយុ៥៨ឆ្នាំ ជាអតីត នាយសង្កាត់រដ្ឋបាលព្រៃឈើស្រែណូយ ស្រុកវ៉ារិន ខេត្តសៀមរាប ។ ក្រោយពីបានលែងលះគ្នារួចមក ជននេះបានវាយធ្វើបាបជេរប្រមាថជាច្រើនលើកជាច្រើនសារ ហើយពេលខ្លះបានគំរាមសម្លាប់ទៀតផង ។
លោកស្រីបន្តថា ការប្រើអំពើហិង្សានាពេលកន្លងទៅ បានធ្វើឱ្យអ្នកស្រីរងរបួសយ៉ាងធ្ងន់ធ្ងរ ហើយនៅពេលខ្លះ បានកូនស្រីជួយ និង
រត់ទៅរកសមត្ថកិច្ចទាន់ កុំអីអាចស្លាប់ក៏ថាបាន ។ ក្រោយពីប្រើអំពើហិង្សា និងគំរាមសម្លាប់យ៉ាងដូច្នេះ ធ្វើឱ្យអ្នកស្រីមានការភ័យខ្លាចយ៉ាងខ្លាំង ទើបបានទៅដាក់ពាក្យបណ្តឹងនៅសាលាដំបូងខេត្តសៀមរាប ដើម្បីឱ្យខាងច្បាប់ជួយអន្តរាគមន៍ ប៉ុន្តែពន្លឺយុត្តិធម៌មិនមានសោះឡើយ ។
លោកស្រីបន្ថែមថា ដោយក្តីអស់សង្ឃឹម លោកស្រីបានបន្តស្វែងរកអន្តរាគមន៍សាលាឧទ្ធរណ៍ ។ បន្ទាប់ពីមានការជួយអន្តរាគមន៍របស់លោក អ៊ុក សាវុធ អគ្គព្រះរាជអាជ្ញារួចមក ទើបនៅថ្ងៃទី១៧ វិច្ឆិកា ២០១៥ ប្រធានក្រុមប្រឹក្សាជំនុំជម្រះ លោកឃុន លាងម៉េង បានចេញដីកាបង្គាប់ឱ្យចាប់ខ្លួន និងឃុំខ្លួនឈ្មោះថោង សុខៃ ក្រោមបទចោទប្រកាន់អំពើហិង្សាប្រព្រឹត្តដោយសហព័ន្ធ និងបទគំរាមកំហែងថា នឹងសម្លាប់ភរិយារបស់ខ្លួន ។
ចែករំលែកព័តមាននេះ