ខេត្តមណ្ឌលគិរី ៖ ភ្លើងឆេះឈើក្នុងឃ្លាំងក្រុមហ៊ុន «យូនីហ្គ្រីន» ស្រុកកោះញែក សង្ស័យមានអ្នកលួចដុត ត្រូវព្រះអគ្គីលេបត្របាក់តាំងពីម៉ោង៥ល្ងាចថ្ងៃទី២ មីនា រហូតមកដល់ល្ងាចថ្ងៃទី៣ មីនា ក៏នៅមិនទាន់អស់រងើកភ្លើងនៅឡើយ ខណៈក្រុមហ៊ុនមួយនេះកំពុងត្រូវបានគណៈកម្មការចម្រុះថ្នាក់ជាតិទប់ស្តាត់ និងបង្ក្រាបបទល្មើសព្រៃឈើ ដាក់ពាក្យបណ្តឹងទៅសាលាដំបូង ក្នុងសំណុំរឿងស្តុកឈើខុសច្បាប់ ។
ករណីភ្លើងឆេះឈើ ក្នុងក្រុមហ៊ុនដែលកំពុងជួបរឿងអាស្រូវ មានពាក្យបណ្តឹងនៅតុលាការនេះ ត្រូវបានមជ្ឈដ្ឋាននានានិយាយថា វាអាចជាចេតនាពីម្ចាស់ក្រុមហ៊ុន ឬជនណាម្នាក់ដែលជាប់ពាក់ព័ន្ធ នៅក្នុងបទឧក្រឹដ្ឋកម្មព្រៃឈើខាងលើ ព្រោះការដុតបំផ្លាញនេះ ប្រហែលជាអ្នកប្រព្រឹត្តិយល់ឃើញថា អាចជួយកាត់បន្ថយនូវទោសទណ្ឌនានា ដែលមានចែងក្នុងច្បាប់ព្រៃឈើ មិនសូវធ្ងន់.កពេក ។
តាមសេចក្តីរាយាករណ៍បាននិយាយថា គេមិនបានដឹងថាភ្លើងបានចាប់ផ្តើមឆេះពីពេលណានោះទេ លុះដល់វេលាម៉ោងប្រហែលជា៥ល្ងាច ស្រាប់តែគេប្រទះឃើញមានផ្សែងហុយទ្រលោមពេញផ្ទៃមេឃ និងមានអណ្តាតភ្លើងសន្ធោសន្ធៅចេញពីគំនរឈើហុប និងឈើអារដែលមានចំនួនរាប់ពាន់កំណាត់ ។ ប្រភពបន្តថា បើទោះជានៅទីតាំងស្តុកឈើក្នុងក្រុមហ៊ុនខាងលើ មានសមត្ថកិច្ចចម្រុះនៅយាមល្បាតពិតមែន តែភ្លើងបានវាយប្រហារគំនរឈើទាំងនោះ ពេញបន្ទុករហូតមិនអាចរកវិធីសង្គ្រោះឈើដែលមានមុខកាត់ធំៗទាំងនោះវិញបានទេ គឺបានត្រឹមឈរមើលនឹងរត់គេចចេញពីអណ្តាតភ្លើងដែលកំពុងឆេះពេញបន្ទុកនោះប៉ុណ្ណោះ ។
ក្រោយពីមានហេតុការណ៍ភ្លើងឆេះគំនរឈើរាប់ពាន់ម៉ែត្រគូបរួចមក នៅព្រឹកថ្ងៃទី៣ មីនា គេឃើញលោកនាយខណ្ឌរដ្ឋបាលព្រៃឈើមណ្ឌលគិរី បានដឹកនាំមន្ត្រីជំនាញចុះទៅទីតាំងកើតហេតុ ។ ប្រភពពីមន្ត្រីរដ្ឋបាលព្រៃឈើបានឲ្យដឹងថា តាមការប៉ាន់ស្មានជំហានដំបូង ឈើដែលឆេះក្នុងក្រុមហ៊ុនយូនីហ្គ្រីននោះ មានអត្រាពី៦០ទៅ៧០% ។ ចំណែកឈើដែលឆេះនោះជាឈើ ប្រភេទចម្រុះ ដូចជា ឈើទាល សុក្រំ ផ្ចឹក គគីរ… ។ ប្រភពបន្តថា ឈើដែលឆេះនោះគឺជា ឈើដែលគណៈកម្មការចម្រុះថ្នាក់ជាតិទប់ស្តាត់ នឹងបង្ក្រាបបទល្មើសព្រៃឈើ បានធ្វើការវាស់វែងរួចអស់ហើយ ដែលមានចំនួនប្រមាណជិត២ពាន់ម៉ែត្រគូប នឹងកំពុងមានចំណាត់ការនៅតុលាការខេត្ត ត្បិតឈើទាំងនោះគេស្តុកដោយខុសច្បាប់ ឬជាឈើចោរ ។
លោក ស្វាយ សំអ៊ាង អភិបាលខេត្តមណ្ឌលគិរីបានមានប្រសាសន៍នៅល្ងាចនៅថ្ងៃទី៣ មីនាថា បើតាមការរាយការណ៍ភ្លើងនោះ អាចបណ្តាលមកពីភ្លើងឆេះព្រៃ ព្រោះរដូវនេះ ប្រជាពលរដ្ឋបានកាប់ឆ្ការព្រៃ និងដុត ដើម្បីយកដីទុកធ្វើស្រែចម្ការនារដូវវស្សា ។ ចំណែកចំនួនឈើដែលគណៈកម្មការជាតិ វាស់វែងនោះគឺមានចំនួនពិតប្រាកដហើយ តែដោយសារភ្លើងនៅមានកម្តៅខ្លាំង ទើបមន្ត្រីជំនាញមិនទាន់អាចចូលទៅធ្វើការស្ទាបស្ទង់ថាឆេះអស់ប៉ុន្មានទេ… ចាំនៅពេលដែលមន្ត្រីពន្លត់ភ្លើងអស់ មន្ត្រីជំនាញនឹងចូលទៅធ្វើការវាស់វែងបន្ត ។
ចំណែកលោក វង្ស សុកសេរី នាយខណ្ឌរដ្ឋបាលព្រៃឈើមណ្ឌលគិរី មិនអាចសុំការបំភ្លឺបានទេ ព្រោះលោកចូលទៅពិនិត្យនៅទីតាំងភ្លើងឆេះឈើក្នុងក្រុមហ៊ុនយូនីហ្គ្រីន ដែលតំបន់នោះមិនមានសេវាទូរស័ព្ទអាចទាក់ទងបានទេ ។
ប្រភពដែលកោះសន្តិភាពទទួលបានចុងក្រោយនៅវេលាម៉ោង៤រសៀល ថ្ងៃទី៣ មីនាថា ឈើដែលឆេះក្នុងក្រុមហ៊ុនយូនីហ្គ្រីន អាចនឹងឆេះអស់ទាំងស្រុង ព្រោះមានកត្តាពីដែលមន្ត្រីជំនាញមិនអាច ស្រោចស្រង់ឈើទាំងនោះវិញបាន ។ បញ្ហាទីមួយផ្លូវធ្វើដំណើរចម្ងាយ១៣០គីឡូម៉ែត្រពីទីរួមខេត្ត បើត្រូវយករថយន្តដឹកទឹកទៅប្រើ ក៏គ្មានផ្លូវសម្រាប់បើករថយន្តដឹកទឹកចូលដែរ ។ ចំណែកបញ្ហាមួយទៀតត្រូវបានប្រភពបញ្ជាក់ថា គឺគ្មានប្រភពទឹក នៅទីនោះសុទ្ធតែព្រៃភ្នំ នឹងជារដូវប្រាំង អូរត្រពាំងនានារីងហួតទឹកអស់ហើយ ។
យ៉ាងណាក៏ដោយប្រជាពលរដ្ឋបានចោទសួរគ្នាទៅវិញទៅមកថា នៅក្នុងក្រុមហ៊ុនខាងលើ គឺមានមន្ត្រីកម្លាំងប្រដាប់អាវុធចម្រុះយាមកាម ចុះហេតុម៉េចបានជាភ្លើងឆេះឈើរាប់ពាន់ម៉ែត្រគូប មិនដឹងពីមូលហេតុ ? ព្រោះបើមានករណីភ្លើងឆេះព្រៃរាលដាលមែន ក៏គេអាចដឹងមុនដែរ ព្រោះភ្លើងមិនមែនចេះតែឆេះស្ងាត់ៗដូចចោរទេ ។ ពលរដ្ឋបានលើកឡើងថា អ្នកសង្ស័យថាបណ្តាលមកពីភ្លើងឆេះព្រៃអាចជាការឃុបឃិតគ្នាទេ ។
សូមបញ្ជាក់ថា គណៈកម្មការចម្រុះថ្នាក់ជាតិដែលដឹកនាំដោយលោកឧត្តមសេនីយ៍ឯក វង្ស ពិសេន បានចុះត្រួតពិនិត្យក្រុមហ៊ុន យូនីហ្គ្រីន ដែលមានទីតាំងនៅស្រុកកោះញែក កាលពីរសៀលថ្ងៃទី២៧ មករា ២០១៦ ហើយបានរកឃើញឈើមានច្បាប់នឹងមិនទាន់បង់ពន្ធជាង១.០០០ម៉ែត្រគូប ក្នុងបរិវេណដីក្រុមហ៊ុន និងឈើគ្មានម្ចាស់ចំនួនជាង៧០កំណាត់ ដែលលាក់ទុកក្បែរស្នាក់ការក្រុមហ៊ុន ឬដឹកចូលមិនទាន់ ។
មន្ត្រីព្រៃឈើម្នាក់បានឲ្យដឹងថា គណៈកម្មការចម្រុះថ្នាក់ជាតិបានរកឃើញថា ឈើក្នុងក្រុមហ៊ុនដីសម្បទានសេដ្ឋកិច្ចយូនីហ្គ្រីន ស្ថិតនៅភូមិសាស្ត្រឃុំរយ៉ មានចំនួន៥០០ម៉ែត្រគូប បានវាយត្រាបង់ពន្ឋចូលរដ្ឋរួចហើយ ។ ចំណែកឈើនៅក្នុងឃ្លាំងដែលមានទីតាំងនៅភូមិក្រោល ឃុំស្រែសង្គម មានចម្ងាយពីដីក្រុមហ៊ុនប្រមាណជាង៣០គីឡូម៉ែត្រ សម្រាប់ស្តុបឈើមានចំនួន២០០ម៉ែត្រគូប(អារច្រៀករួច)ក៏បានបង់ពន្ធរួចរាល់ដែរ ។ មន្ត្រីព្រៃឈើដដែលបានបន្តថា ក្រៅពីឈើដែលមានច្បាប់ ក្រុមមន្ត្រីជំនាញបានរកឃើញឈើប្រភេទសុក្រំ ចំនួន៧០កំណាត់ (អាចមានចំនួន២០ទៅ៣០ម៉ែត្រគូប) ដែលក្រុមឈ្មួញដឹកយកទៅលាក់ទុកនៅក្រោយកម្ពោតព្រៃក្បែរស្នាក់ការក្រុមហ៊ុន ។
ប្រភពពីមន្ត្រីដែលបានចូលរួមក្នុងសកម្មភាពត្រួតពិនិត្យឈើក្រុមហ៊ុនយូនីហ្គ្រីនបាននិយាយថា ក្នុងដីក្រុមហ៊ុនក្រៅពីឈើដែលមានច្បាប់ គេនៅឃើញមានឈើដែលមិនទាន់ បង់ពន្ធចំនួន៥០០ម៉ែត្រគូបទៀត សុទ្ធសឹងប្រភេទឈើហុបធំៗ ដែលបានដាក់បន្លំជាមួយឈើមានច្បាប់ ។ ចំណែកប្រជាពលរដ្ឋបានឲ្យដឹងថា កន្លងមកឈើប្រណីត ធ្នង់ បេង នាងនួង ត្រូវបានក្រុមឈ្មួញប្រមូលដឹកចេញពីព្រៃការពារ និងដែនបរិស្ថាន រាប់ពាន់ម៉ែត្រគូប មកលក់ឲ្យឧកញ៉ា តុប ច័ន្ទវីយាដា ដែលទទួលសិទ្ធិប្រមូលឈើក្នុងក្រុមហ៊ុនយូនីហ្គ្រីន ដែលអាចថា «កន្ទេលធំបន្លំដេក» ក៏បាន ព្រោះឈើក្នុងដីក្រុមហ៊ុនស្ទើរលែងមានទៅហើយ(កាប់អស់) ។ ចំណែកឈើដែលគេគរទុកនោះ ភាគច្រើនជាឈើថ្មី ដែលទើបអារមិនទាន់ស្រក់ជ័រអស់ផង ។
ប្រភពបានខ្សឹបថា កន្លងមកលោកឧកញ៉ា វីយាដា បានឲ្យប្អូនប្រុសពីរនាក់ចេញមុខរត់ការខ្វែងដៃ ខ្វែងជើង គ្រប់ស្ថាប័នសមត្ថកិច្ចក្នុងខេត្ត ដើម្បីជួយសម្រួលដល់ការរត់ពន្ធឈើខុសច្បាប់របស់ខ្លួន ។ ច្បាប់ដែលប្អូនប្រុសរបស់លោកឧកញ៉ា វីយាដា ឈ្មោះ ផាន់ណា តែងអួតប្រាប់អ្នកយកព័ត៌មានថា លោកមានសិទ្ធិក្នុងការនាំឈើចេញ និងឈើដែលមានក្នុងក្រុមហ៊ុនសុទ្ធតែមានច្បាប់ គឺគ្រាន់តែជារបាំងមុខមួយសម្រាប់ការពារមុខរបរទុច្ចរិតប៉ុណ្ណោះ ព្រោះមុនពេលមានយុទ្ធនាការចុះបង្ក្រាបរបស់គណៈ កម្មការចម្រុះថ្នាក់ជាតិ គេឃើញទាំងឧកញ៉ា វីយាដា និងមេការទាំងពីររបស់ខ្លួនដែលមានឈ្មោះ ផាន់ណា និងឈ្មោះ ម៉ៅ បានព្យាយាមរត់ការសុំសមត្ថកិច្ច និងជំនាញ ដើម្បីដឹកឈើដែលទិញពីក្រៅដែនដីក្រុមហ៊ុនទៅលក់នៅឯខេត្តត្បួងឃ្មុំ ។ ប្រភពបន្តថា បើកុំតែមានបទបញ្ជារបស់ប្រមុខរាជរដ្ឋាភិបាលកម្ពុជាឲ្យទប់ស្តាត់ការរត់ពន្ធឈើខុសច្បាប់ ម្ល៉េះឈើដែលក្រុមមន្ត្រីជំនាញចូលទៅឃើញនោះ ត្រូវបានដឹកយកទៅលក់ឲ្យថៅកែយួនបាត់អស់ទៅហើយ ។
ប្រភពពីសាលាដំបូងខេត្តមណ្ឌលគិរីបានឲ្យដឹងកាលពីថ្ងៃទី២៤ កុម្ភៈ ២០១៦ថា ក្រុមហ៊ុនសម្បទានដីសេដ្ឋកិច្ចចំនួនពីរកំពុងប្រឈមមុខតាមផ្លូវតុលាការពាក់ព័ន្ធពាក្យ បណ្ដឹងរបស់ គណៈកម្មការបង្ក្រាប និងទប់ស្កាត់បទល្មើសព្រៃឈើថ្នាក់ជាតិ បន្ទាប់ពីការស៊ើបអង្កេតចប់ ។ ករណីភ្លើងឆេះឈើ ដែលកំពុងស្ថិតនៅក្នុងការតាមដាន និងរក្សាទុករបស់គណៈកម្មការថ្នាក់ជាតិ ក៏មិនមែនមានតែនៅក្រុមហ៊ុនយូនីហ្គ្រីនទេ នៅក្រុមហ៊ុនប៊ិញភ្វឿក១ នៅក្រុមហ៊ុនកសិកម្មខ្មែរអង្គរ ក៏មានឆេះដែរ ។ ការឆ្លើយបែបយករួចខ្លួនពីអាជ្ញាធរខេត្ត ក៏មិនបានធ្វើឲ្យប្រជាពលរដ្ឋស្ងប់ចិត្តដែរ ព្រោះថា កាលពីរបីឆ្នាំមុន ជំនួញឈើគ្រប់ប្រភេទក្នុងខេត្តមណ្ឌលគិរី បានកើតមានភ្លូកទឹកភ្លូកដី ដាក់ឈើរាយប៉ាយពេញព្រៃ គ្រប់ខែគ្រប់រដូវមិនដែលឃើញមានភ្លើងឆេះម្តងណាទេ ។ ចម្លែកអីតែពេលនេះ នៅពេលមានបទបញ្ជា ពីប្រមុខរាជរដ្ឋាភិបាលឲ្យបញ្ឈប់ការជួញដូរ និងរត់ពន្ធឈើខុសច្បាប់ ស្រាប់តែមានករណីភ្លើងឆេះឈើ គ្រប់ទីកន្លែង ដែលមានស្តុកឈើ ទាំងដែលកន្លែងស្តុកឈើទាំងនោះ ត្រូវបានក្រុមឈ្មួញត្រាយព្រៃស្អាតទៅហើយ នៅតែមានភ្លើងឆេះព្រៃ តាមទៅឆេះឈើដែលគរទុកមួយកន្លែងដែលមានសុវត្ថិភាពទៀតដូចជារកជឿមិនបានឡើយ ។
ព័ត៌មានចុងក្រោយ
តាមសេចក្តីរាយការណ៍ឱ្យដឹងថា ករណីភ្លើង ឆេះឈើតាមក្រុមហ៊ុន ដែលកោះសន្តិភាពទើប បាននាវេលាម៉ោង៦ល្ងាច គឺក្រៅពីក្រុមហ៊ុនយូនីហ្គ្រីន ក៏នៅមានក្រុមហ៊ុនកសិកម្មខ្មែរអង្គរ កើត មានការឆេះឈើយ៉ាងសន្ធឹកសន្ធាប់ផងដែរ នាថ្ងៃទី៣ មីនា ហើយឈើក្រុមហ៊ុនកសិកម្មខ្មែរ អង្គរ គណៈកម្មការជាតិកំពុងធ្វើការវាស់វែងមិនទាន់បញ្ចប់នៅឡើយទេ ព្រោះឈើមានចំនួន ច្រើន ៕
ចែករំលែកព័តមាននេះ