រាជធានីភ្នំពេញ ៖ ក្រសួងយុត្តិធម៌កម្ពុជានិងក្រសួងយុត្តិធម៌វៀតណាម គ្រោងនឹងចុះកិច្ចព្រមព្រៀងចំនួនពីរបន្ថែមលើកិច្ចព្រមព្រៀងមួយចំនួនពីមុន គឺកិច្ចព្រមព្រៀងស្តីពីការផ្ទេរទណ្ឌិត និងកិច្ចព្រមព្រៀងស្តីពីកាជួយគ្នាទៅវិញ
រាជធានីភ្នំពេញ ៖ ក្រសួងយុត្តិធម៌កម្ពុជានិងក្រសួងយុត្តិធម៌វៀតណាម គ្រោងនឹងចុះកិច្ចព្រមព្រៀងចំនួនពីរបន្ថែមលើកិច្ចព្រមព្រៀងមួយចំនួនពីមុន គឺកិច្ចព្រមព្រៀងស្តីពីការផ្ទេរទណ្ឌិត និងកិច្ចព្រមព្រៀងស្តីពីកាជួយគ្នាទៅវិញទៅមកលើវិស័យព្រហ្មទណ្ឌ ។
លោក ជិន ម៉ាលីន អ្នកនាំពាក្យក្រសួងយុត្តិធម៌ បានឲ្យដឹងក្រោយជំនួបរវាងលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ជាមួយគណៈប្រតិភូវៀតណាម ដឹកនាំដោយរដ្ឋមន្ត្រីក្រសួងយុត្តិធម៌លោក Ha Hung Cuong នាព្រឹកថ្ងៃទី២៩ ខែកុម្ភៈ នៅទីស្តីការក្រសួងថា ក្នុងជំនួបពិភាក្សា លោករដ្ឋមន្ត្រីក្រសួងយុត្តិធម៌វៀតណាម បានលើកឡើងថា ដំណើរទស្សនកិច្ចរបស់គណៈប្រតិភូគឺដើម្បីផ្លាស់ប្តូរបទពិសោធន៍ និងរៀនសូត្រពីគ្នាទៅវិញទៅមករវាងក្រសួងយុត្តិធម៌កម្ពុជា និងក្រសួងយុត្តិធម៌វៀតណាម ក្នុងការកែទម្រង់វិស័យច្បាប់និងប្រព័ន្ធយុត្តិធម៌ និងពង្រឹងកិច្ចសហប្រតិបតិ្តការរវាងក្រសួងយុត្តិធម៌របស់ប្រទេសទាំងពីរ ។
លោក ជិន ម៉ាលីន បញ្ជាក់ថា «ក្នុងដំណើរទស្សនកិច្ចរបស់រដ្ឋមន្ត្រីក្រសួងយុត្តិធម៌វៀតណាម ក៏មានការចុះហត្ថលេខាលើផែនការការងារ ដែលជាគម្រោងសម្រាប់ឆ្នាំ២០១៦ដែរ។ ភាគីទាំងពីរបានពិភាក្សាគ្នា ដើម្បីឲ្យមានសកម្មភាពជាងមុន និងរីកចម្រើនជាងមុន។ បើចង់មានរូបរាងជាក់ស្តែង លុះត្រាតែមានផែនការការងារ ប្រសិនជាមានតែកិច្ចសហប្រតិបត្តិការហើយគ្មានផែនការទេ ហាក់បីដូចជាយល់សុបិនតែប៉ុណ្ណឹង» ។
អ្នកនាំពាក្យរូបនេះឲ្យដឹងទៀតថា សម្រាប់ក្រសួងយុត្តិធម៌ទាំងពីរ បានរៀបចំផែនការការងារសម្រាប់ឆ្នាំ២០១៦ ។ ផែនការការងារនេះផ្តោតសំខាន់លើកិច្ចសហប្រតិបត្តិការវិស័យមួយចំនួនដូចជា ការរៀបចំសិក្ខាសាលា កិច្ចប្រជុំរួមដើម្បីធ្វើការផ្លាស់ប្តូរបទពិសោធន៍លើវិស័យច្បាប់ ការរៀបចំទស្សនកិច្ចសិក្សា និងការផ្លាស់ប្តួរមន្ត្រីនៃក្រសួងយុត្តិធម៌ទាំងពីរ ដើម្បីរៀនសូត្រពីគ្នាទៅវិញទៅមក ។
សម្រាប់ផែនការរួមគ្នានោះ លោក ជិន ម៉ាលីន ក៏បានលើកឡើងពីកិច្ចប្រជុំនៅតាមបណ្តាខេត្តជាប់ព្រំដែនកម្ពុជា-វៀតណាម ក្នុងការពង្រឹងកិច្ចសហប្រតិបត្តិការទប់ស្កាត់បង្ក្រាបបទល្មើស និងឧក្រិដ្ឋកម្មមួយចំនួន ពិសេសនោះ បញ្ហាគ្រឿងញៀនជាដើម ។ សម្រាប់ផែនការនោះ ភាគីទាំងពីរក៏បានសន្យាពង្រឹងផ្នែកច្បាប់ក្នុងជួយគ្នាទៅវិញមកលើវិស័យច្បាប់ និងយុត្តិធម៌ ដូចជាការផ្តល់ព័តមាន និងឯកសារមួយចំនួនឲ្យគ្នាទៅវិញទៅមកផងដែរ ។
ជាមួយគ្នានេះ ក្នុងជំនួបក៏បានលើកឡើងពីការពង្រឹងកិច្ចព្រមព្រៀងដែលភាគីកម្ពុជានិងវៀតណាមបានចុះហត្ថលេខាជាមួយគ្នារួចដួចជាទី១-អនុស្សរណៈនៃការយោគយល់គ្នាឆ្នាំ១៩៩៩ ទាក់ទងនឹងកិច្ចសហប្របតិ្តការទូទៅ ទី២-កិច្ចព្រមព្រៀងធ្វើបត្យាប័នឆ្នាំ២០១៣ និងទី៣-កិច្ចព្រមព្រៀងជួយគ្នាទៅវិញទៅមក ពាក់ព័ន្ធនឹងផ្នែកច្បាប់ និងវិស័យរដ្ឋប្បវេណី ។
លោក ជិន ម៉ាលីន សង្កត់ធ្ងន់ថា «កិច្ចប្រជុំនេះ គឺធ្វើយ៉ាងណាឲ្យកិច្ចព្រមព្រៀងលើយន្តការនៃកិច្ចព្រមព្រៀងដែលយើងធ្លាប់មានពីមុនមានប្រសិទ្ធភាពជាងមុន ហើយរៀបចំកិច្ចព្រមព្រៀងថ្មីមួយចំនួនទៀតដែលនឹងចេញរូបរាងនៅពេលខាងមុខ ។ កិច្ចព្រមព្រៀងទាំងនេះមាន១- កិច្ចព្រមព្រៀងស្តីពីការផ្ទេរទណ្ឌិត និង២-កិច្ចព្រមព្រៀងស្តីពីការជួយគ្នាទៅវិញទៅមកផ្នែកច្បាប់លើវិស័យព្រហ្មទណ្ឌ ។ សម្រាប់កិច្ចព្រមព្រៀងទាំងនេះ ក្រសួងកំពុងរៀបចំតាក់តាក់តែង ហើយគ្រោងបញ្ចប់នៅក្នុងឆ្នាំ២០១៦ នេះ។
លោក ជិន ម៉ាលីន បានឲ្យដឹងដែរថា នៅក្នុងឆ្នាំ២០១៣ ក្រសួងយុត្តិធម៌វៀតណាម និងក្រសួងយុត្តិធម៌កម្ពុជា ក៏បានចុះកិច្ចព្រមព្រៀងជាមួយគ្នាដែរលើវិស័យរដ្ឋប្បវេណី។ សម្រាប់សេចក្តីព្រាងនៃកិច្ចព្រមព្រៀងគ្នានោះ នឹងត្រូវជំរុញឲ្យបានឆាប់ៗនៅថ្ងៃខាងមុខនេះ ។ លោកលើកឡើងទៀតថា នាពេលកន្លងមកក្រសួងយុត្តិធម៌ក៏បានធ្វើកិច្ចសហប្រតិបត្តិការជាមួយគ្នាជាច្រើនតាមរយៈផ្ទេរបត្យាប័ន ក៏ដូចជាការជួយគ្នាលើវិស័យរដ្ឋប្បវេណី ការធ្វើបត្យាប័នផងដែរ ប៉ុន្តែចំនួនតួលេខប៉ុន្មាននោះមិនបានដឹងទេ ។
សម្រាប់កិច្ចព្រមព្រៀងរវាងក្រសួងយុត្តិធម៌កម្ពុជា និងវៀតណាមនេះ ភាគីកម្ពុជាកំពុងរៀបចំកិច្ចព្រមព្រៀង ហើយអាចនឹងបញ្ចប់នៅពេល ឆាប់ៗខាងមុខនេះ ។
កិច្ចព្រមព្រៀងនេះនឹងមានផលប្រយោជន៍រវាងប្រទេសទាំងពីរដើម្បីជួយសម្រួលដល់នីតិវិធីក្នុងការអនុវត្តរបស់តុលាការ ។
លោក ជិន ម៉ាលីន គូសបញ្ជាក់ថា «កិច្ចព្រមព្រៀងជួយគ្នាទៅវិញទៅមកផ្នែកច្បាប់ទាំងរដ្ឋប្បវេណី និងព្រហ្មទណ្ឌ គឺជាផ្នែកមួយនៃការជួយសម្រួលដល់ជនរងគ្រោះ និងភាគីពាក់ព័ន្ធមួយចំនួនទៀត ។ លើសពីនេះ កិច្ចព្រមព្រៀងក៏ជំរុញដល់នីតិវិធីឲ្យមានភាពលឿន កុំឲ្យមានការកកស្ទះជាដើម» ។
អ្នកនាំពាក្យក្រសួងយុត្តិធម៌ ក៏បានលើកឡើងពីបញ្ហាគ្រឿងញៀនផងដែរ ដោយភាគីទាំងពីរនឹងធ្វើកិច្ចប្រជុំនៅតាមបណ្តាខេត្ត នៅតាមព្រំដែន ដើម្បីធ្វើការដោះស្រាយបញ្ហាដែលកើតឡើងជាក់ស្តែងតែម្តង ។
លោក ជិន ម៉ាលីន ឲ្យដឹងទៀតថា កិច្ចព្រមព្រៀងដែលភាគីទាំងពីរបានធ្វើរួចមាន ទី១-កិច្ចព្រមព្រៀងជួយគ្នាទៅវិញទៅមកផ្នែកច្បាប់លើវិស័យរដ្ឋប្បវេណី តាំងពីឆ្នាំ២០១៣ ទី២-កិច្ចព្រមព្រៀងស្តីពីការធ្វើបត្យាប័ន និងទី៣-អនុស្សរណៈយោគយល់គ្នាស្តីពីកិច្ចសហប្រតិបត្តិការ ។ ចំណែកកិច្ចព្រមព្រៀងថ្មីដែលនឹងធ្វើហើយចុះអនុស្សរណៈនៅពេលខាងមុខ គឺទី១-កិច្ចព្រមព្រៀងជួយគ្នាទៅវិញទៅមកលើវិស័យព្រហ្មទណ្ឌ និងទី២-កិច្ចព្រមព្រៀងស្តីពីការផ្ទេរទណ្ឌិត ៕
ចែករំលែកព័តមាននេះ