រាជធានីភ្នំពេញ ៖ រហូតមកទល់ពេលនេះ តារាសម្តែង និងបង្ហាញម៉ូត នាង សុផា លីនដា នៅមិនទាន់លេចលឺដំណឹងវិលមកកាន់អាជីពសិល្បៈជាថ្មីឡើងវិញឡើយ បន្ទាប់ពីនាងបានសម្ងំសាងសុភមង្គលគ្រួសារអស់ប៉ុន្មានឆ្នាំចុងក្រោយ។ សុផា លីនដា ត្រូវបានគេមើលថា នាងបានផ្តឹបការងារសិល្បៈរបស់ខ្លួនស្ទើរទាំងស្រុង ក្នុងពេលដែលបានកំពុងជាប់ដៃមើលថែកូនស្រីរបស់នាងដែលទើបនឹងសម្រាលបានប្រមាណជិត៦ខែ។
ជាមួយនឹងការមើលកូនដំបូង និងការជាប់ដៃបើកហាងរកស៊ីជាមួយស្វាមីយ៉ាងមមាញឹកនោះ សុផា លីនដា នៅមិនទាន់ប្រាកដទេថា នាងអាចនឹងវិលរកការងារសិល្បៈវិញឬយ៉ាងណា?
ថ្លែងប្រាប់កោះសន្តិភាពតាមសារអេឡិចត្រូនិច សុផា លីនដា បានលើកឡើងថា បច្ចុប្បន្ននាងមិនច្បាស់ពីការវិលរកសិល្បៈវិញឡើយ ប៉ុន្តែនាងអាចនៅទទួលការថតតិចតួច ប្រសិនមានគេត្រូវការ។ នាងបញ្ជាក់ថា បើអោយចូលសិល្បៈពេញដៃដូចមុននោះគឺមិនអាចទេ ដោយសារនាងជាប់ដៃរកស៊ីជាមួយស្វាមី និងត្រូវមើលថែកូនដែលនៅតូចនៅឡើយ។
សុផា លីនដា បន្ថែមថា មួយរយៈចុងក្រោយនេះ នាងបានទម្លាក់ចូលការងារសិល្បៈច្រើន ដោយសារនាងមិនមានពេលគ្រប់គ្រាន់សម្រាប់ការងារនេះ។ ទោះជាយ៉ាងណា ក្រោយពេលដែលនាងសម្រាលកូនបានប្រមាណជាង១ខែនោះ នាងក៏មានការងារថតតិចតួចនៅផ្ទះផងដែរ។ នាងបញ្ជាក់ថា កន្លងមកនាងក៏មានអញ្ជើញអោយថតភាពយន្តដែរ តែនាងបានបដិសេធដោយសារនាងអត់មានពេលគ្រប់គ្រាន់ ព្រោះការថតភាពយន្ត គឺត្រូវចំណាយពេលយូរ។
នាងថា ជាធម្មតា នាងទទួលយកតែការដើរម៉ូត ថត MV ថតស្ពតពាណិជកម្មនានាប៉ុណ្ណោះ ចំណែកថតភាពយន្តវិញគឺមិនមានឡើយ។ យ៉ាងណា បើតាម សុផា លីនដា ថា សម្រាប់ការបន្តអាជីពសិល្បៈវិញ ឬមិនបន្តនោះ គឺអាស្រ័យលើការសម្រេចចិត្តរបស់នាងផ្ទាល់ ខណៈពេលស្វាមីរបស់នាងមិនមានការហាមឃាត់ចំពោះរឿងនេះឡើយ។
សុផា លីនដា បញ្ជាក់ថា ទៅថ្ងៃខាងមុខ នាងអាចនឹងទទួលការថតខ្លះៗឡើងវិញ ប្រសិនមានការហៅ និងនៅពេលកូនរាងធំ ហើយការងាររកស៊ីមានលំនឹងដោយស្វាមីរបស់នាងអាចមើលការខុសត្រូវបានដោយខ្លួនឯង។
គួររំលឹកថា តារាសម្តែង និងបង្ហាញម៉ូតនាង សុផា លីនដា បានភ្ជាប់និស្ស័យស្នេហ៍ជាមួយបុរសខ្មែរសញ្ញាតិអាមេរិកឈ្មោះ កាំង ប៊ុណ្ណា ហើយបានឈានដល់ការភ្ជាប់ពាក្យកាលពីថ្ងៃទី៦ ខែកញ្ញា ឆ្នាំ២០២០ និងបានរួមរស់ក្រោមដំបូលផ្ទះតែមួយ ដែលរហូតមកដល់ពេលនេះនាងទទួលបានចំណងដៃកូនស្រីម្នាក់ហើយ។ តារារូបនេះ ក៏ទើបតែបានចាប់ដៃស្វាមីអាណិកជនវ័យល្បាក់៣០ស្តើងខាងលើ ក្នុងការបើកភោជនីយដ្ឋានមួយក្នុងខណ្ឌចំការមន ដោយចំណាយទុនរួមគ្នារាប់ម៉ឺនដុល្លារ។
គូស្នេហ៍ សុផា លីនដា ក៏ត្រូវបានគេស្គាល់ថា ជាអ្នកជំនួញបានទៅរស់នៅ និងបន្តការសិក្សាឯរដ្ឋកាលីហ្វ័រនីញ៉ា សហរដ្ឋអាមេរិក តាំងពីកុមារភាព ហើយលោកបានត្រឡប់មកដាក់ទុនរកស៊ីនៅទឹកដីកំណើតកាលពីជាង២ឆ្នាំមុន និងមានបទពិសោធន៍លើអាជីវកម្មភោជនីយដ្ឋានក្នុងចំណោមមុខរបរជាច្រើនទៀតផងដែរ៕
ចែករំលែកព័តមាននេះ