រាជធានីភ្នំពេញ៖យោងតាមសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំនៅកម្ពុជាដែលចេញផ្សាយកាលពីល្ងាចថ្ងៃទី១៥ ខែកុម្ភៈ ឆ្នាំ២០១៥ បានឲ្យដឹងថានៅថ្ងៃទី១៧ ខែកុម្ភៈ ឆ្នាំ២០១៦
រាជធានីភ្នំពេញ៖យោងតាមសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំនៅកម្ពុជាដែលចេញផ្សាយកាលពីល្ងាចថ្ងៃទី១៥ ខែកុម្ភៈ ឆ្នាំ២០១៥ បានឲ្យដឹងថានៅថ្ងៃទី១៧ ខែកុម្ភៈ ឆ្នាំ២០១៦ នៅសណ្ឋាគារ ឡឺរ៉ូយ៉ាល់ភារៈធារីស្ថានទូតអូស្ត្រាលី លោក សាយម៉ុន ហ្វ៊ែលឡូវស៍និងលោកជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទនឹងរួមគ្នាបើកជាផ្លូវការនូវកម្មវិធីអាហាររូបករណ៍ ដើម្បីបន្តការសិក្សានៅប្រទេសអូស្ត្រាលីក្នុងឆ្នាំ ២០១៧។ស្ថានទូតបានលើកឡើងថាអាហាររូបករណ៍អូស្ត្រាលី គឺជាអាហាររូបករណ៍ ដែលមានកិត្យានុភាពលក្ខណៈអន្តរជាតិ ផ្តល់ដោយរដ្ឋាភិបាលអូស្ត្រាលី សម្រាប់អ្នកដឹកនាំពិភពលោកជំនាន់ក្រោយ។
លោក ហ្វ៊ែលឡូវស៍ មានប្រសាសន៍ថា៖ “ នេះគឺជាឱកាសដ៏ប្រពៃមួយ សម្រាប់ប្រជាជនកម្ពុជាដែលចង់ទៅសិក្សាថ្នាក់ក្រោយឧត្តម នៅសកលវិទ្យាល័យលំដាប់ថ្នាក់ពិភពលោក។ ខ្ញុំសូមលើកទឹកចិត្តដល់អ្នកដែលចាប់អារម្មណ៏ ឲ្យចូលរួមដាក់ពាក្យ ដើម្បីទទួលបានអាហាររូបករណ៍អូស្ត្រាលី។” សេចក្តីប្រកាសរបស់ស្ថានទូតដដែលបានលើកឡើងថា៖អាហាររូបករណ៍អូស្ត្រាលីសំរាប់ឆ្នាំ២០១៧ បើកទទួលពាក្យចាប់ពីពេលនេះរហូតដល់ ថ្ងៃទី៣០ ខែមេសា ឆ្នាំ២០១៦។
សូមអញ្ជើញបេក្ខជនដែលចង់សិក្សាលើគ្រប់ផ្នែកទាំងអស់ ចូលរួមដាក់ពាក្យ។ សេចក្តីប្រកាសព័ត៌មានរបស់ស្ថានទូតអូស្ត្រាលី បានបញ្ជាក់ថាយើងសូមលើកទឹកចិត្តជាពិសេស ដល់បេក្ខជនដែលចង់សិក្សាផ្នែកហេដ្ឋារចនាសម្ព័ន្ធ កសិកម្ម សុខាភិបាល គ្រប់គ្រងវិស័យអប់រំ ពាណិជ្ជកម្ម និងមុខវិជ្ជាទាំងឡាយណាដែលអាចចូលរួមកាត់បន្ថយអំពើហិង្សាលើស្ត្រី ចូលរួមដាក់ពាក្យសម្រាប់អាហាររូបករណ៍នេះ។ ស្ថានទូតបានលើកឡើងថានៅក្នុងកម្មវិធីនោះផងដែរ លោក ហ្វ៊ែលឡូវស៍ និង ឯកឧត្តម ជា សុផារ៉ា នឹងធ្វើការស្វាគមន៍នូវការវិលត្រលប់មកកាន់មាតុភូមិវិញ នៃនិស្សិតអាហាររូបករណ៍អូស្ត្រាលីចំនួន៥២រូប ដែលបានបញ្ចប់ការសិក្សាដោយជោគជ័យពីអូស្ត្រាលីកាលពីឆ្នាំ២០១៥។
សេចក្តីប្រកាសព័ត៌មានបានដកស្រង់សំដីលោកជាសុផារ៉ា មានប្រសាសន៍ថា៖ “ និស្សិតដែលបានបញ្ចប់ការសិក្សាហើយត្រលប់មកវិញនៅពេលនេះ បានពាំនាំមកជាមួយនូវគំនិតថ្មីៗ ព្រមទាំងចំណេះដឹង និងសមត្ថភាព ដើម្បីចូលរួមចំណែកយ៉ាងសំខាន់ក្នុងការអភិវឌ្ឍន៍ប្រទេសកម្ពុជា។ ” សេចក្តីប្រកាសព័ត៌មានបន្តថាកម្មវិធីអាហាររូបករណ៍អូស្ត្រាលី បើកទទួលពាក្យពីបេក្ខជនទាំងអស់ដែលមកពី ស្ថាប័នរដ្ឋ អង្គការមិនមែនរដ្ឋាភិបាលព្រមទាំងវិស័យឯកជនផងដែរ។
ស្ថានទូតបានលើកឡើងថារដ្ឋាភិបាលអូស្ត្រាលីបានប្តេជ្ញាចិត្ត ក្នុងការផ្តល់ឱកាសជូនដល់មនុស្សគ្រប់គ្នា ហើយយើងសូមលើកទឹកចិត្តជាពិសេសដល់ស្ត្រី ជនពិការ និងបេក្ខជនដែលមកពីតាមបណ្ដាលខេត្តនានា ក្នុងការដាក់ពាក្យ ។ស្ថានទូតបញ្ជាក់ថាព័ត៌មានបន្ថែមអំពីអាហាររូបករណ៍អូស្ត្រាលីសូមចូលទៅវេបសាយ www.australiaawards.gov.au ទំនាក់ទំនងព័ត៌មាន៖ លោកស្រី រូត ស្ទីវ៉ត អនុប្រធានបេសកកម្ម ស្ថានទូតអូស្ត្រាលីទូរស័ព្ទលេខ ០២៣ ២១៣ ៤៧០។
ចែករំលែកព័តមាននេះ