ខេត្តព្រៃវែង ៖ ដើម្បីបង្កា និងទប់ស្កាត់កុំឱ្យកើតមានបទល្មើសនៅក្នុងមូលដ្ឋាន ក៏ដូចជាបង្កើនភាពកក់ក្តៅដល់ប្រជាពលរដ្ឋផងនោះ កាលពីវេលាម៉ោង៦ល្ងាចថ្ងៃទី១៩ មករា កម្លាំងអធិការដ្ឋាននគរបាលស្រុកពាមរក៌ បានចេញធ្វើសកម្មភាពឆែកឆេរ និងត្រួតពិនិត្យស្វែងរកអាវុធជាតិផ្ទុះទៅលើក្រុមអ្នកដំណើរជាច្រើននាក់ ដែលជិះម៉ូតូឆ្លងកាត់ទឹកដីស្រុកពាមរក៌ ខេត្តព្រៃវែង ។
លោក សេង ពន្លក អធិការនគរបាលស្រុកពាមរក៌ បានឱ្យដឹងថា សកម្មភាពត្រួតពិនិត្យអាវុធជាតិផ្ទុះខាងលើនេះ ធ្វើឡើងក្នុងគោលដៅចំនួន២កន្លែងក្នុងពេលតែ១ គឺនៅលើកំណាត់ផ្លូវជាតិលេខ១១ ត្រង់ចំណុចផ្លូវកោងទួលជ្រៃ ក្នុងភូមិពន្លៃ ឃុំបាបោង១កន្លែង និងនៅលើកំណាត់ផ្លូវជាតិលេខ១ ត្រង់ចំណុចរង្វង់មូលត្រីកោណផ្លូវឡើងស្ពានអ្នកលឿង១កន្លែង ។
លោកអធិការបានបញ្ជាក់ថា នៅក្នុងប្រតិបត្តិការខាងលើនេះ កម្លាំងពិនិត្យនិងឆែកឆេររកឃើញអ្នកដំណើរម្នាក់មានកាំភ្លើងខ្លីម៉ាកកា៥៤មួយដើមនៅនឹងខ្លួន ប៉ុន្តែម្ចាស់កាំភ្លើងជាកងអង្គរក្ស មានលិខិតស្នាមត្រឹមត្រូវ ទើបអនុញ្ញាតឱ្យបន្តដំណើរទៅមុខទៀត ។ ក្រៅពីការឆែកឆេរ និងត្រួតពិនិត្យអាវុធជាតិផ្ទុះ កម្លាំងសមត្ថកិច្ចក៏បានធ្វើការអប់រំណែនាំដល់ក្រុមអ្នកដំណើរ ដែលមិនបានពាក់មួកការពារសុវត្ថិភាព និងមិនដាក់កញ្ចក់មើលក្រោយជាច្រើននាក់ផងដែរ តែមិនបានផាកពិន័យនោះទេ ។
គួរបញ្ជាក់ដែរថា ស្របពេលដែលកម្លាំងនគរបាលស្រុកពាមរក៌ ចុះត្រួតពិនិត្យអាវុធជាតិផ្ទុះនៅតាមដងផ្លូវនេះ នៅឯស្រុកព្រះស្តេច និងស្រុកពារាំងឯណោះវិញ កម្លាំងអធិការដ្ឋាននគរបាលស្រុកទាំង២ ក៏បានចេញត្រួតពិនិត្យអាវុធជាតិផ្ទុះ នៅតាមដងផ្លូវដូចគ្នាផងដែរ ដែលសកម្មភាពនេះបានធ្វើឱ្យប្រជាពលរដ្ឋ មានភាពរីករាយ និងសាទរជាខ្លាំង ព្រោះធ្វើឱ្យពួកគាត់មានភាពកក់ក្តៅ និងមិនព្រួយបារម្ភអំពីបញ្ហាសន្តិសុខតទៅទៀត ៕
ចែករំលែកព័តមាននេះ