មជ្ឈមណ្ឌលប្រតិបត្តិការរុករកយន្ដហោះ MH 370 បានប្រទះឃើញគ្រោងនាវាបុរាណ ក្នុងសតវត្សទី១៩ នៅបាតសមុទ្រឥណ្ឌា ជាការរកឃើញវត្ថុបុរាណ២ ចាប់តាំងពីការរុករកយន្ដយោះដឹកអ្នកដំណើរម៉ាឡេស៊ី អស់រយៈពេលជិត២ឆ្នាំមក ។
កាលពីថ្ងៃទី១៣ មករា ២០១៦ សារព័ត៌មានបរទេសបង្ហាញឱ្យដឹងពីការរុករកគ្រោងយន្ដហោះបូអីុញ ៧៧៧ របស់ក្រុមហ៊ុនអាកាសចរណ៍ «ម៉ាឡេស៊ីអ៊ែរឡាញ» ជើងហោះហើរ MH 370 ដែលបាត់បន្ទាប់ពីចាកចេញពីអាកាសយានដ្ឋានក្រុងគូឡាឡាំពួរ ឆ្ពោះទៅប៉េកាំង កាលពីខែមីនា ២០១៤ ថា ក្រុមអ្នករុករកប្រទះឃើញគ្រោងនាវាមួយគ្រឿងក្នុងសតវត្សទី១៩ នៅបាតសមទ្រឥណ្ឌា និងចាត់ទុកថាការរកឃើញគ្រោងនាវាបុរាណលើកទី២ ចាប់តាំងពីបើកយុទ្ធនាការរុករកជើងហោះហើរ MH 370 អស់រយៈពេលជិត២ឆ្នាំកន្លងមក ។
គ្រោងនាវាបុរាណនោះ សាងសង់ដោយដែក និងសន្និដ្ឋានថា លិចក្នុងសមុទ្រឥណ្ឌា តាំងពីសតវត្សទី១៩ និងចំណុចដែលប្រទះឃើញស្ថិតក្នុងជម្រៅពីផ្ទៃទឹកដល់ទៅ៣,៧គីឡូម៉ែត្រ ។
ក្រុមអ្នកស្រាវជ្រាវចម្រុះ (JACC) របស់អូស្ដ្រាលីនិយាយថា បុគ្គលិកសារមន្ទីរ «វ៉ែសស្ទើន» បានត្រួតពិនិត្យគ្រោងនាវាដោយប្រព័ន្ធSonar បញ្ជាក់ថា នាវាបុរាណនោះ ជានាវាផលិតពីដែលថែបឬដែកក្នុងយុគសម័យសតវត្សទី១៩ ។
កាលពីខែកក្កដា ២០១៥ បានប្រទះឃើញបំណែកស្លាបយន្ដហោះមានប្រវែង២ម៉ែត្រ ត្រូវទឹករលករសាត់អណ្ដែតទើរនៅលើឆ្នេរខ្សាច់កោះ «Runion» ក្នុងមហាសមុទ្រឥណ្ឌា និងលទ្ធផលត្រួតពិនិត្យបង្ហាញថា បំណែកស្លាបយន្ដហោះនោះជាស្លាបយន្ដហោះដឹកអ្នកដំណើរជើងហោះហើរ MH 370 ដែលបាត់ និងចាត់ទុកថាជាបំណែក MH 370 លើកដំបូងក្នុងដំណើរការរុករកអស់រយៈពេលជិត២ឆ្នាំ ៕
ចែករំលែកព័តមាននេះ