រាជធានីភ្នំពេញ ៖ បុរសជាអ្នកបំរើការផ្នែកប្រមូលសំរាមនៅក្នុងបរិវេណព្រះអង្គដងកើម្នាក់ ត្រូវបានក្រុមគ្រូពេទ្យរកឃើញមានវិជ្ជមានជំងឺកូវីដ១៩ ក្រោយពេលដែលសង្ស័យមានពាក់ព័ន្ធទៅ និងអ្នកជំងឺកូវីដ១៩ បំប្លែងខ្លួនថ្មី Delta បានធ្លាប់មកទីនេះ ហើយក្រុមគ្រូពេទ្យបានចុះមកយកសំណាកទៅលើតាអាចារ្យ អ្នកលក់ផ្កា និងសន្តិសុខទាំងអស់ សរុបចំនួន៥៣នាក់ ទើបអាជ្ញាធរខណ្ឌដូនពេញឈានទៅដល់ការបិទក្នុងរយៈពេល៤ថ្ងៃនេះ ដោយចាប់ពីល្ងាចថ្ងៃទី១៤ ខែសីហា ឆ្នាំ២០២១នេះតទៅ ។
លោក សុខ ពេញវុធ អភិបាលខណ្ឌដូនពេញ បានប្រាប់ឱ្យដឹងថា នាវេលាម៉ោង២រសៀល ថ្ងៃទី១៤ ខែសីហា ឆ្នាំ២០២១នេះដែរ ក្រុមគ្រូពេទ្យស្ម័គ្រចិត្តរបស់សម្តេចតេជោ (TYDA) បានធ្វើការសហការជាមួយ និងអាជ្ញាធរមូលដ្ឋានខណ្ឌដូនពេញរបស់លោក បានចុះយកសំណាករកវីរុសជំងឺកូវីដ១៩ ទៅលើក្រុមតាអាចារ្យ សន្តិសុខ អ្នកលក់ផ្កា និងអ្នកបំរើការងារនៅព្រះអង្គដងកើទាំងអស់សរុបចំនួន៥៣នាក់(បុរស៣៤នាក់ និងស្រី១៩នាក់)។
លោកក៏បានប្រាប់បន្តទៀតថា ក្នុងពេលយកសំណាកមនុស្សប្រុស ស្រីទាំង៥៣នាក់នោះដែរ ក្រុមគ្រូពេទ្យបានរកឃើញទៅលើបុរសម្នាក់មានវិជ្ជមានជំងឺកូវីដ ១៩ ដោយរូបគេមិនមែនជាអាចារ្យឡើយ ដែលគេគ្រាន់ជាអ្នកដើរប្រមូលសំរាមនៅបរិវេណជុំវិញព្រះអង្គដងកើ ដែលមានដូចជា ដូង ផ្កា ធូប ទៀន ឬក៏របស់របរផ្សេងៗទៀតដែលគេបោះចោលយកទៅដាក់នៅរថយន្តដឹកសំរាមពេលគេមកយកម្តងៗនោះ។
ពាក់ព័ន្ធទៅ និងការចុះមកយកសំណាកពីតាអាចារ្យ សន្តិសុខ អ្នកលក់ផ្កា និងអ្នកបំរើការនៅព្រះអង្គដងកើនេះ ដោយសារតែកាលពីពេលកន្លងមកនេះធ្លាប់មានអ្នកជំងឺកូវីដ១៩ បំប្លែងខ្លួនថ្មី Delta ធ្លាប់មកកាន់ទីនេះ ទើបបានក្រុមគ្រូពេទ្យបានចុះមកយកសំណាក និងរកឃើញអ្នកវិជ្ជមានជំងឺកូវីដ ១៩ម្នាក់នាពេលនេះ ។
ដោយខ្លាចក្រែងនូវការរីករាលដាលនូវជំងឺកូវីដ ១៩ ទៅដល់បងប្អូនប្រជាពលរដ្ឋអ្នកដែលមកធ្វើការគោរពបូជា និងបន់ស្រន់នៅព្រះអង្គដងកើនេះតទៅទៀតនោះទើបអាជ្ញាធរខណ្ឌដូនពេញរបស់លោកសម្រេចបិទមិនអោយចេញ ចូលរយៈពេល៤ថ្ងៃបែបនេះ ដោយចាប់ពីល្ងាចថ្ងៃទី ១៤នេះតទៅ ។
សូមបញ្ជាក់ ៖ យោងតាម អនុគណៈកម្មការស្រាវជ្រាវជំងឺកូវីដ១៩ បេសកកម្មនៅទីសក្ការៈ ព្រះអង្គដងកើ ត្រូវបានបិទបញ្ចប់ នៅល្ងាចថ្ងៃទី១៤ សីហា នេះ ដោយរកឃើញវិជ្ជមាន វីរុសកូវីដ-១៩ ចំនួន ១ ករណី ដែលជាលោកតាអាចារ្យ មានវ័យ៣៦ ឆ្នាំ ។ បេសកកម្ម នេះធ្វើឡើងក្រោយពីបានរកឃើញថា អ្នកវិជ្ជមាន វីរុសកូវីដ-១៩ បំប្លែងថ្មី #Delta បានទៅកាន់ទីតាំងខាងលើនេះ ។
សូមអំពាវនាវដល់ ប្រជាពលរដ្ឋ ដែលបានទៅទីសក្ការៈ ព្រះអង្គដងកើ ចាប់ពីថ្ងៃទី១ ដល់ថ្ងៃទី១៤ ខែសីហា ឆ្នាំ២០២១ សូមតាមដានសុខភាព និងទៅធ្វើតេស្ដប្រសិនបើសង្ស័យ នៅទីតាំងយកសំណាក ដែលនៅជិតបំផុត ៕
ចែករំលែកព័តមាននេះ