រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងសមហាផ្ទៃសម្រេចលុបឈ្មោះ គណបក្សនយោបាយចំនួនបី ដែលមិនធ្វើសកម្មភាពតាមច្បាប់កំណត់ ។…
រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងសមហាផ្ទៃសម្រេចលុបឈ្មោះ គណបក្សនយោបាយចំនួនបី ដែលមិនធ្វើសកម្មភាពតាមច្បាប់កំណត់ ។
យោងតាមសេចក្តីប្រកាសព័ត៌មានរបស់ក្រសួងមហាផ្ទៃដែលចុះហត្ថលេខាដោយសម្តេច ស ខេង កាលពីថ្ងៃទី៤ ខែសីហា ឆ្នាំ២០២១ បានឲ្យដឹងថា តាមសាលដីការបស់តុលាការកំពូល ក្រសួងមហាផ្ទៃបានសម្រេចលុបឈ្មោះគណបក្សនយោបាយ ចំនួន៣ ចេញពីបញ្ជីគណបក្សនយោបាយ រួមមាន ៖ គណបក្សសង្គមប្រជាធិបតេយ្យ ,គណបក្សវង្កតខេមរៈមហានគរ និងគណបក្សប្រជាធិបតេយ្យខ្មែរ ។
បើតាមការកត់ស្គាល់ការលុបឈ្មោះ គណបក្សនយោបាយនេះគេសង្កេតឃើញថា គណបក្សទាំងនេះមិនបានធ្វើសកម្មភាពដូចមានចែងក្នុងច្បាប់នោះទេ ។
ជាក់ស្តែង ការបោះឆ្នោតពេលកន្លងមកនេះ គេសង្កេតឃើញមានឈ្មោះគណបក្សនយោបាយទាំងនេះឈរឈ្មោះឲ្យប្រជាពលរដ្ឋបោះឆ្នោតឲ្យនោះទេ ។
យោងតាមសេចក្ដីប្រកាសរបស់ក្រសួងមហាផ្ទៃ នាថ្ងៃទី០៤ ខែសីហានេះ បានឲ្យដឹងថា អគ្គលេខាធិការនៃអគ្គលេខាធិការដ្ឋាន អគ្គនាយកនៃអគ្គនាយកដ្ឋានរដ្ឋបាល អគ្គស្នងការដ្ឋាននគរបាលជាតិ អគ្គនាយកដ្ឋានពាក់ព័ន្ធនានានៃក្រសួងមហាផ្ទៃ អភិបាលរាជធានី-ខេត្ត ប្រធាននាយកដ្ឋានកិច្ចការសមាគម និងគណបក្សនយោបាយ និងសាមីគណបក្សនយោបាយ ដូចមានឈ្មោះ ខាងលើត្រូវអនុវត្តប្រកាសនេះចាប់ពីថ្ងៃចុះហត្ថលេខាតទៅ ៕
ចែករំលែកព័តមាននេះ