អង្គការសហប្រជាជាតិបានចាត់ចំណាត់ថ្នាក់ប្រទេសន័រវេស ជាប្រទេសល្អបំផុតក្នុងការរស់នៅ និងជាឆ្នាំទី១២ជាប់គ្នា ។ កាលពីថ្ងៃទី១៤ ធ្នូ ២០១៥ អង្គការសហប្រជាជាតិបានបង្ហាញរបាយការណ៍ស្តីពីសន្ទុះនៃការអភិវឌ្ឍរបស់ពលរដ្ឋ(HDI) នៅក្នុងប្រទេសទាំង១៨៨ នៅទូទាំងពិភពលោកប្រចាំឆ្នាំ២០១៥ ដើម្បីរៀបចំចំណាត់ថ្នាក់ប្រទេសដែលល្អបំផុតនៅលើពិភពលោក ។ លទ្ធផលបង្ហាញថា ន័រវេសទទួលបានពិន្ទុខ្ពស់ដល់ទៅ០,៩៤៤ ហើយអាយុមធ្យមរបស់ពលរដ្ឋ៨១,៦ឆ្នាំ មានចំណូលមធ្យមក្នុងម្នាក់ដល់ទៅ៦៤.៩៩២ដុល្លារឯណោះក្នុងមួយឆ្នាំ ។
សម្រាប់ចំណាត់ថ្នាក់ពីទី២ទៅទី៥ រួមមានប្រទេសអូស្ត្រាលី ស្វ៊ីស ដាណឺម៉ាក និងហូឡង់។ ចំណែកប្រទេសដែលមាន HDI ទាបបំផុត គឺនីហ្សេរីយ៉ា អាហ្វ្រិកកណ្តាល អេរីត្រេ ឆាដ និងប៊ូរុនឌី ។
ចំណែកប្រទេសថៃស្ថិតនៅចំណាត់ថ្នាក់ទី៩៣ ដោយធ្លាក់ចុះកាលពីឆ្នាំមុនដល់ទៅ៤លំដាប់ថ្នាក់ និងពិន្ទុ HDI ស្មើនឹង០,៧២៦ អាយុមធ្យម៧៤,៤ឆ្នាំ និងចំណូលមធ្យមក្នុងម្នាក់១៣.៣២៣ដុល្លារ ទាបជាងន័រវេស ៤,៨៩ដង ។
ន័រវេស មានក្រឡាផ្ទៃ ៣៨៥.១៧៨គីឡូម៉ែត្រក្រឡា មានប្រជាជនប្រហែល៥,២លាននាក់ មានព្រះមហាក្សត្រហារ៉ាល់ទី៥ ជាប្រមុខ និងលោកស្រីអឺណា សូលប៊ើក ជានាយករដ្ឋមន្ត្រី ។ ន័រវេសជាទីតាំងប្រគល់ពានរង្វាន់ណូបែលសន្តិភាព ទោះបីជាប្រទេសតូចក៏ដោយ ប៉ុន្តែមាន អ្វីៗគួរឱ្យចាប់អារម្មណ៍ច្រើន ។ លើសពីនេះន័រវេស នៅមាន «មូលនិធិដ៏ស្តុកស្តម្ភ» បំផុតនៅលើពិភពលោក ប្រាក់ភាគច្រើនបានពីការលក់ប្រេង ចំណែកស្ថាប័នសិក្សាកម្រិតវិទ្យាល័យ ឬមហាវិទ្យាល័យភាគច្រើនជារបស់រដ្ឋទទួលប្រាក់ឧបត្ថម្ភពីរដ្ឋាភិបាល ដែលមាននយោបាយជួយដល់ពលរដ្ឋគ្រប់រូបចូលរៀនក្នុងថ្នាក់ឧត្តមសិក្សាដោយមិនបាច់បង់ប្រាក់ ។ សម្រាប់ប្រាក់ចំណូលមិនមែនជារឿងបិទបាំងអ្វីឡើយ ដោយប្រទេសនេះមានមន្ត្រីផ្នែកពន្ធគយបង្ហាញពីចំណូល និងស្ថានភាពទំហំទឹកប្រាក់របស់ប្រជាជនជារៀងរាល់ឆ្នាំ ។ ចំណែកអ្នកស្រឡាញ់ភេទដូចគ្នា មានសិទ្ធិជ្រើសរើសលក្ខណៈនៃការរស់នៅរបស់ខ្លួន ដោយឯករាជ្យ រៀបការរវាងអ្នកស្រឡាញ់ភេទដូចគ្នា គឺជារឿងស្របច្បាប់តាំងពីឆ្នាំ២០០៩ ៕
ចែករំលែកព័តមាននេះ