នៅទីបំផុតពេលវេលា ដែលរង់ចាំវេចបង្វិចហោះទៅតាមស្វាមីរបស់អ្នកនាង អ៊ុន អាលីហ្សា បានសម្រេចគោលដៅដូចបំណងហើយ ដោយបានរស់នៅជុំប្តីនៅលើដែនដីស៊ីវិល័យសហរដ្ឋអាមេរិក។ ហើយអ្នកណាៗក៏លើកសរសើរថា
រាជធានីភ្នំពេញ ៖ នៅទីបំផុតពេលវេលា ដែលរង់ចាំវេចបង្វិចហោះទៅតាមស្វាមីរបស់អ្នកនាង អ៊ុន អាលីហ្សា បានសម្រេចគោលដៅដូចបំណងហើយ ដោយបានរស់នៅជុំប្តីនៅលើដែនដីស៊ីវិល័យសហរដ្ឋអាមេរិក។ ហើយអ្នកណាៗក៏លើកសរសើរថា នាងពិតជាសុខសាន្ត ក្រោយពេលបាននៅជិតប្តីក្មេងរាងសង្ហា និងកូនស្រីជាចំណងដៃ។ មើលតែលើរូបភាពនាងបង្ហោះក៏ដឹងថា តើអាលីហ្សា កំពុងតែកក់ក្តៅយ៉ាងណា?
គេចាំបានថា អំឡុងពេល អាលីហ្សា រៀបការហើយបានមួយរយៈខ្លី ស្វាមីនាងហោះទៅអាមេរិកមុន ។ យូរៗបានមកលេងប្រពន្ធម្តង ហើយបានដំណក់ឈាមកូនស្រីម្នាក់។ តាំងពីនាងពពោះមក គឺអាលីហ្សា នៅឆ្ងាយពីប្តីដោយមានតែសាច់ញាតិក្នុងស្រុកជួយកំដររហូតឆ្លងទន្លេដោយសុវត្ថិភាព។ នាងត្រូវរង់ចាំបន្តទៀត ដោយសារតែបរិយាកាសជំងឺកូវីដ១៩ កំពុងវាយលុកគ្រប់ប្រទេស ទើបត្រូវពន្យាពេលទៅជួបជុំស្វាមីម្តងហើយម្តងទៀត។
ទើបតែប៉ុន្មានខែចុងក្រោយនេះ អាលីហ្សា ស្ងាត់ៗស្រាប់តែទៅដល់ដីអាមេរិកតាមដល់គោលដៅ ។ នាងបានពាំនាំកូនស្រីអោយប្តីពរប្រឡែងលេងរស់នៅជុំគ្នា លែងបែកឆ្ងាយដូចមុនទៀតហើយ។ ឯសិល្បៈវិញ ក៏ អាលីហ្សា លាឈប់ដើម្បីមើលថែគ្រួសារវិញម្តង។
គួររំលឹកថា អាលីហ្សា ធ្លាប់ហែលឆ្លងជីវិតសិល្បៈជាច្រើនឆ្នាំមកហើយដូចជា ធ្លាប់ជាតារាចម្រៀង តារាបង្ហាញម៉ូដ និងតារាសម្តែង។ នាងកាន់តែល្បីឈ្មោះ ក្រោយពេលក្លាយជាតួអង្គសម្តែង ដោយមានទេពកោសល្យល្អ ហើយក៏ធ្លាប់បានសម្តែងជាមួយតារាជើងចាស់ អម្ពរ ទេវី ផងដែរ។ ហើយនាងក៏ធ្លាប់ប្រាប់ដែរថា បើមានពេលមកលេងស្រុក និងចំណាយពេលលើសិល្បៈ ដើម្បីកុំអោយគេភ្លេចមុខ។
ចែករំលែកព័តមាននេះ