រាជធានីភ្នំពេញ ៖ រាជរដ្ឋាភិបាលបានកំណត់បើកយុទ្ធនាការចាក់វ៉ាក់សាំងបង្ការជំងឺកូវីដ១៩ចំពោះកុមារចាប់ពីអាយុ១២ឆ្នាំ ដល់ក្រោម១៨ឆ្នាំ នៅរាជធានីភ្នំពេញ និងខេត្តចំនួន៣ផ្សេងទៀត ចាប់ពីថ្ងៃទី១ ខែសីហា ឆ្នាំ២០២១ ។ នេះបើតាមក្រសួងសុខាភិបាលកម្ពុជា ។
យោងតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី២៧ ខែកក្កដានេះ បានដាក់ចេញផែនការចាក់វ៉ាក់សាំងបង្ការជំងឺកូវីដ១៩ «ស៊ីណូវ៉ាក់»ដល់កុមារចាប់ពីអាយុ១២ឆ្នាំ ដល់ក្រោម១៨ឆ្នាំថា ដោយអនុវត្តនូវ«យុទ្ធសាស្ត្រផ្ការីក» របស់សម្តេចតេជោ ហ៊ុនសែន នាយករដ្ឋមន្ត្រីការចាប់វ៉ាក់សាំងចាប់ផ្តើមចេញពីរាជធានីភ្នំពេញ ចាប់ពីថ្ងៃទី១ ខែសីហា ឆ្នាំ២០២១តទៅ ។
ក្រសួងបញ្ជាក់បញ្ជាក់ថា «យុទ្ធនាការចាក់វ៉ាក់សាំងកូវីដ១៩ ជូនកុមារ និងយុវជនមានអាយុចាប់ពី១២ ដល់ក្រោម១៨ឆ្នាំនឹងចាប់ផ្តើមបើកចេញពីរាជធានីភ្នំពេញ និងបន្តបន្ទាប់នៅខេត្តកណ្តាល ខេត្តព្រះសីហនុ និងខេត្តកោះកុង» ។
ក្រសួងសុខាភិបាលបានលើកឡើងទៀតថា ការបើកយុទ្ធនាការចាក់វ៉ាក់សាំងដល់កុមារ និងយុវជនដែលកំណត់នេះជាកូនចៅឥស្សរជន ដែលមានតួនាទីជាឧបកនាយករដ្ឋមន្ត្រី ឬមានឋានៈស្មើ រហូតដល់មន្ត្រីរាជការ និងមន្ត្រីជាប់កិច្ចសន្យាបម្រើការនៅថ្នាក់ជាតិ កូនចៅឧញ៉ា និងកូនចៅមន្ត្រីការទូត មន្ត្រីអង្កការសហប្រជាជាតិ តំណាងហិរញ្ញវត្ថុអន្តរជាតិ អង្គការអន្តរជាតិ អង្គការក្រៅរដ្ឋាភិបាល និងកូនចៅអ្នកសារព័ត៌មានត្រូវបានរៀបចំនៅមន្ទីរពេទ្យ ដែលក្រសួងបានកំណត់ ។
ក្រសួងបានឲ្យដឹងថា ការចាក់វ៉ាក់សាំងជូនកុមារ ចាប់ពីអាយុ១២ដល់ ក្រោម១៨ឆ្នាំនេះការចាក់ដូសទី១ ទៅដូសទី២ មានរយៈពេល២១ថ្ងៃ ។ ហើយអ្នកដែលបានចាក់ដូសទី១ ត្រូវទៅចាក់ដូសទីនៅកន្លែងដូសទី១ដដែល (រាជធានីភ្នំពេញ) ។
ទាក់ទិននឹងការចាក់វ៉ាក់សាំងនៅខេត្តកណ្តាល ខេត្តព្រះសីហនុ និងខេត្តកោះកុង ក្រសួងសុខាភិបាលបានឲ្យដឹងថា នឹងត្រូវរៀបចំចាត់ចែងដោយរដ្ឋបាលខេត្តទាំង៣នេះ ដូច្នេះសូមសាធារណៈជនដែលមានកូនចៅរស់នៅក្នុងខេត្តទាំងនេះ រងចាំសេចក្តីជូនដំណឹងរបស់រដ្ឋបាលខេត្តនូវទីតាំង និងកាលបរិច្ឆេទនៃការបើកយុទ្ធនាការចាក់វ៉ាក់សាំងនេះ ។
ជាមួយគ្នានោះដែរ ក្រសួងសុខាភិបាលក៏បានអំពាវនាវដល់មាតា បិតា អាណាព្យាបាល បងប្អូន ព្រមទាំងកុមារដែលមានអាយុ និងយុវវ័យចាប់ពី១២ឆ្នាំ ដល់ក្រោម១៨ឆ្នាំ នាំកូនចៅ ចៅទូត ក្មួយៗ ទៅចាក់វ៉ាក់សាំងកូវីដ១៩ ដោយស្ម័គ្រចិត្ត និងឥតគិតថ្លៃនៅពេលដល់វេន និងមេត្តាអត់ធ្មត់រង់ចាំនៅពេលមិនទាន់ដល់វេន ៕
ចែករំលែកព័តមាននេះ