ទីក្រុងហាណូយ៖ នាយករដ្ឋមន្ត្រីវៀតណាម លោកផាំមិញជិញ បានធ្វើលិខិតបណ្ដាំមួយទុកឱ្យហើយនៅពេលលោកស្លាប់ទៅថ្ងៃណាមួយព្រោះសង្ខាររបស់មនុស្សមិនទៀងទេ។ នៅពេលលោកស្លាប់ទៅ, លោកស្ម័គ្រចិត្តបរិច្ចាគសរីរៈរាង និងជាលិកាដទៃទៀតនៅលើសរីរៈរាងកាយរបស់លោកដែលអាចប្រើការបានទុកសម្រាប់អ្នកជំងឺដែលត្រូវការជាបន្ទាន់។
លោកក៏បានអំពាវនាវឱ្យប្រជាជនវៀតណាមគ្រប់រូបសូមធ្វើសេចក្ដីល្អចំពោះអ្នកដទៃទៀតដោយការបរិច្ចាគសរីរៈរាងរបស់ខ្លួននៅពេលចែកឋានទៅកាន់លោកខាងមុខ។ លោកផាំមិញជិញមានប្រសាសន៍ថាការបរិច្ចាគសរីរៈរាង និងជាលិការបស់មនុស្សទៅឱ្យអ្នកដទៃគឺជាការវិភាគទានដ៏ថ្លៃថ្លាផុតដែលបុគ្គលគ្រប់រូបគួរតែធ្វើ។ ដូច្នេះ លោកគ្មានអ្វីក្រៅពីលើកម្រាមដៃដប់ស្នើសុំយ៉ាងទទូចឱ្យបងប្អូនប្រជាជនខិតខំបរិច្ចាគសរីរៈរាងរបស់ខ្លួនទៅអ្នកជំងឺដែលគ្នាក៏ចង់រស់ដូចតែពួកយើងដែរ។
ការអំពាវនាវរបស់នេះឡើងនៅពេលវៀតណាមដើរថយក្រោយគេខ្លាំងមែនទែននៅក្នុងការបរិច្ចាគសរីរៈរាងរបស់មនុស្ស។ សូមញែកឱ្យដាច់ពីគ្នារវាងការបរិច្ចាគដោយសុទ្ធចិត្តតាមគោលការណ៍មនុស្សធម៌។ មួយទៀតគឺការឱ្យគ្រូពេទ្យវះកាត់សរីរៈរាងខ្លួនឯងដើម្បីជាថ្នូរនឹងលុយ។ អ្នកខ្លះដោយសារជីវភាពខ្លះខាត ម៉្លោះហើយគ្នាសុខចិត្តលក់សរីរៈរាងខ្លះ។ ឧទាហរណ៍ លក់តម្រងនោមមួយចំហៀង។ នេះជាមិនមែនជាអ្វីដែលនាយករដ្ឋមន្ត្រីវៀតណាមកំពុងតែអំពាវនាវនោះទេ។
ម៉្យាងទៀត លោកក៏មិនបានលើកទឹកចិត្តឱ្យមនុស្សដែលនៅរស់ជ្រងោៗលះបង់សរីរៈរាងរបស់ខ្លួនឯងទៅអ្នកដទៃនោះដែរ។ បើធ្វើដូច្នេះតើខ្លួនឯងបានអ្វីសម្រាប់បន្តជីវិតរស់នៅ? យុទ្ធនាការដែលលោកផាំមិញជិញកំពុងតែដំណើរការនេះសំដៅលើការបរិច្ចាគសរីរៈរាងកាយ និងជាលិការបស់មនុស្សដែលស្លាប់ទៅហើយ។ ពួកគាត់អាចធ្វើលិខិតបណ្ដាំទុកឱ្យហើយ ហើយមានមេធាវី, ក្រុមអ្នកច្បាប់ និងអាជ្ញាធរផ្ដិតមេដៃ និងចុះហត្ថលេខាទទួលដឹងឮទាំងអស់គ្នាដើម្បីជៀសវាងការប្រទាំងប្រទើសគ្នា។ បើមិនដូច្នេះទេ នៅពេលបុគ្គលដែលចង់បរិច្ចាគនោះទទួលអនិច្ចកម្មទៅ, កូនចៅរបស់គេអាចនឹងមិនសុខចិត្ត។
សព្វថ្ងៃនេះ វៀតណាមដើរក្រោយគេឆ្ងាយណាស់ខាងការផ្លាស់ប្ដូរសរីរៈរាង និងជាលិកា។ ពោលគឺដើរក្រោយគេ៥០ឆ្នាំបើគិតទូទាំងពិភពលោក និងដើរក្រោយគេម្ភៃឆ្នាំបើគិតនៅក្នុងក្របខណ្ឌតំបន់។ និយាយនេះនិយាយនៅក្នុងចំណោមសរីរៈរាងកាយជារួម។ ប៉ុន្តែលោកផាំមិញជិញថ្លែងថាសរីរៈរាងខ្លះក៏វៀតណាមប្រហាក់ប្រហែលនឹងប្រទេសភាគច្រើនផងដែរ។
លោកថែមទាំងថ្លែងដោយមោទកភាពថាក្រោយពេលអ្នកជំងឺវះកាត់ដូរសរីរៈរាងរួចហើយ, ពួកគេមានអត្រារស់រានមានជីវិត។ លោកថាប្រទេសអ្នកមានមួយចំនួននៅចាញ់វៀតណាមនៅឡើយទេលើផ្នែកនេះ។ ម៉្យាងទៀត តម្លៃដូរសរីរៈរាងនៅវៀតណាមក៏ធូរថ្លៃជាងប្រទេសដទៃទៀតឆ្ងាយណាស់ដែរ។ មានន័យថាវៀតណាមមានចំណុចល្អទាំងគុណភាព និងតម្លៃ។
ចាប់តាំងពីការដូរសរីរៈរាងរបស់មនុស្សដំបូងដោយជោគជ័យកាលពី៣០ឆ្នាំមុន វៀតណាមបន្តដុសខាត់ជំនាញរបស់ខ្លួនកាន់តែប្រសើរ។ ករណីដែលអ្នកជំងឺដូរសរីរៈរាងច្រើនក្នុងពេលតែ១ក៏វៀតណាមអាចធ្វើបានដែរ។ ចាប់តាំងពីគ្រូពេទ្យវៀតណាមដូរតម្រងនោមទី១ជូនអ្នកជំងឺកាលពីឆ្នាំ១៩៩២រហូតមកដល់ពេលនេះ មនុស្សដូរសរីរៈរាងក្នុងជាង៨៦០០ករណី។
ក្នុងនោះ អ្នកដូរតម្រងនោមមានច្រើនជាងគេរហូតដល់ជាង៧៩០០ករណី។ បន្ទាប់មក ដូរថ្លើមជាង៥៩០ករណី។ ក្រៅពីនេះដូរបេះដូង សួត និងសរីរៈរាងដទៃទៀត។ សព្វថ្ងៃនេះអ្នកបរិច្ចាគសរីរៈរាងនៅវៀតណាមមានរាប់ពាន់នាក់។ សំដៅលើបរិច្ចាគនៅពេលមានជីវិត។ ចំណែកអ្នកធ្វើលិខិតបណ្ដាំបរិច្ចាគសរីរៈរាងក្រោយពេលស្លាប់មានជាង៨៦០០០នាក់។ អត្រានេះទាបបំផុតបើប្រៀបធៀបជាមួយប្រទេសដទៃទៀត។ មូលហេតុដោយសារជនជាតិវៀតណាមមានជំនឿថាអ្នកដែលជិតស្លាប់គួរណាស់ចំណាយដង្ហើមចុងក្រោយនៅក្បែរសាច់ញាតិរបស់ខ្លួន, មិនគួរនៅក្នុងមន្ទីរពេទ្យដើម្បីបរិច្ចាគសរីរៈរាងរបស់គាត់ឡើយ។
គោលនយោបាយរបស់រដ្ឋាភិបាលវៀតណាមស្ដីពីការដូរសរីរៈរាងរបស់មនុស្សក៏នៅមានកំណត់។ វៀតណាមខ្វះខាតបុគ្គលិកជំនាញខាងដូរសរីរៈរាង។ ឧបករណ៍វះកាត់ និងគ្រឿងបរិក្ខារសម្រាប់ជួយសម្រួលផ្នែកនេះក៏ខ្វះខាតផងដែរ។ សម្រាប់ពេលបច្ចុប្បន្ននេះ ក្រសួងសុខាភិបាលផ្ដល់អាជ្ញាប័ណ្ណឱ្យមន្ទីរពេទ្យចំនួន២៦កន្លែងដើម្បីមានសិទ្ធិដូរសរីរៈរាងរបស់មនុស្ស៕
ចែករំលែកព័តមាននេះ