រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានខឹងក្រោធយ៉ាងខ្លាំង បន្ទាប់ពីប្រពន្ធប្រាប់ថា ក្មេងប្រុសជំទង់ម្នាក់យកកញ្ច្រែងជ័រវាយក្បាល លុះបាន១ថ្ងៃក្រោយមក បុរសរូបនេះក៏បានទៅសួរនាំក្មេងប្រុសខាងលើ ពីមូលហេតុដែលវាយក្បាលប្រពន្ធខ្លួន រហូតទាស់ពាក្យសម្ដីនឹងគ្នា ហើយក្មេងប្រុសរងគ្រោះក៏បានវាយទៅលើបុរសរូបនេះ បណ្ដាលឲ្យរងរបួសដៃ ធ្វើឱ្យបុរសរូបនេះទប់កំហឹងពុំបាន ក៏បានយកកាំបិតកា.ប់ទៅលើក្មេងប្រុសនោះពីក្រោយចំបោះដៃផុត បណ្ដាលឲ្យរងរបួស និងត្រូវបានក្រុមកម្មកររួមក្រុមការងារនាំទៅកាន់មន្ទីរពេទ្យភ្លាមៗ បង្កឱ្យមានការភ្ញាក់ផ្អើលកាលពីម៉ោង០៦និង៣០នាទីព្រឹក ថ្ងៃទី២៦ ខែកក្កដា ឆ្នាំ២០២១ នៅចំណុចសិប្បកម្មផលិតប្រហិតមួយកន្លែង ស្ថិតក្នុងភូមិត្រពាំងទា សង្កាត់ពងទឹក ខណ្ឌដង្កោ រាជធានីភ្នំពេញ។
បើតាមនគរបាលខណ្ឌដង្កោ បានឲ្យដឹងថា ក្មេងប្រុសរងគ្រោះខាងលើឈ្មោះ ស្រ៊ឺ ម៉េងហៀង អាយុ១៧ឆ្នាំ ជាជនជាតិខ្មែរ មុខរបរកម្មករសិប្បកម្មប្រហិត និងស្នាក់នៅក្នុងសិប្បកម្ម បានរងរបួសដេរចំនួន៤ថ្នេរ ចំណែកបុរសដែលកា.ប់ក្មេងប្រុសរូបនេះ មានឈ្មោះ លី ហុង អាយុ២៧ឆ្នាំ ជាជនជាតិខ្មែរ មុខរបរកម្មករសិប្បកម្មប្រហិតជាមួយគ្នា និងស្នាក់នៅក្នុងសិប្បកម្មនោះដែរ ហើយនគរបាលក៏បានដកហូតកាំបិតចិតបន្លែទំហំ៣ធ្នាប់ដៃ ដែលមានប្រវែង៣០សង់ទីម៉ែត្រ ចំនួន០១ដើម ។
ប្រភពដដែលបានឲ្យដឹងបន្តទៀតថា មុនពេលកើតហេតុ នៅវេលាម៉ោង២និង៣០នាទីរសៀល ថ្ងៃទី២៥ ខែកក្កដា ឆ្នាំ២០២១ ក្មេងប្រុសរងគ្រោះរូបនេះ បានមានទំនាស់គ្នាជាមួយស្ត្រីជាប្រពន្ធរបស់បុរសដែលកា.ប់ក្មេងប្រុសនោះ និងបានយកកញ្ច្រែងជ័រទៅវាយក្បាលស្ត្រីរូបនោះទៀត ។
ប្រភពដដែលបន្តថា បន្ទាប់មកស្ត្រីរូបនោះក៏បានយករឿងនេះទៅប្រាប់បុរសជាប្តីឱ្យបានដឹង លុះ១ថ្ងៃបន្ទាប់មក គឺនៅថ្ងៃកើតហេតុខាងលើ បុរសជាប្តីរូបនោះក៏បានដាក់កាំបិតជា.ប់ខ្លួន ហើយបានដើរទៅសួរនាំក្មេងប្រុសរងគ្រោះ រហូរទាស់ពាក្យសម្ដីនឹងគ្នាកើតឡើងតែម្តង។
ប្រភពដដែលខាងលើបានបន្តទៀតថា ខណៈពេលនោះ បុរសរូបនេះក៏បានច្រានទ្រូងក្មេងប្រុសរងគ្រោះនោះឲ្យដើរចេញ ហើយក៏ត្រូវបានក្មេងប្រុសនោះយកកញ្ច្រែងដែកមកវាយទៅតបតជាមួយបុរសរូបនេះ រហូតធ្វើឱ្យត្រូវចំកំភួនដៃខាងឆ្វេងរបស់បុរសរូបនេះ បណ្ដាលឲ្យរងរបួសហើមជាំ ទើបបុរសធ្វើឱ្យបុរសរូបនេះ ខឹងក៏ដកកាំបិតកា.ប់ទៅលើក្មេងប្រុសជំទង់ខាងលើពីក្រោយចំបោះដៃផុត បណ្ដាលឲ្យរងរបួសតែម្ដង។
ក្រោយពេលកើតហេតុ ក្រុមកម្មកររួមការងារក៏បាននាំក្មេងប្រុសរងគ្រោះទៅព្យាបាលនៅគ្លីនិកឯកជនក្នុងភូមិកើតហេតុខាងលើ បន្ទាប់មកនគរបាលប៉ុស្តិ៍ព្រៃវែង ក៏បានចុះទៅអន្តរាគមន៍ រួចឃាត់ខ្លួនបុរសដែលកា.ប់ក្មេងប្រុសខាងលើនោះ នាំយកទៅសាកសួរ និងចាត់ការតាមច្បាប់តែម្តង៕
ចែករំលែកព័តមាននេះ