ខេត្តកំពង់ឆ្នាំង ៖ បុរសម្នាក់បានចាក់សាំងដុតខ្លួនឯង បណ្ដាលឲ្យរងរបួសជាទម្ងន់និងបង្កឱ្យមានការភ្ញាក់ផ្អើលនៅវេលាម៉ោង ០១រសៀល ថ្ងៃទី២២ កក្កដា ស្ថិតនៅចំណុចបេនរ៉ឺម៉ក ផ្សារលើស្ថិតនៅក្នុងភូមិទី១ សង្កាត់ខ្សាម ក្រុងកំពង់ឆ្នាំង ។
តាមការបញ្ជាក់ពីសមត្ថកិច្ចមូលដ្ឋានបានឲ្យដឹងថា៖ បុរសខាងលើ មានឈ្មោះហិន ហេន អាយុ៤២ឆ្នាំ មានមុខរបរមិនពិតប្រាកដ មានទីលំនៅភូមិទី១ សង្កាត់ខ្សាម ក្រុងកំពង់ឆ្នាំង។ ប្រភពដដែលបានស្រង់សម្ដីអ្នកដែលបានឃើញហេតុការណ៍ឲ្យដឹងថា មុនពេលកើតហេតុ គេឃើញបុរសឈ្មោះហុន ហេន បានទៅទិញសាំង១ដបចំណុះកន្លះលីត្រ ហើយចាក់ស្រោចពីលើក្បាល រួចយកដែកកេះដុតខ្លួនឯងតែម្ដង បណ្ដាលឆេះខ្លួនឡើងសន្ឋោរសន្ឋៅ និងបង្ករអោយមានការភ្ញាក់ផ្អើល ដោយគ្មាននរណាជួយទាន់ឡើយ ។
ជាមួយគ្នានេះ ប្រជាពលរដ្ឋក៏បានយកទឹក នឹងយកបំពង់ពន្លត់អគ្គីភ័យ មកជួយបាញ់ពន្លត់ តែយ៉ាងណា បុរសរូបនោះបានរងរបួសធ្ងន់ធ្ងរ ។ សមត្ថកិច្ចមូលដ្ឋាន បានហៅរថយន្តសង្គ្រោះរបស់មន្ទីរពេទ្យ ដឹកបុរសរូបនោះ ទៅព្យាបាល សង្គ្រោះនៅមន្ទីរពេទ្យខេត្តកំពង់ឆ្នាំង ។ តាមការបញ្ជាក់ពីសមត្ថកិច្ចមូលដ្ឋានដដែលបានឱ្យដឹងថា បុរសខាងលើជាមនុស្សប្រមឹក គឺផឹកឡើងខូចសតិទៅហើយ ចំណែកការដុតខ្លួននេះគឺដោយសារតែស្រវឹងជោកជាំផងដែរ៕
ចែករំលែកព័តមាននេះ