រាជធានីភ្នំពេញ ៖ អាជ្ញាធររាជធានីភ្នំពេញបានបញ្ជាក់ឱ្យដឹងនៅថ្ងៃទី១៥ ខែកក្កដា ឆ្នាំ២០២១ នេះថា បើទោះបីជារកឃើញមានការផ្ទុះកូវីដ-១៩ នៅផ្សារច្បារអំពៅក្តី តែអត្រានែការឆ្លងគឺមានកម្រិតទាប និងអាចគ្រប់គ្រងបាន…
រាជធានីភ្នំពេញ ៖ អាជ្ញាធររាជធានីភ្នំពេញបានបញ្ជាក់ឱ្យដឹងនៅថ្ងៃទី១៥ ខែកក្កដា ឆ្នាំ២០២១ នេះថា បើទោះបីជារកឃើញមានការផ្ទុះកូវីដ-១៩ នៅផ្សារច្បារអំពៅក្តី តែអត្រានែការឆ្លងគឺមានកម្រិតទាប និងអាចគ្រប់គ្រងបាន ដូច្នេះសម្រេចថា មិនមានការបិទផ្សារច្បារអំពៅនោះទេ។
លោក កើត ឆែ អភិបាលរងរាជធានីភ្នំពេញបានថ្លែងប្រាប់កោះសន្តិភាពយ៉ាងខ្លីថា មិនមានការបិទផ្សារច្បារអំពៅនោះទេ ព្រោះការរកឃើញឆ្លងមានកម្រិតប្រមាណតែ៥ ភាគរយ គឺក្រោម ១០ភាគរយនៃចំនួនអាជីវករ សន្តិសុខសរុប ។
ជាមួយគ្នានោះផងដែរ ទាក់ទិននឹងការធ្វើសំណាក លើអាជីវករផ្សារច្បារអំពៅ គឺបានបិទបញ្ចប់ហើយ ត្រឹមថ្ងៃម្សិលមិញ ។ ការធ្វើតេស្តលើអាជីវករ សន្តិសុខផ្សារ និងអ្នកនៅជុំវិញផ្សារ រយៈពេល ៣ថ្ងៃ នៃការតេស្តសំណាកមកនេះ មានវិជ្ជមានអាជីវករលក់ដូរក្នុង និងក្រៅផ្សារ ៣៤នាក់ និងសន្តិសុខផ្សារ ៦នាក់ សរុប គឺ៤០នាក់ ។ ដូច្នេះវាជា តួចលេខ នៅតិចជាង១០ភាគរយ ដែលមិនតម្រូវឱ្យមានការបិទផ្សារនោះទេ ។
លោកគ្រី ហ៊ុច អនុប្រធានគណះកម្មការគ្រប់គ្រងផ្សារច្បារអំពៅបានថ្លែងឱ្យដឹងផងដែរថា តេស្តិ៍សំណាករយៈពេល ៣ ថ្ងៃលើអាជីវករផ្សារ សរុបចំនួន ៩៣០ នាក់ (ក្នុងនោះប្រមាណជាង ៥០០នាក់ជាអាជីវករលក់ដូរក្នុងនិងក្រៅផ្សារ) ចំណែកតួលេខសេសសល់ គឺជាអ្នកដែលពាក់ព័ន្ធនិងសាច់ញាតិរបស់អាជីវករផ្សារច្បារអំពៅ ។
សូមបញ្ជាក់ ៖ កាលពីម្សិលមិញ អភិបាលរងរាជធានីភ្នំពេញ លោក កើត ឆែ បានឲ្យកោះសន្តិភាពដឹងថា ផ្សារច្បារអំពៅ អាចបិទបណ្តោះអាសន្ន ប៉ុន្តែត្រូវរង់ចាំលទ្ធផលថ្ងៃល្ងាចនេះសិន ។ ការលើកឡើងរបស់លោក កើត ឆែ ធ្វើឡើងក្រោយពីមានករណីផ្ទុះឡើងនូវកូវីដ-១៩ នៅផ្សារច្បារអំពៅ នៅព្រឹកថ្ងៃទី ១៥ ខែកក្កដា នេះ ។
តាមការអោយដឹងពីលោក ញាណ ច័ន្ទសោភា នាយករដ្ឋបាលសាលាខណ្ឌច្បារអំពៅ គិតត្រឹមវេលាម៉ោង១៦ និង៣០នាទីល្ងាចថ្ងៃទី១៥ ខែកកក្កដានេះ លទ្ធផលសំណាកលើអាជីវករផ្សារច្បារអំពៅ ពិនិត្យឃើញវិជ្ជមាន២១នាក់ ។ ហើយដំណើរការ នៃការបន្តតេស្តនៅប្រព្រឹត្តិទៅដដែល នៅក្នុងបរិវេណសាលាបឋមសិក្សាច្បារអំពៅ ដោយមិនទាន់ចប់ឡើយ ខណៈបងប្អូនអាជីវករ និងអ្នកពាក់ព័ន្ធមកជាបន្តបន្ទាប់ ៕
ចែករំលែកព័តមាននេះ