ចៅក្រមសម្រេចឃុំខ្លួន លោក រ័ត្ន សណ្តាប់ ពីបទរំលោ.ភទំនុកចិត្ត និងបរិហាកេរ្តិ៍
រាជធានីភ្នំពេញ ៖ លោក រ័ត្ន សណ្តាប់ ដែលគេស្គាល់ថា ជាអ្នកជំនាញស្រាវជ្រាវផ្នែកវប្បធម៌ អរិយធម៌ខ្មែរ និងកីឡា ត្រូវសមត្ថកិច្ចឃាត់ខ្លួន…
រាជធានីភ្នំពេញ ៖ លោក រ័ត្ន សណ្តាប់ ដែលគេស្គាល់ថា ជាអ្នកជំនាញស្រាវជ្រាវផ្នែកវប្បធម៌ អរិយធម៌ខ្មែរ និងកីឡា ត្រូវសមត្ថកិច្ចឃាត់ខ្លួន បញ្ជូនមកកាន់សាលាដំបូងរាជធានីភ្នំពេញ នៅថ្ងៃទី១២ ខែកក្កដា ឆ្នាំ២០២១នេះ តាមពាក្យបណ្ដឹងរបស់ស្ត្រីពាណិជ្ជករម្នាក់ ប្តឹងពីបទរំលោ.ភលើទំនុកចិត្ត ជេរប្រមាថ និងបរិហាកេរ្តិ៍ជាសាធារណៈ ។
សេចក្តីរាយការឲ្យដឹងថា លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃដដែល បានសម្រេចចេញដីកាឃុំខ្លួន ជនជាប់សង្ស័យម្នាក់ ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ រំលោភលើទំនុកចិត្ត និងបទបរិហាកេរ្ត៍ ។
ជនជាប់សង្ស័យមានឈ្មោះ រ័ត្ន សណ្តាប់ ភេទប្រុស អាយុ៤៨ឆ្នាំ មុខរបរ ជាសមាជិកក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។
ការសម្រេចឃុំខ្លួនជនសង្ស័យរូបនោះ គឺបន្ទាប់ពីលោក ម៉ុត ដារ៉ា ព្រះរាជអាជ្ញារង និងជាតំណាងអយ្យការអមសាលាដំបូងរាជធានីភ្នំពេញ បញ្ចប់លើការសាកសួរ នឹងចោទប្រកាន់ជាផ្លូវការ ក្នុងសំណុំរឿងទាំងពីរនេះ ។
លោក រ័ត្ន សណ្តាប់ បានរងបណ្តឹងព្រហ្មទណ្ឌចំនួនពីរបទល្មើស ៖ បទរំលោ.ភលើទំនុកចិត្ត ជេរប្រមាថ និងបទបរិហាកេរ្តិ៍ជាសាធារណៈ តាមបណ្តឹងរបស់ពាណិជ្ជករមួយរូប ។
ដើមបណ្តឹងបានប្រាប់អ្នកសារព័ត៌មានថា លោក រ័ត្ន សណ្ដាប់ បានប្រើឋានៈ ជាទីប្រឹក្សា ទីស្តីការគណៈ រដ្ឋមន្ត្រី (ឋានៈស្មើអនុរដ្ឋលេខាធិការ) មកធ្វើជាជំនួយការផ្នែកច្បាប់ ដោះស្រាយវិវាទដីធ្លី របស់ដើមបណ្តឹងនៅឃុំកែវផុស ស្រុកព្រៃនប់ រយៈពេលជាង៣ឆ្នាំកន្លងមក ។ នៅកំឡុងពេលនោះ ដោយមានសេចក្តីទុកចិត្ត លើរូបលោក ដើម្បីសម្រេចបានលទ្ធផលផ្លែផ្កាផងនោះ ដើមបណ្តឹងក៏បានផ្តល់នូវថវិកាជាបន្តបន្ទាប់ និងព្រមទាំងអត្ថប្រយោជន៍ផ្សេងៗទៀត ដោយជឿជាក់ថា អាចជួយដោះស្រាយបញ្ហាដីធ្លី ដែលត្រូវបានប្រជាពលរដ្ឋមកតាំងទីលំនៅ ដោយខុសច្បាប់នៅលើដីរបស់ដើមបណ្តឹង នៅឃុំកែវផុស ស្រុកព្រៃនប់នោះបាន ។ ដើមបណ្តឹងក៏បានផ្តល់ថវិកាជាច្រើនផ្សេងទៀត ដើម្បីឲ្យលោល រ័ត្ន សណ្តាប់ យកទៅដោះស្រាយរឿងផ្សេងៗទៀត ដែលជាបញ្ហាក្នុងមុខរបររកស៊ី ដោយផ្ដល់សេចក្តីទុកចិត្តនោះហើយ ទើបរាល់ការប្រគល់ប្រាក់របស់ដើមបណ្តឹងឲ្យទៅឈ្មោះ រ័ត្ន សណ្តាប់ មិនដែលមានលិខិតស្នាមជាភស្ថុតាងអ្វីឡើយ តែលោក រ័ត្ន សណ្តាប់ បានយកថវិកាទាំងនោះ ទៅធ្វើជាកម្មសិទ្ធផ្ទាល់ខ្លួន ក្រោមហេតុផលប្រើប្រាស់ក្នុងការរត់ការលិខិតស្នាមផ្សេងៗ តែធាតុពិតពុំបានទទួលលទ្ធផលអ្វីទាំងអស់ ។
ត្រង់ចំណុចនេះហើយ ទើបឈានដល់ការដាក់ពាក្យប្តឹងឲ្យលោក រ័ត្ន សណ្តាប់ ចូលខ្លួនមកបំភ្លឺ និងដោះស្រាយនៅចំពោះ មុខច្បាប់ ប៉ុន្តែឈ្មោះ រ័ត្ន សណ្តាប់ មិនព្រមចូលខ្លួនមកដោះស្រាយ ដោយផ្ទាល់ជាមួយដើមបណ្តឹងទេ និងបានគេចវេសទៀតផង ។
លោក រ័ត្ន សណ្តាប់ ធ្លាប់បានចូលឆ្លើយបំភ្លឺនៅចំពោះមុខព្រះរាជអាជ្ញារង លោក ចែ សុង កាលពី៥ ឧសភា ២០២១ លោក រ័ត្ន សណ្តាប់ បានបដិសេធពាក្យបណ្តឹងរបស់ពាណិជ្ជករនោះ ហើយក៏មិនបានខ្ចីលុយចំនួន៣៥,០០០ដុល្លារអ្វីនោះដែរ និងមិនបានជេរប្រមាថពាណិជ្ជករ តាមបណ្តាញសង្គមនោះទេ ព្រោះលោកមានហ្វេសប៊ុកតែមួយ មិនតែប៉ុណ្ណោះលោកថា មានទំនាក់ទំនងស្នេហាជាមួយគ្នាថែមទៀត ។
ការលើកឡើងដូច្នេះដើមបណ្តឹងបានច្រាលចោល ដែលថាមានការទំនាក់ទំនងស្នេហាជាមួយគ្នា នោះចាត់ទុកជារឿងប្រឌិត និងរឿងបរិហាបង្ខូចកេរ្តិ៍ទាំងស្រុង ការទំនាក់ទំនងពីមុន គឺក្នុងនាមជាកូនចៅ និងមេកើយ តែប៉ុណ្ណោះ ៕
ចែករំលែកព័តមាននេះ