រាជធានីភ្នំពេញ ៖ សមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ នាព្រឹកថ្ងៃទី២១ ខែមិថុនា ឆ្នាំ២០២១ បានឃាត់ខ្លួនឧត្តមសេនីយ៍ប៉ូលិសក្រសួងមហាផ្ទៃម្នាក់ បញ្ជូនទៅតុលាការពាក់ព័ន្ធបទល្មើសឆបោកលើទំហំទឹកប្រាក់ប្រមាណជាង២ម៉ឺនដុល្លារអាមេរិក ។ ឧត្តមសេនីយ៍ជាប់ពិរុទ្ធនេះឈ្មោះ…
រាជធានីភ្នំពេញ ៖ សមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ នាព្រឹកថ្ងៃទី២១ ខែមិថុនា ឆ្នាំ២០២១ បានឃាត់ខ្លួនឧត្តមសេនីយ៍ប៉ូលិសក្រសួងមហាផ្ទៃម្នាក់ បញ្ជូនទៅតុលាការពាក់ព័ន្ធបទល្មើសឆបោកលើទំហំទឹកប្រាក់ប្រមាណជាង២ម៉ឺនដុល្លារអាមេរិក ។
ឧត្តមសេនីយ៍ជាប់ពិរុទ្ធនេះឈ្មោះ ហង្ស វណ្ណៈ ភេទប្រុស អាយុ៤១ឆ្នាំ ជាមន្ត្រីនគរបាលជាតិថ្នាក់ឧត្តមសេនីយ៍ទោបម្រើការងារនៅក្រសួងមហាផ្ទៃ មានទីលំនៅផ្ទះគ្មានលេខ ផ្លូវលេខ១១៥A ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល ។
ប្រភពព័ត៌មានឲ្យដឹងថា សមត្ថកិច្ចចាប់ខ្លួនជនសង្ស័យរូបនេះគឺបានអនុវត្តតាមដីកាបង្គាប់ឲ្យចាប់ខ្លួនរបស់លោក ម៉ៅ ស៊ីណា ចៅក្រមស៊ើបសួរសាលាដំបូងរាជធានីភ្នំពេញ។
តាមដីកាបង្គាប់ឲ្យចាប់ខ្លួនបានបញ្ជាក់ថា ឈ្មោះ ហង្ស វណ្ណៈ ត្រូវបានចោទប្រកាន់ពីបទឆបោក ប្រព្រឹត្តនៅចំណុចស្ថានីយប្រេងឥន្ធនៈសូគីមិច លើមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី២ ខែកញ្ញា ឆ្នាំ២០១៦ ដែលបទល្មើសព្រហ្មទណ្ឌនេះ មានចែងឲ្យផ្តន្ទាទោសតាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ ។
ប្រភពព័ត៌មានបានឲ្យដឹងទៀតថា ឧត្តមសេនីយ៍ទោ ហង្ស វណ្ណៈ បានរងនូវពាក្យបណ្តឹងរបស់ប្រជាពលរដ្ឋម្នាក់ ដែលប្តឹងចោទប្រកាន់ថា បានយកលុយគេចំនួន២២.០០០ដុល្លារមេរិកទៅរត់ការចូលបម្រើការងារជាមន្ត្រីនគរបាលជាតិ ប៉ុន្តែមិនបានសម្រេចតាមការសន្យា ពោលគឺស៊ីដាច់ម៉ាត់ប្រាក់ជាង២ម៉ឺនដុល្លារនោះ ថែមទាំងគេចវេស មិនជួយដោះស្រាយជាមួយដើមបណ្តឹងទៀតផង ។
យ៉ាងណាក្តី ករណីខាងលើនេះចៅក្រមដែលកាន់សំណុំរឿងកំពុងបើកការសាកសួរ ដើម្បីរកដំណោះស្រាយជាមួយដើមបណ្តឹង និងសម្រេចឃុំខ្លួន ឬមិនឃុំ នៅពេលបញ្ចប់ការសាកសួរ ៕
ចែករំលែកព័តមាននេះ