ខេត្តសៀមរាប ៖ រដ្ឋបាលខេត្តសៀមរាប នៅថ្ងៃទី១៧ ខែមិថុនា ឆ្នាំ២០២១នេះ បានប្រកាសរកឃើញអ្នកវិជ្ជមានជំងឺកូវីដ-១៩ ថ្មីចំនួន២៦នាក់ និងអ្នកជាសះស្បើយពីជំងឺកូវីដ-១៩ ចំនួន១៨នាក់ ។
រដ្ឋបាលខេត្តសៀមរាប បានឲ្យដឹងថា អ្នកវិជ្ជមានកូវីដ-១៩ ចំនួន១៥នាក់ ជាករណីឆ្លងរាលដាលក្នុងសហគមន៍ ដែលមានពាក់ព័ន្ធដោយផ្ទាល់ និងប្រយោលនឹងប្រភពមកដើមពីស្រុកជីក្រែង ។ ចំពោះអ្នកវិជ្ជមានកូវីដ-១៩ ចំនួន០៦នាក់ គឺជាករណីពុំទាន់អាចសន្និដ្ឋានពីប្រភពចម្លងច្បាស់លាស់នៅឡើយ ។ អ្នកវិជ្ជមានម្នាក់ ជាករណីមករកសេវាព្យាបាលនៅមន្ទីរពេទ្យព្រះបាទជ័យវរ្ម័នទី៧ ដោយមានអាការៈសង្ស័យ ក្រុមគ្រូពេទ្យបានយកសំណាកស្រាវជ្រាវរកមេរោគកូវីដ-១៩ ទទួលបានលទ្ធផលវិជ្ជមាន។ ដោយឡែក អ្នកវិជ្ជមានចំនួន៤នាក់ទៀត គឺជាប្រជាពលរដ្ឋដែលត្រឡប់មកពីប្រទេសថៃ មកដល់ខេត្តសៀមរាប ហើយជាករណីសង្ស័យ ត្រូវបានក្រុមគ្រូពេទ្យដាក់ឱ្យធ្វើចត្តាឡីស័ក នៅវិទ្យាល័យសម្ដេចឪ និងវិទ្យាល័យវត្តស្វាយ ។
អ្នកជាសះស្បើយទាំង ១៨នាក់ ក្រុមគ្រូពេទ្យបានអនុញ្ញាតឲ្យចេញពីមន្ទីរពេទ្យបង្អែកខេត្ត និងមន្ទីរពេទ្យបង្អែកស្រុកសូទ្រនិគម ត្រឡប់ទៅលំនៅឋានវិញ ដោយត្រូវបន្តការធ្វើចត្តាឡីស័ករយៈពេល១៤ថ្ងៃ ។
សូមបញ្ជាក់ថា មកទល់ថ្ងៃទី១៧ ខែមិថុនា ឆ្នាំ២០២១នេះ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន៥៣៤នាក់ និងបានព្យាបាលជាសះ-ស្បើយ សរុបចំនួន១៣៦នាក់ ស្លាប់សរុប៤នាក់ និង៣៩៤នាក់កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក ៕
ចែករំលែកព័តមាននេះ