រាជធានីភ្នំពេញ ៖ តួសម្តែងនៅក្នុងវង់ល្ខោនបាសាក់របស់លោក អុល សំអាង ស្ទើរតែទាំងអស់បានជួបបញ្ហាត្រដាបត្រដួសយ៉ាងខ្លាំងនាសម័យកូវីដនេះ ដោយសារបាត់បង់ការសម្តែង។ មិនថា តួស្តេច តួភីលាង អាម៉ាត យក្ស និងតួផ្សេងៗទៀតឡើយ គឺសុទ្ធតែជួបបញ្ហាជីវភាពទាំងអស់នៅក្នុងពេលដែលការសម្តែងល្ខោនមិនបានដំណើរការអស់រយៈពេលជាងមួយឆ្នាំមកនេះ ដោយសារការឆ្លងរីករាលដាលនៃជំងឺកូវីដ១៩ នៅក្នុងសហគមន៍។
ប្រធានក្រុមវង់ល្ខោនមហាជនរាជធានីភ្នំពេញ លោក អុល សំអាង បានអះអាងប្រាប់កោះសន្តិភាពថា ចាប់តាំងពីក្រុមល្ខោនរបស់លោកមិនមានការសម្តែងនោះ កូនក្រុមរបស់លោកបានបែងចែកទៅការងារផ្សេងៗរៀងខ្លួន ដោយមានអ្នកខ្លះបានជួបបញ្ហាលំបាកក្នុងផ្នែកជីវភាពយ៉ាងខ្លាំង។ លោកបញ្ជាក់ថា ពួកគេទាំងអស់នោះ ខ្លះទៅធ្វើការសំណង់ សន្តិសុខយាម ធ្វើស្រែចំការ និងអ្នកខ្លះធ្វើនំបញ្ចុក និងលក់ផ្លែឈើតាមរទះ។ លោកថា តួសម្តែងជាស្តេច ជាសដ្ឋី គាត់មានអីឡូវគាត់ធ្វើនំបញ្ចុក ផ្លែឈើ និងបន្លែលក់តាមរ៉ឺម៉ក ខណៈតួថ្លុកគាត់ទៅធ្វើសន្តិសុខយាមតាមផ្ទះ និងរោងចក្រ។
លោក អុល សំអាង បានលើកឡើងបន្ថែមថា មុនផ្ទុះកូវីដក្នុងសហគមលើកទី១ ក្រុមរបស់លោកក៏មានការសម្តែង២លើកដែរ តែចាប់តាំងពីផ្ទុះលើកទី២នេះ អត់មានសោះតែម្តង។ លោកបញ្ជាក់ថា ការសម្តែងនោះ គឺបានត្រឹមសម្តែងតាមទូរទស្សន៍ប៉ុណ្ណោះ ដោយការសម្តែងតាមបណ្តាបុណ្យទានផ្សេងៗនោះ គឺមិនមានឡើយ ពោលគឺប្រហែលជិត២ឆ្នាំហើយ។
យ៉ាងណា បើតាមលោក អុល សំអាង ថ្មីៗនេះ ក្រុមរបស់លោកក៏បានដាក់រឿងចំនួន២ទៅស្ថានីយទូរទស្សន៍ជាតិកម្ពុជា ដើម្បីត្រៀមសម្តែងផងដែរ។ លោកបញ្ជាក់ថា ២រឿងនេះ គឺជាគម្រោងឆ្នាំចាស់ប៉ុណ្ណោះ ប៉ុន្តែដោយសារជំងឺកូវីដ ទើបគម្រោងនេះត្រូវបានពន្យាពេលរហូតមកដល់ពេលនេះ។ យ៉ាងណា បើទោះបីជាក្រុមរបស់លោកបានបាត់បង់ការសម្តែងនាពេលនេះក៏ដោយ ប៉ុន្តែក្រុមសិល្បៈរបស់លោកនៅបន្តរក្សាការទំនាក់ទំនងគ្នាមិនអោយដាច់ឡើយ ហើយពួកគេទាំងអស់នៅតែបង្ហាញនូវឆន្ទៈនៅក្នុងការបន្តសម្តែងសិល្បៈល្ខោនបាសាក់នេះដដែល។
លោក អុល សំអាង រំពឹងថា ក្នុងពេលខាងមុខ បើជំងឺកូវីដ១៩ មានការថមថយ ឬអស់ពីប្រទេសកម្ពុជានោះ ក្រុមរបស់លោកនឹងមានការសម្តែងឡើងវិញជាធម្មតា ព្រោះក្រុមរបស់លោកនៅតែបង្ហាញឆន្ទៈស្រឡាញ់ និងថែរក្សាសិល្បៈបុរាណមួយនេះដដែល។ លោកក៏សង្ឃឹមថា គ្រប់ប្រព័ន្ធផ្សព្វផ្សាយទាំងអស់នឹងបន្តជម្រុញការផ្សព្វផ្សាយសិល្បៈល្ខោនបាសាក់ខ្មែរបន្ថែមទៀត ទោះតិចក្តី ច្រើនក្តី។
លោកថា ការចូលរួមផ្សព្វផ្សាយនេះ គឺមានសារៈសំខាន់ណាស់សម្រាប់លើកទឹកចិត្ត និងលើកស្ទួយអ្នកសិល្បៈដែលកំពុងជួបបញ្ហាប្រឈមខ្លាំងនាសម័យកូវីដនេះ។ លោកក៏សូមអំពាវនាវផងដែរ ដល់សំណាក់ទស្សនិកជន ជាពិសេសបណ្តាយុវវ័យជំនាន់ក្រោយសូមបន្ត និងងាកមកជួយគាំទ្រទម្រង់សិល្បៈបុរាណខ្មែរផង ដើម្បីចូលរួមលើកតម្កើន និងអភិរក្សស្នាដៃសិល្បៈដែលដូនតាខ្មែរបានបន្សល់ទុកអោយ៕
ចែករំលែកព័តមាននេះ