រាជធានីភ្នំពេញ ៖ កាលពីវេលាម៉ោង៣ និង២០នាទីរសៀល ថ្ងៃទី១៨ ខែវិច្ឆិកា ឆ្នាំ២០១៥ កម្លាំងសមត្ថកិច្ចអន្តោប្រសេន៍បានចុះឃាត់ខ្លួនជនជាតិវៀតណាមចំនួន៩នាក់(ក្នុងនោះស្រី២នាក់) ពាក់ព័ន្ធករណីមករស់នៅប្រទេសកម្ពុជាដោយខុសច្បាប់ នៅចំណុចផ្ទះលេខ១៣ ក្បែរវត្តព្រះពុទ្ធ នៅតាមបណ្ដោយផ្លូវលេខ២១៣ ក្នុងសង្កាត់វាលវង់ ខណ្ឌ៧មករា ។
លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេតអនុវត្តន៍នីតិវិធី នៃអគ្គនាយកដ្ឋានអន្តោប្រវេសន៍បានឲ្យដឹងថា ក្រោយធ្វើការស្រាវជ្រាវ និងទទួលបានព័ត៌មានថា មានជនជាតិវៀតណាមចំនួន៩នាក់មករស់នៅ និងធ្វើជាជាងដេរស្បែកជើងនៅផ្ទះលេខ១៣ ក្បែរវត្តព្រះពុទ្ធ នៅតាមបណ្ដោយផ្លូវលេខ២១៣ ក្នុងសង្កាត់វាលវង់ ខណ្ឌ៧មករា ។
លោកឧត្តមសេនីយ៍ទោ អ៊ុក ហៃសីឡា បានបន្តទៀតថា ក្រោយពីធ្វើការត្រួតពិនិត្យរួច កម្លាំងរបស់លោកបានរកឃើញជនជាតិវៀតណាមចំនួន៩នាក់ (ស្រី២នាក់) រួចឃាត់ខ្លួនបញ្ជួនទៅអគ្គនាយកដ្ឋានអន្តោប្រវេសន៍ ដើម្បីធ្វើការអប់រំណែនាំឲ្យធ្វើសៀវភៅការងារ និងធ្វើការផាកពិន័យតាមច្បាប់ ដោយធ្វើផាកពិន័យថវិកាចូលរដ្ឋចំនួន៥០ម៉ឺនរៀលសម្រាប់ជនជាតិបរទេសម្នាក់ ។
ពាក់ព័ន្ធនឹងករណីនេះដែរ លោកក៏បានធ្វើការអំពាវនាវ និងសុំឲ្យជនបទេសដែលស្នាក់នៅ និងធ្វើការសុំច្បាប់ និងគោរពច្បាប់ប្រទេសកម្ពុជាផង បើពុំនោះទេសមត្ថកិច្ចនឹងចាត់វិធានការដោយពុំលើកលែងឡើយ ។
លោកឧត្ដមសេនីយ៍ទោបានបន្តទៀតថា កន្លងមកលោកបានធ្វើការអំពាវនាវដល់ម្ចាស់រោងចក្រ សហគ្រាស និងសិប្បកម្មនានាទាំងអស់ឲ្យបញ្ឈប់ការជួលកម្មករបរទេសដែលចូលមកដោយខុសច្បាប់មកធ្វើការបន្តទៀត បើពុំនោះទេសមត្ថកិច្ចនឹងចាត់វិធានការទៅតាមផ្លូវច្បាប់ចំពោះអ្នករឹងទទឹង ។
យោងតាមមាត្រាទី២៩ ច្បាប់ស្តីពីអន្តោប្រវេសន៍បានចែងថា ជនបរទេសណាដែលគ្មានការអនុញាត ហើយចូលមកក្នុងព្រះរាជាណាចក្រកម្ពុជាដោយលបលួច លាក់បន្លំ ឬល្បិចផ្សេងទៀតដែលផ្ទុយពីបទបញ្ញាតិនៃច្បាប់នេះ ត្រូវផ្តន្ទាទោសដាក់គុកពី៣ខែ ដល់៦ខែ មុននឹងបណ្តេញចេញ ត្រូវផ្តន្ទាទោសដូចគ្នានឹងជនល្មើសចំពោះជនណាដែលផ្តល់ជំនួយ ឬជួយលាក់បាំងក្នុងការបញ្ចូលជនបរទេសដែលគ្មានការអនុញាតមកក្នុងព្រះរាជាណាចក្រកម្ពុជា ឯមន្ត្រីភ្នាក់ងាររាជការមានសមត្ថកិច្ចរូបណា ដែលជាអ្នកសមគំនិត ឬជួយសម្រួលក្នុងការប្រព្រឹត្តបទល្មើសខាងលើ ត្រូវផ្តន្ទាទោសដាក់គុកពី១ខែ ដល់១ឆ្នាំ ហើយមន្ត្រីរាជការមានសមត្ថកិច្ចរូបណា ដែលធ្វើការធ្វេសប្រហែស ខ្វះការប្រុងប្រយ័ត្ន ឬមិនគោរពបទបញ្ជាត្រូវទទួលការផ្តន្ទាទោសផ្នែករដ្ឋបាល មធ្យោបាយ សម្ភារៈប្រើប្រាស់ សម្រាប់ប្រព្រឹត្តបទល្មើស ត្រូវរឹបអូសទុកជាសម្បត្តិរដ្ឋដោយតុលាការ ៕
ចែករំលែកព័តមាននេះ