រាជធានីភ្នំពេញ ៖ នាឡិកាធំវត្តភ្នំដែលសាលារាជធានីភ្នំពេញស្ថាបនាឡើងកាលពីឆ្នាំ២០០០ មានទីតាំងស្ថិតនៅខាងមុខជណ្តើរឡើងព្រះវិហារវត្តភ្នំឈាងខាងត្បូងជាជំនួយពីខេត្ត អ៊ី ណាន ប្រទេសចិនមានសភា
រាជធានីភ្នំពេញ ៖ នាឡិកាធំវត្តភ្នំដែលសាលារាជធានីភ្នំពេញស្ថាបនាឡើងកាលពីឆ្នាំ២០០០ មានទីតាំងស្ថិតនៅខាងមុខជណ្តើរឡើងព្រះវិហារវត្តភ្នំឈាងខាងត្បូងជាជំនួយពីខេត្ត អ៊ី ណាន ប្រទេសចិនមានសភាពចាស់ទ្រុឌទ្រោម សាលារាជធានីភ្នំពេញបានធ្វើការជួសជុលកែលំអកន្លងមកនោះ ពេលនេះរួចរាល់ ព្រមទាំងបានដំឡើង និងដាក់ឲ្យដំណើរការឡើងវិញហើយ ។
មន្ត្រីសាលារាជធានីភ្នំពេញបានឲ្យដឹងថា ការជួសជុល និងកែលំអនាឡិការធំនៅរមណីយដ្ឋានវត្តភ្នំនោះ ដោយសារមានសភាពចាស់ទ្រុឌទ្រោមខ្លាំង ជាពិសេសទ្រនិចដើរនាទី និងម៉ោងមានសភាពចាស់កោងរមួលមិនស្មើ និងចំណុចម៉ោងដែលស្ថាបនាដោយកញ្ចក់រចនាជាលេខម៉ោងនោះមួយចំនួនត្រូវបានបាក់បែក ឬប្រេះស្រាំ និងចាស់ពេក ម្យ៉ាងនៅក្នុងបរិវេណនាឡិការនោះមានស្មៅដុះទ្រុបទ្រុល ។
មន្ត្រីដដែលបានឱ្យដឹងថា ការងារជួសជុលកែលំអ ត្រូវធ្វើការកាប់ឆ្ការឈូសឆាយស្មៅចេញ ទ្រនិចដើរម៉ោង និងទ្រនិចចំណុចម៉ោងត្រូវបានផ្លាស់ប្តូរចេញ ម្យ៉ាងទៀតត្រូវធ្វើ(សារ៉េ)ម៉ោងឲ្យដើរត្រូវឡើងវិញ ដែលបញ្ជាដោយប្រពន្ធ័កុំព្យូទ័រ ។
ស្របគ្នានោះដែរ សាលារាជធានីភ្នំពេញបាននិងកំពុងដំណើរការជូសជុលកែលំអរសូនច្បារនៅក្នុងរមណីដ្ឋានវត្តភ្នំទាំងមូល ដែលមានផ្ទៃដីសរុបជាង៤ហិកតា ក្នុងនោះមានការជួសជុលកែលំអសួននាឡិកាធំវត្តភ្នំ,សួននៅប៉ែកខាងមុខ ជណ្តើរឡើងខាងតើត ការកែលំអកំរាលថ្មបាយក្រៀម, ការដាំស្មៅ, ដាំផ្កាក៏ដូចការកាប់លះមែកឈើដែលស៊ុបទ្រុបជាង២០០ដើម ដែលត្រូវអនុវត្តព្រមគ្នា ព្រមទាំងជុំរុញឲ្យរួចរាល់ក្នុងពេលឆាប់ៗនេះ ដើម្បីលើកកំពស់សោភ័ណភាពបរិស្ថានធម្មជាតិនៅរមណីដ្ឋានវប្បធម៌ប្រវត្តិសាស្ត្រនេះ។
មន្ត្រីសាលារាជធានីភ្នំពេញបានឲ្យដឹងទៀតថា ក្នុងគម្រោងជួលជុលកែលំអររមណីដ្ឋានវត្តភ្នំជំហានដំបូង គ្រោងចំណាយថវិកាជាង១លានដុល្លារអាមេរិក ក្នុងនោះមាន ការជូសជុលជំរាលភ្នំ, ជញ្ជាំងខឿនប៉ែកខាងកើតដែលមានសភាពស្រុតដោយសារកត្តាអាយុកាល, កត្តាធម្មជាតិក៏ដូចស្ថានភាពចរាចរដ៏មមាញឹកឆ្លងកាត់តំបន់វត្តភ្នំធ្វើឲ្យមានរំញ័រខ្លាំងដល់តួភ្នំ ។
ធ្វើការជូសជុលកែលំអសួន មានដាំស្មៅ, រៀបចំប្រពន្ធ័ទឹក ភ្លើង, ប្រពន្ធ័លូ ធ្វើរបងដែកមានកំពស់១,២ម៉ែត្រព័ទ្ធជុំវិញវត្តភ្នំ មានក្បាច់ជាស្រទាប់ផ្កាឈូក ក្រាលកំរាលសំរាប់ថ្មើរជើងខាងក្នុងបរិវេណវត្តភ្នំ ដែលប្រើថ្មក្រានីត រួមទាំងច្រកចេញចូលឲ្យបានស្អាត និងរក្សាបានបរិស្ថានវប្បធម៌ធម្មជាតិ ដែលធ្វើឲ្យសក្តិសមជាកន្លែងគោរពបូជារបស់ប្រជាពលរដ្ឋ និងជាកន្លែងទាក់ទាញភ្ញៀវទេសចរដ៏សំខាន់សម្រាប់រាជធានីភ្នំពេញផងដែរ៕
ចែករំលែកព័តមាននេះ