ខេត្តស្វាយរៀង ៖ ក្រុមការងារស្រាវជ្រាវយកសំណាកវិភាគនៃរដ្ឋបាលខេត្តស្វាយរៀងបានផ្តល់ព័ត៌មានដល់ក្រុមអ្នកសារព័ត៌មានដឹងថា ចាប់តាំងពីថ្ងៃទី២១ ដល់ថ្ងៃទី៣១ ខែឧសភា ឆ្នាំ២០២១កន្លងទៅ ក្រុមការងារយកសំណាក បានចុះយកសំណាកទៅលើកម្មករ កម្មការិនីចំនួន២.៥១៧នាក់ និងបានរកឃើញករណីវិជ្ជមានកូវីដ-១៩ ចំនួន៣៥២នាក់ ក្នុងចំណោមរោងចក្រចំនួន៨ ស្ថិតនៅតំបន់សេដ្ឋកិច្ចពិសេសចំនួន៣ ក្នុងក្រុងបាវិត រួមមាន ៖
១-តំបន់សេដ្ឋកិច្ចពិសេសសានតុង មាន៣រោងចក្រ គឺរោងចក្រ យូលី១ , រោងចក្រ ប្យ៊ូលធីហ្វូលវីនដូ និងរោងចក្រ អូខ្លូត។
២-នៅតំបន់សេដ្ឋកិច្ចពិសេស មេនហាតធេន មាន៣រោងចក្រដែរ គឺរោងចក្រ សាន់ហ្វេង , រោងចក្រ ម៉ូរ៉ូហ្វូជី និងរោងចក្រ យូធីឡាយ ។
៣-ហើយនៅតំបន់សេដ្ឋកិច្ចពិសេស តាយសេង មានចំនួន២រោងចក្រ គឺរោងចក្រ អេអ៊ែនជេ (A and J) និងរោងចក្រ ស្មាតថេក។
ប្រភពដដែលបន្តទៀតថា ចំពោះប្រភពចម្លង ក្រុមការងារបានសង្ស័យទៅលើបុរសជាប្តីកម្មការិនីម្នាក់ ដែលជាអ្នកបើកបររថយន្តដឹកជញ្ជូនបន្លែពីស្វាយរៀងទៅលក់នៅផ្សារដើមគរ ហើយប្តីប្រពន្ធទាំង២នាក់បានធ្វើការរោងចក្រផ្សេងគ្នា ដូច្នេះបើអ្នកណាម្នាក់មានវិជ្ជមានកូវីដ១៩នោះ គឺអាចចម្លងគ្នា ហើយបន្តចម្លងទៅរោងចក្រផ្សេងៗទៀត ប៉ុន្តែមានរោងចក្រខ្លះដែលមានថៅកែរោងចក្រអនុវត្តតាម SOP ត្រឹមត្រូវ ឃើញថាពុំមានការចម្លងទេ ។ ហើយដើម្បីការពារទប់ស្កាត់ការផ្ទុះឡើងនៃជំងឺកូវីដ-១៩ នៅក្នុងរោងចក្រ ចំពោះថៅកែរោងចក្រត្រូវអនុវត្តឱ្យបាននូវ SOP ចំណែកកម្មករ-កម្មការិនី រួមទាំងក្រុមគ្រួសាររបស់ពួកគាត់ផង ត្រូវគោរពតាមវិធានការ «៣ការពារ ៣កុំ» របស់សម្តេចតេជោ ហ៊ុន សែន ។
ក្រោយពីរកឃើញថា អ្នកវិជ្ជមានកូវីដ១៩ ត្រូវបានក្រុមការងារមន្ទីរសុខាភិបាលខេត្តបញ្ជូនទៅព្យាបាលនៅមន្ទីរពេទ្យព្យាបាលកូវីដ-១៩ខេត្ត ហើយចំពោះអ្នកប៉ះពាល់ផ្ទាល់ត្រូវបានឱ្យធ្វើចត្តាឡីស័ក និងយកសំណាកវិភាគ ចំណែកឯអ្នកប៉ះពាល់ប្រយោលវិញ ឱ្យធ្វើចត្តាឡីស័កនៅតាមផ្ទះ ប្រសិនជាមានចេញរោគសញ្ញាដូចជា ៖ ក្តៅ ក្អក ថប់ដង្ហើម ហៀរសំបោរ ត្រូវប្រញាប់ប្រញាល់ទៅធ្វើសំណាក ធ្វើតេស្តរកមេរោគកូវីដ-១៩។
លោកវេជ្ជបណ្ឌិត កែរ រដ្ឋា ក៏បានបញ្ជាក់ថា នេះជាលើកទី២ហើយ ដែលខេត្តស្វាយរៀង មានករណីផ្ទុះជំងឺកូវីដ-១៩ ប៉ុន្តែដោយមានការផ្តល់មតិយោបល់ និងអនុសាសន៍ល្អៗពីសំណាក់លោកជំទាវ ម៉ែន សំអន តំណាងរាស្ត្រមណ្ឌលស្វាយរៀង ប្រធានក្រុមការងារថ្នាក់ជាតិចុះជួយខេត្តស្វាយរៀង និងក្រុមការងារ និងដោយសារមានការគ្រប់គ្រងបញ្ជាផ្ទាល់ពីឯកឧត្ដម ម៉ែន វិបុល អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ខេត្ត ធ្វើឱ្យស្ថានការណ៍តានតឹងបានត្រឡប់ទៅជាធូរស្រាលវិញក្នុងរយៈពេលដ៏ខ្លី ។
កត្តាជោគជ័យទាំងនេះ ក៏ដោយសារការយកចិត្តទុកដាក់ឧបត្តម្ភគាំទ្រ ទាំងសម្ភារៈ ឱសថ ប្រយុទ្ធប្រឆាំងនឹងជំងឺកូវីដ-១៩ រួមទាំងថវិកាសម្រាប់ឧបត្តម្ភដល់បុគ្គលិកបំរើការងារប្រយុទ្ធប្រឆាំងនឹងជំងឺកូវីដ-១៩ ពីប្រមុខរាជរដ្ឋាភិបាល ក្រសួងសុខាភិបាល និងក្រសួងស្ថាប័នពាក់ព័ន្ធមួយចំនួនទៀត ។ ជាពិសេសទៅទៀត មន្ត្រីកិច្ចសន្យា បុគ្គិលិកស្ម័គ្រចិត្តបំរើការងារប្រយុទ្ធប្រឆាំងនឹងជំងឺកូវីដ-១៩ មានសេចក្តីត្រេកអរយ៉ាងក្រៃលែង និងដឹងគុណសម្តេចតេជោ ហ៊ុន សែន ដែលពួកគាត់ត្រូវបានក្រសួងសុខាភិបាលបញ្ជូនឈ្មោះស្នើសុំសម្តេចតេជោ បញ្ចូលក្នុងក្របខណ្ឌសុខាភិបាល។
លោកវេជ្ជបណ្ឌិតក៏បានផ្តល់របាយការណ៍ជូនក្រុមអ្នកសារព័ត៌មានឲ្យដឹងថា រហូតដល់ថ្ងែទី០៣ មិថុនានេះ មានអ្នកជំងឺកូវីដ-១៩ ចំនួនសរុប៩៣០នាក់ ក្នុងនោះស្រី៥៤៧នាក់ (ជនជាតិខ្មែរចំនួន៨៨៦នាក់,ជនជាតិបរទេសចំនួន៤៤នាក់) ចំណែកចំនួនអ្នកជំងឺជាសះស្បើយសរុប៤៦៣នាក់ ក្នុងនោះស្រី២២២នាក់ផងដែរ និងអ្នកជំងឺចំនួនស្លា.ប់០៦នាក់ គឺជាជនជាតិខ្មែរ ។
លោកវេជ្ជបណ្ឌិតបានឲ្យដឹងទៀតថា ប្រជាពលរដ្ឋដែលជាពលករត្រឡប់មកពីប្រទេសនានាចូលមកស្រុកកំណើតវិញ ហើយក៏ត្រូវបានក្រុមការងារធ្វើការពិនិត្យសុខភាពចំនួន៤,៣៩០នាក់ ក្នុងនោះស្រី១,២៨០នាក់។ សរុបអ្នកបានធ្វើចត្តាឡីស័កមានចំនួន៤,៣៩៩នាក់ ក្នុងនោះអ្នកបញ្ចប់ការធ្វើចត្តាឡីស័កសរុប៤,៣១៨នាក់ និងអ្នកកំពុងធ្វើចត្តាឡីស័កមានចំនួន៧០នាក់។ ជាលទ្ធផលពីការយកសំណាកវិភាគ (ព្រឹត្តិការណ៍២០កុម្ភៈ) គឺបានយកសំណាកលើកទី១ ចំនួន៨,៨៩០នាក់ ស្រី៣,៦៤០នាក់ និងយកសំណាកលើកទី២ សរុប២,២៩០នាក់ ស្រី៨៥៩នាក់ ហើយនឹងយកសំណាកលើកទី៣ សរុប៤៦នាក់ ស្រី២៥នាក់។ ដូច្នេះរដ្ឋបាលខេត្តស្វាយរៀង គ្រប់គ្រងបាន និងសង្ឃឹមថា នឹងធូរស្រាលក្នុងរយៈពេលដ៏ខ្លីខាងមុខ៕
ចែករំលែកព័តមាននេះ