ខេត្តកំពង់ស្ពឺ ៖ កាលពីរសៀលថ្ងៃទី១២ វិច្ឆិកា ២០១៥ នៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ មានមនុស្សមួយក្រុមប្រដាប់ដោយកាំបិត និងដំបងបានចូលទៅឡោមព័ទ្ឋផ្ទះប្រជាពលរដ្ឋ ដោយបណ្តេញម្ចាស់ផ្ទះចេញ ហើយធ្វើការរុះរើផ្ទះទាំងកំរោល ។
ប្រភពពីប្រជាពលរដ្ឋរស់នៅតំបន់ខាងលើបានអោយដឹងថា ផ្ទះប្រជាពលរដ្ឋដែលមនុស្សមួយក្រុមនោះចូលមករុះរើមានព្រំប្រទល់ជាប់ជាមួយនឹងក្រុមហ៊ុន អ៊ុក ឃុន ។ ផ្ទះ២ខ្នងដែលមនុស្សមួយក្រុមចូលមកដុត និងរុះរើនេះ ត្រូវបានគេអះអាងថាមកសង់លើដីក្រុមហ៊ុន អ៊ុក ឃុន ទើបគេប្រើកម្លាំងមករុះរើបែបនេះ ។
ម្ចាស់ផ្ទះ និងដីដែលត្រូវគេរុះរើនេះឈ្មោះ កង ភិរុណ ជាមន្ត្រីយោធានៅក្រសួងការពារជាតិមានឋានៈជានាយរងការិយាល័យអធិការកិច្ច ។
ពាក់ព័ន្ឋនឹងបញ្ហានេះដែរលោក កង ភិរុណ បានប្រាប់អោយដឹងតាមទូរស័ព្ទថា ដីដែលមានទំនាស់នេះគឺលោកបានទិញពីប្រជាពលរដ្ឋត្រឹមត្រូវ ដោយមានលិខិតទទួលស្គាល់ដឹងលឺពីអាជ្ញាធរគ្រប់ថ្នាក់ ។ តែក្រោយមកមានក្រុមហ៊ុន អ៊ុក ឃុន មកចោទប្រកាន់ថា លោកឃុបឃិតគ្នាលួចដីក្រុមហ៊ុនទៅវិញ ហើយពេលនេះផ្ទះសម្បែងរបស់លោកត្រូវគេរុះរើអស់ហើយ លោកមិនដឹងថាពេលនេះត្រូវរំពឹងលើអ្វីទៀតទេ បើអាជ្ញាធរគ្រប់ជាន់ថ្នាក់សុទ្ឋតែឈរខាងក្រុមហ៊ុនទាំងអស់ ។
ប្រជាពលរដ្ឋមួយរូបសុំមិនបញ្ចេញឈ្មោះបានឲ្យដឹងថា មនុស្សដែលមករុះរើផ្ទះរបស់លោក កង ភិរុណ ជាមនុស្សរបស់ក្រុមហ៊ុន មិនមែនខាងលោក កង ភិរុណ ជួលមកដូចការលើកឡើងរបស់អាជ្ញាធររាយការណ៍ទៅថ្នាក់លើនោះទេ ។ គឺមនុស្សទាំងនេះមកពីភូមិសំបុកចាប វត្តឈូកវ៉ា ខណ្ឌសែនសុខ រាជធានីភ្នំពេញ ឯណោះទេ មិនមែនអ្នកភូមិទី១ ឃុំត្រែងត្រយឹងឡើយ ។
លោក អ៊ុក វិច្ឆិកា តំណាងក្រុមហ៊ុន អ៊ុក ឃុន ធ្លាប់បានប្រាប់អ្នកយកព័ត៌មានយើងថា ក្រុមហ៊ុនរបស់លោកមានច្បាប់វិនិយោគត្រឹមត្រូវពីរាជរដ្ឋាភិបាល ហើយក្រុមមនុស្សទាំងនេះនាំគ្នាបះបោរមករស់នៅលើដីក្រុមហ៊ុន ។
សូមរំលឹកថា សកម្មភាពរំលោភបំពានពីសំណាក់ក្រុមហ៊ុនមកលើគ្រួសារកងទ័ពនេះ គឺកើតមានជាយូរយារណាស់មកហើយ បើទោះជាមាន សជណ ពីទីស្តីការគណៈរដ្ឋមន្ត្រីកាត់ដីអោយក្រុមហ៊ុនមួយនេះតែ៥២ហិកតាក្តី ក៏ម្ចាស់ក្រុមហ៊ុនមិនព្រមអនុវត្តតាមឡើយ ៕
ចែករំលែកព័តមាននេះ