កំពត៖ អ្នកឆ្លងកូវីដ១៩ ចំនួន ៥នាក់ ក្នុងនោះ មានក្មេងប្រុសចំនួន ២នាក់ ដែលបានសម្រាកព្យាបាលដាច់ដោយឡែកនៅវិឡាល័យព្រះបិតាជាតិ ឃុំកំពង់ត្រាចខាងលិច ស្រុកកំពង់ត្រាច…
កំពត៖ អ្នកឆ្លងកូវីដ១៩ ចំនួន ៥នាក់ ក្នុងនោះ មានក្មេងប្រុសចំនួន ២នាក់ ដែលបានសម្រាកព្យាបាលដាច់ដោយឡែកនៅវិឡាល័យព្រះបិតាជាតិ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត បានជាសះស្បើយ ហើយក្រុមគ្រូពេទ្យ នៅមន្ទីរពេទ្យបង្អែកស្រុកប្រត្តិបត្តិកំពង់ត្រាច បានអោយចេញពីកន្លែងសម្រាកព្យាល កាលពីព្រឹកថ្ងៃទី២០ ខែឧសភា ឆ្នាំ២០២១ នេះ។
អ្នកដែលបានជាសះស្បើយជំងឺកូវីដ១៩ ដែលកើតនៅក្នុងសហគមន៍ នៅភូមិដើមចារឃុំកំពង់ត្រាច មុនពេលឡើងជិះរថយន្តទៅកាន់លំនៅដ្ឋាន បានសម្ដែងការរីករាយទាំងក្មេងទាំងចាស់ និងអរគុណដល់គ្រូពេទ្យ ជាពិសេសមានការយកចិត្តទុកដាក់ពីប្រមុខរាជរដ្ឋាភិបាលកម្ពុជា សម្ដេច ហ៊ុន សែន។
ក្រុមគ្រូពេទ្យមន្ទីរពេទ្យបង្អែកស្រុកកំពង់ត្រាច បានអោយដឹងនៅព្រឹកថ្ងៃទី២០ឧសភានេះថា បន្ទាប់ពីមានការឆ្លងរីករាលដាល់កូវិដ១៩ ចូលមកក្នុងសហគមន៍ នៅស្រុកកំពង់ត្រាច មកដល់ពេលនេះ មានប្រជាពលរដ្ឋចំនួន ២១នាក់ ត្រូវក្រុមគ្រូពេទ្យ បានយកសំណាកនៅពិនិត្យ និងធ្វើតេស្តផ្ទាល់ រកឃើញវិជ្ជមានកូវីដ១៩។
ក្រុមគ្រូពេទ្យបាននិយាយថា អ្នកឆ្លងកូវីដ១៩ ក្នុងចំណោមអ្នកជំងឺទាំង ២១នាក់ គឺបានជាសះស្បើយចំនួន ១០នាក់ហើយ និងអ្នកឆ្លងចំនួន ១១នាក់ទៀត កំពុងសម្រាកព្យាល នៅក្នុងអគារវិទ្យាល័យព្រះបិតាជាតិ កំពង់ត្រាច។
ឯកឧត្តម ជាវ តាយ អភិបាលខេត្តកំពត កាលពីពេលថ្មីៗនេះ បានមកចែកអំណោយមនុស្សធម៌សាខាកាកបាទក្រហមកម្ពុជា ខេត្តកំពត បានចែកជូនពលរដ្ឋក្រីក្រ នៅស្រុកកំពង់ត្រាច។
ឯកឧត្តម ជាវ តាយ បានបង្ហាញការព្រួយបារម្ភ ពាក់ព័ន្ធនឹងប្រជាពលរដ្ឋឆ្លងកូវីដ១៩ នៅស្រុកកំពង់ត្រាច មានចំនួនច្រើនជាងបណ្ដាស្រុកនានា ក្នុងខេត្តកំពត។ ប៉ុន្តែថា ចំនួននេះ មិនទាន់ប្រកាសភាពអាសន្ននៅឡើយទេ ព្រោះអ្នកឆ្លង និងជាសះស្បើយបណ្ដើរៗ៕ កែវ ឆាត
ចែករំលែកព័តមាននេះ