ខេត្តស្ទឹងត្រែង ៖ យុវជនវ័យ១៨ឆ្នាំម្នាក់ទៀត ត្រូវបានរកឃើញវិជ្ជមានកូវីដ១៩ នេះជាករណីទី៣ហើយ សម្រាប់ខេត្តស្ទឹងត្រែង ក្រោយពេលដែលយុវជនខាងលើនេះ បានធ្វើដំណើរមកពីភ្នំពេញកាលពីថ្ងៃទី១៥ ខែឧសភា ឆ្នាំ២០២១ លុះនាថ្ងៃទី១៨ ខែឧសភា ឆ្នាំ២០២១នេះ តាមរយៈការជូនដំណឹង និងប្រមូលព័ត៌មានក្នុងមូលដ្ឋានភូមិស្រឡៅ ឃុំអន្លុងជ្រៃ ស្រុកថាឡាបរិវ៉ាត់ ក៏រកឃើញថា យុវជនរូបនេះវិជ្ជមានកូវីដ១៩។
តាមការស្រាវជ្រាវយុវជនខាងលើ មានការពាក់ព័ន្ធនឹងករណីវិជ្ជមានកូវីដ១៩ ចំនួន៥នាក់ក្នុងគ្រួសារនៅភូមិព្រែតារ័ត្ន ឃុំពោធិ៍បាន ស្រុកកោះធំ ខេត្តកណ្តាល។ យុវជនរូបនេះ បានធ្វើដំណើរតាមរថយន្តដឹកបន្លែមកពីស្រុកកោះធំ ខេត្តកណ្តាល មកកាន់ខេត្តស្ទឹងត្រែង កាលពីថ្ងៃទី១៥ ខែឧសភា ឆ្នាំ២០២១។
បើតាមការជូនដំណឹងរបស់រដ្ឋបាលខេត្តស្ទឹងត្រែងថា យុវជនខាងលើឈ្មោះ ជាង ស៊ី អាយុ១៨ឆ្នាំ គ្រាមកដល់ខេត្តស្ទឹងត្រែង បានចុះនៅចំណតរថយន្តមាត់ទន្លេ ក្នុងក្រុងស្ទឹងត្រែង រួចក៏បន្តដំណើរទៅភូមិស្រឡៅ ឃុំអន្លុងជ្រៃ ស្រុកថាឡាបរិវ៉ាត់ ដើម្បីជួយធ្វើចំការឪពុកមាឈ្មោះ អ៊ុន សំអុល អាយុ៥៣ឆ្នាំ។
អ្នកពាក់ព័ន្ធមូកដ្ឋានផ្ទាល់ចំនួន៤នាក់ ត្រូវបានធ្វើតេស្តរហ័សជាលទ្ធផលអវិជ្ជមានទាំងអស់ តែត្រូវបានដាក់អោយសម្រាកនៅមណ្ឌលចត្តាឡីស័ក កម្រិតស្រាល ក្នុងភូមិស្រឡៅ ស្រុកថាឡាបរិ វ៉ាត់។ ចំណែកយុវជនកើតកូវីដខាងលើនេះ ត្រូវបានដាក់អោយសម្រាកព្យាបាលនៅក្នុងអគារព្យាបាលអ្នកជំងឺកូវីដ១៩ នៃមន្ទីរពេទ្យបង្អែកខេត្តស្ទឹងត្រែង រួមនឹងអ្នកជំងឺកំពុងព្យាបាល២នាក់ទៀត ដោយមានការយកចិត្តទុកដាក់។
គួរបញ្ជាក់ថា សម្រាប់ខេត្តស្ទឹងត្រែង គឺបានរកឃើញអ្នកជំងឺកូវីដចំនួន៣ករណី លើស្ត្រី២នាក់ និងយុវជនម្នាក់ ។ ដោយឡែកអ្នកកំពុងធ្វើចត្តាឡីស័ក សរុបគិតត្រឹមថ្ងៃទី១៧ ខែឧសភា ឆ្នាំ២០២១ សរុបចំនួន៩១នាក់ ក្នុងនោះស្រី៣៩នាក់ ៕
ចែករំលែកព័តមាននេះ