រាជធានីភ្នំពេញ ៖ មានការតាមដានខ្លាំងនៅលើបណ្តាញសង្គមហ្វេសប៊ុក និងនៅលើ Instagram ដែលបានឃើញនាយព្រែក កូនប្រុសបណ្តូលចិត្តយាយ យ៉យ និងកញ្ញា ឈិន…
រាជធានីភ្នំពេញ ៖ មានការតាមដានខ្លាំងនៅលើបណ្តាញសង្គមហ្វេសប៊ុក និងនៅលើ Instagram ដែលបានឃើញនាយព្រែក កូនប្រុសបណ្តូលចិត្តយាយ យ៉យ និងកញ្ញា ឈិន មុនីនាថ កូនស្រីលោក ឈិន កុសល រមែងភ្ជាប់ខ្លួននៅជិតគ្នាស្ទើរតែគ្រប់ពេល។ ហើយក៏មានការសួរដេញដោលថា មិត្តភាពរាប់អានគ្នាយូរៗទៅអាចក្លាយជាអ្វីលើសពីនេះបាន ព្រោះស្រីស្អាត ប្រុសសង្ហារនៅជិតគ្នាអាចនឹងផ្ទុះរឿងស្នេហាចិត្តនឹងចិត្តក៏ថាបាន។
មហាជនមានការភ្ញាក់ផ្អើលមិនតិចទេ ដែលលោកឈិន កុសល អតីតតារាចម្រៀងក្រអួន មានតំណក់ឈាមសិល្បៈដ៏ល្អ ព្រោះបានកូនស្រីដែលស្អាតពេញរូបរាងសម្រស់ទាក់ទាញ។ ពិសេសមានដុងសិល្បៈពេញចេះច្រើនជំនាញទាំងច្រៀង សម្តែងភាពយន្ត និងពិធីការិនី។ ឈិន មុនីនាថ ត្រូវបានផលិតករជាច្រើន អញ្ជើញនាងថតកុន ដោយសារត្រេមុខល្អ ហើយបានសុទ្ធតែតួសំខាន់ៗ។ មានន័យថាត្រកូលឈិន កំពុងតែដុះពន្លកមានអ្នកស្នងសិល្បៈទៅមុខទៀត។
ក្រោយពេលចូលអុកឡុកសិល្បៈ ស្រាប់តែឃើញ តារាក្មេងខ្ចីឈិន មុនីនាថ និងនាយព្រែក ដែលកំពុងឡើងកូដ ហើយរាងកាន់តែសង្ហានោះ បានស្និតស្នាលគ្នាច្រើនមួយរយៈនេះ។ មានការឆ្ងល់កាន់តែខ្លាំងឡើងៗថា កំលោះក្រមុំនៅជិតគ្នា ហើយជាមិត្តភាពទៀតនោះ នឹងដូចពាក្យចាស់បុរាណថា «ស្នេហ៍មិនឈ្នះស្និត»។ អ្នកទាំង២ រមែងចូលចិត្តនាំគ្នា Live video និយាយលេងពីនេះពីនោះ។ សើចដាក់គ្នា ច្រៀងផ្តោះផ្តងដូចគូស្នេហ៍ ហើយហ្វេនៗដែលឃើញការ Live ម្នាក់ៗថា សមគ្នាណាស់។
ម្យ៉ាង បើមើលលើនាយ ព្រែកវិញ តាំងពីបែកបាក់គូដណ្តឹងមកឃើញថា ជាកំលោះសម្បូរស្នេហ៍ និងមិនជាបញ្ហានោះទេ ដែលអាចរកគូថ្មីមកជំនួសស្នេហ៍ខកបំណងលើកទី១នោះ។ រង់ចាំមើល កម្រងរូបភាពរវាងអ្នកទាំង២ មានការវិវត្តន៍ ទៅជាបែបណា ឬគ្រាន់តែជាការសម្តែងក្នុងនាមជាមិត្ត។
ចែករំលែកព័តមាននេះ