បន្ទាយមានជ័យ៖ ប្រជាកសិករ ភ្ជួរស្រែក្បែរភូមិ បានប្រទះឃើញគ្រាប់ ៦០មីលីម៉ែត្រ ១គ្រាប់ មិនទាន់ផ្ទុះ ក៏ទាក់ទងអង្គភាពកំចាត់មីន យកទៅកម្ទេចចោល កាលពីថ្ងៃទី១៤ ខែឧសភា ឆ្នាំ២០២១។ កសិករភ្ជួរស្រែប៉ះគ្រាប់មិនទាន់ផ្ទុះនោះ នៅចំណុចវាលស្រែ ក្នុងភូមិតាអំ ឃុំប្រាសាទ ស្រុកព្រះនេត្រព្រះ។
លោកវរៈសេនីយ៍ឯក មាស រិទ្ធី អធិការនគរបាលស្រុកព្រះនេត្រព្រះ បានប្រាប់ថា ប្រជាកសិករ បានទៅភ្ជួរដី ធ្វើស្រែ ក្បែរភូមិ បានប្រទះឃើញគ្រាប់យុទ្ធភ័ណ មិនទាន់ផ្ទុះ ប្រភេទគ្រាប់ ៦០មីលីម៉ែត្រ ១គ្រាប់ បានរាយការណ៍ជូនកម្លាំងនគរបាលប៉ុស្តិ៍ឃុំប្រាសាទ ហើយបានរាយការណ៍បន្តទៅអង្គភាពហេឡូត្រាស់ កម្ចាត់មីន បានចុះមកយកទៅកម្ទេចចោល។
លោកបានបញ្ជាក់ថា គ្រាប់យុទ្ធភ័ណ មិនទាន់ផ្ទុះនេះ ជាគ្រាប់ ដែលសល់ពីសម័យសង្គ្រាម នៅពេលប្រជាកសិករ កាប់គាស់ព្រៃប្រទះឃើញ ហើយអង្គភាពកម្ចាត់មីន បានមកទទួលយកទៅកម្ទេចចោល ហើយបានណែនាំដល់ប្រជាពលរដ្ឋ បើប្រទះឃើញគ្រាប់យុទ្ធភ័ណ មិនទាន់ផ្ទុះ សុំកុំប៉ះពាល់ ហើយរាយការណ៍ជូនអង្គភាពកំចាត់មីន និងអាជ្ញាធរ នៅក្បែរ ដើម្បីការពារសុវត្ថិភាព៕ ប៊ុនធឿន
ចែករំលែកព័តមាននេះ