ខេត្តសៀមរាប ៖ រដ្ឋបាលខេត្តសៀមរាប បានប្តូរទីតាំងពិនិត្យសុខភាពបឋម និងចុះឈ្មោះអ្នកដំណើរចូលមកក្នុងភូមិសាស្ត្រខេត្តសៀមរាប ដែលមានទីតាំងថ្មីស្ថិតនៅបរិវេណវិទ្យាល័យកំពង់ក្តី ចាប់ពីម៉ោង២២ និង០០ យប់ថ្ងៃទី១៥ ខែឧសភា…
ខេត្តសៀមរាប ៖ រដ្ឋបាលខេត្តសៀមរាប បានប្តូរទីតាំងពិនិត្យសុខភាពបឋម និងចុះឈ្មោះអ្នកដំណើរចូលមកក្នុងភូមិសាស្ត្រខេត្តសៀមរាប ដែលមានទីតាំងថ្មីស្ថិតនៅបរិវេណវិទ្យាល័យកំពង់ក្តី ចាប់ពីម៉ោង២២ និង០០ យប់ថ្ងៃទី១៥ ខែឧសភា ឆ្នាំ២០២១។ រដ្ឋបាលខេត្តបានប្តូរទីតាំងពិនិត្យសុខភាពបឋម និងចុះឈ្មោះ ស្កែន QR Code Stop COVID-19 “ទប់ស្កាត់ជំងឺកូវីដ-១៩” ពីចំណុចឃុំល្វែងឫស្សី ស្រុកជីក្រែង ជិតព្រំប្រទល់ស្រុកស្ទោង ខេត្តកំពង់ធំ មកទីតាំងវិទ្យាល័យកំពង់ក្តី នៅភូមិពោធិ៍សិរី ឃុំកំពង់ក្តី ស្រុកជីក្រែង។
ការប្តូរទីតាំងនេះ គឺដើម្បីសម្រួលបញ្ចៀសការកកស្ទះ និងបង្ការទប់ស្កាត់ការឆ្លងជំងឺកូវីដ-១៩។ ការពិនិត្យសុខភាពបឋម និងការចុះឈ្មោះ ឬស្កែន QR Code គឺបានផ្តល់អត្ថប្រយោជន៍ និងធានាបាននូវប្រសិទ្ធភាពនៃការបង្ការ ទប់ស្កាត់ការឆ្លងរាលដាលជំងឺកូវីដ-១៩ តាមរយៈ៖ ១.ទទួលបានព័ត៌មានរបស់អ្នកដំណើរ, ២.ពិនិត្យសុខភាពបឋម ក្នុងករណីសង្ស័យឈានទៅយកសំណាក និងចត្តាឡីស័ក, ៣.ផ្តល់ព័ត៌មានច្បាស់លាស់ និងរហ័សដល់ក្រុមការងារស្រាវជ្រាវ និងស្វែងរកអ្នកពាក់ព័ន្ធផ្ទាល់ និងប្រយោល, ៤.កាត់ផ្តាច់ប្រភពចម្លងទៅសហគមន៍។
រដ្ឋបាលខេត្ត សូមការយោគយល់អ្នកដំណើរទាំងអស់ដែលធ្វើដំណើរឆ្លងកាត់ ឬឆ្លងចូលភូមិសាស្ត្រខេត្តសៀមរាប មេត្តាចូលរួមសហការជាមួយក្រុមការងារ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ-១៩ និងអនុវត្តនូវវិធានការរបស់ក្រសួងសុខាភិបាល និងអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី នៃព្រះរាជា ណាចក្រកម្ពុជាគឺ ៣ការពារ ៣កុំ៕ ដោយ ៖ ច័ន្ទ រស្មី
ចែករំលែកព័តមាននេះ