ខេត្តព្រះសីហនុ៖ មន្ត្រីជំនាញមន្ទីរបរិស្ថាន ខេត្តព្រះសីហនុ សហការជាមួយកម្លាំងរដ្ឋបាលក្រុងព្រះសីហនុ និងកម្លាំងមន្ទីរជំនាញកសិកម្ម រុក្ខាប្រមាញ់ និងនេសាទ ចុះរុះរើសំណង់មិនរៀបរយ ក្នុងតំបន់អភិរក្សប្រើប្រាស់ច្រើនយ៉ាង ប្រភពទឹកស្អាត…
ខេត្តព្រះសីហនុ៖ មន្ត្រីជំនាញមន្ទីរបរិស្ថាន ខេត្តព្រះសីហនុ សហការជាមួយកម្លាំងរដ្ឋបាលក្រុងព្រះសីហនុ និងកម្លាំងមន្ទីរជំនាញកសិកម្ម រុក្ខាប្រមាញ់ និងនេសាទ ចុះរុះរើសំណង់មិនរៀបរយ ក្នុងតំបន់អភិរក្សប្រើប្រាស់ច្រើនយ៉ាង ប្រភពទឹកស្អាត ជំរាលក្បាលឆាយ។
កំណត់ហេតុរបស់លោក ញ៉ឹម សុវណ្ណារិទ្ធ អនុប្រធានការិយាល័យឧទ្យានជាតិព្រះសីហនុរាម បានឲ្យដឹងថា កម្លាំងជំនាញមន្ត្រីរដ្ឋបាល និងអភិរក្សធម្មជាតិនៃមន្ទីរបរិស្ថាន ខេត្តព្រះសីហនុ ដោយមានកិច្ចសហការពីកម្លាំងរដ្ឋបាលក្រុងព្រះសីហនុ និងកម្លាំងមកពីមន្ទីរជំនាញកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី០៩ ខែ ឧសភា ឆ្នាំ២០២១ បានចុះអនុវត្តវិធានការរុះរើសំណង់មិនរៀបរយ នៅចំណុចភូមិតាអឺង ស្ថិតក្នុងក្រុម១៦ ភូមិ០២ សង្កាត់០១ ក្រុង/ខេត្តព្រះសីហនុ។
នៅក្នុងកំណត់ហេតុដដែល បានបញ្ជាក់ថា កម្លាំងជំនាញសហការ បានអនុវត្តវិធានការរុះរើសំណង់ខ្ទមតូចៗ ដែលលួចកាប់ទន្ទ្រានដើមឈើអាស្យាក្នុងតំបន់អិរក្សធម្មជាតិប្រើប្រាស់ច្រើនយ៉ាងនៃប្រភពទឹកស្អាត ដែលមានទីតាំងខាងលើ។
ក្នុងកិច្ចអនុវត្តវិធានការរុះរើកម្លាំងជំនាញសហការ បានធ្វើការរុះរើខ្ទមតូចៗ មិនរៀបរយ បានចំនួន ០៩ខ្ទម ក្នុងនោះ មានគ្រោងខ្ទមចំនួន ០២ និងបានឃាត់ខ្លួនស្ត្រីម្នាក់ ឈ្មោះ ណាង ទ្រី អាយុ ៣៩ឆ្នាំ មុខរបរលក់ដូរតាមរទេះ មានស្រុកកំណើត នៅឃុំសោម ស្រុកគីរីវង្ស ខេត្តតាកែវ។ បច្ចុប្បន្ន ស្នាក់នៅចំណុចភូមិតាអឺង ក្រុម១៦ ភូមិ០២ សង្កាត់០១ ក្រុង/ខេត្តព្រះសីហនុ ដែលជាមេខ្លោង នៅក្នុងហេតុការណ៍រារាំង និងជេរប្រមាថមកលើសមត្ថកិច្ច ក្នុងពេលកំពុងអនុវត្តវិធានការរុះរើសំណង់មិនរៀបរយ ក្នុងដែនព្រៃធម្មជាតិអភិរក្ស និងជាតំបន់ប្រើប្រាស់ច្រើនយ៉ាង ប្រភពទឹកស្អាតខុសច្បាប់។
ក្រោយសមត្ថកិច្ចឃាត់ខ្លួនស្ត្រីមេខ្លោងខាងលើ បានបញ្ជូនទៅសាលាដំបូង ខេត្តព្រះសីហនុ ដើម្បីចាត់ការទៅតាមនីតិវិធី៕ រស់ ភីណា
ចែករំលែកព័តមាននេះ