រាជធានីភ្នំពេញ៖កម្លាំងសមត្ថកិច្ចចម្រុះខណ្ឌពោធិ៍សែនជ័យ បានធ្វើការឃាត់រថយន្តឈ្នួលច្រើនគ្រឿង ព្រមទាំងឃាត់ខ្លួនមនុស្សជាង១០០នាក់ ក្នុងនោះមានអ្នកបើកបរ និងព្រូរថយន្តជាង៥០នាក់ និងអ្នកជិះក្នុងរថយន្តជិត៥០ផងដែរ ខណៈដែលរថយន្តឈ្នួលទាំងអស់នេះ ចូលទៅដឹកប្រជាពលរដ្ឋ និងកម្មករកម្មការិនីរោងចក្រចេញពី «តំបន់ក្រហម»…
រាជធានីភ្នំពេញ៖កម្លាំងសមត្ថកិច្ចចម្រុះខណ្ឌពោធិ៍សែនជ័យ បានធ្វើការឃាត់រថយន្តឈ្នួលច្រើនគ្រឿង ព្រមទាំងឃាត់ខ្លួនមនុស្សជាង១០០នាក់ ក្នុងនោះមានអ្នកបើកបរ និងព្រូរថយន្តជាង៥០នាក់ និងអ្នកជិះក្នុងរថយន្តជិត៥០ផងដែរ ខណៈដែលរថយន្តឈ្នួលទាំងអស់នេះ ចូលទៅដឹកប្រជាពលរដ្ឋ និងកម្មករកម្មការិនីរោងចក្រចេញពី «តំបន់ក្រហម» ក្នុងសង្កាត់ចោមចៅទី១ ដែលកំពុងមានការបិទខ្ទប់ដើម្បីទប់ស្កាត់ការឆ្លងរាលដាលជម្ងឺCOVID-19 ។
ប្រតិបត្តិការឃាត់រថយន្តឈ្នួលខាងលើនោះបានធ្វើឡើង កាលពីវេលាថ្ងៃត្រង់ ថ្ងៃទី៨ ខែឧសភា ឆ្នាំ២០២១ នៅតាមផ្លូវ ចោមចៅ ហៅផ្លូវវ៉េងស្រេង និងផ្លូវតូចៗស្ថិតនៅក្នុងតំបន់ក្រហម ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា ក្រុមរថយន្តឈ្នួលខាងលើបាននាំគ្នា សម្រុកចូលទៅដឹកប្រជាពលរដ្ន និងកម្មករ កម្មការិនីចេញពីតំបន់ក្រហមខាងលើ ដែលកំពុងត្រូវបានបិទខ្ទប់នៅឡើយ ក្នុងបំណងទៅកាន់ខេត្ត ក្រុងនានា ដោយពុំបានគិតពីឆ្លងរាលដាលកាន់តែខ្លាំងនូវជម្ងឺCOVID-19 ដល់មនុស្សនៅតាមនៅតាមបណ្ដាខេត្ត ក្រុងទាំងនោះឡើយ ។ ដើម្បីទប់ស្កាត់អំពីហានិភ័យខ្ពស់បំផុតនេះ ទើបកម្លាំងសមត្ថកិច្ចចម្រុះខាងលើបានធ្វើការឃាត់រថយន្តឈ្នួលទុកមួយកន្លែងតែម្ដង មិនឲ្យមានការដឹកចល័តមនុស្សស្រេចតែចិត្តចេញពីតំបន់ក្រហមបែបនេះឡើយ ។
ប្រភពដដែលបានបន្តទៀតថា នៅក្នុងប្រតិបត្តិការនេះកម្លាំងសមត្ថកិច្ចចម្រុះឃាត់បានរថយន្តឈ្នួលប្រភេទទេសចរណ៍១២កៅអី និង១៤កៅអី៤២គ្រឿង ម៉ូតូកង់បី១គ្រឿង រួមទាំងអ្នកបើកបរ និងព្រូ៥៥នាក់ព្រមទាំងអ្នកជិះក្នុងរថយន្តទាំងនោះចំនួន៤៩នាក់ទៀត ក្នុងនោះមានទាំងក្មេងប្រុសម្នាក់ផងដែរ ។ ក្រោយពេលឃាត់បានរថយន្តទាំងនោះត្រូវបាននាំយកទៅរក្សាទុកបណ្ដោះអាសន្ននៅជិតសាលាសង្កាត់ចោមចៅទី២ ខណ្ឌពោធិ៍សែនជ័យ ។
បន្ទាប់មកមនុស្សសរុប១០៤នាក់ ដែលរួមអ្នកបើកបរ និងព្រូរថយន្ត ព្រមទាំងអ្នកជិះក្នុងរថយន្តប្រុងធ្វើដំណើរចាកចេញពីតំបន់ក្រហមទៅកាន់ខេត្តនានានោះ ត្រូវបាននាំទៅធ្វើការសាកសួរ និងធ្វើចត្តាឡីស័កនៅមណ្ឌលចត្តាឡីស័កអនុវិទ្យាល័យគោកបញ្ជាន់ ភូមិចោមចៅ សង្កាត់ចោមចៅទី២ រយៈពេល១៤ថ្ងៃសិន៕
ចែករំលែកព័តមាននេះ