កំពត៖ កាលពីព្រឹកថ្ងៃទី៦ ខែឧសភា ឆ្នំ២០២១នេះ អាជ្ញាធរស្រុកកំពង់ត្រាច សហការជាមួយនឹងក្រុមគ្រូពេទ្យ បានប្រកូសប្រកាសឲ្យប្រជាពលរដ្ឋ ក្នុងឃុំកំពង់ត្រាចខាងលិច មកធ្វើតេស្ត យកសំណាក…
កំពត៖ កាលពីព្រឹកថ្ងៃទី៦ ខែឧសភា ឆ្នំ២០២១នេះ អាជ្ញាធរស្រុកកំពង់ត្រាច សហការជាមួយនឹងក្រុមគ្រូពេទ្យ បានប្រកូសប្រកាសឲ្យប្រជាពលរដ្ឋ ក្នុងឃុំកំពង់ត្រាចខាងលិច មកធ្វើតេស្ត យកសំណាក រកមេរោគកូវីដ១៩។ ក្នុងនោះ មានប្រជាពលរដ្ឋជាង ៥០នាក់ ព្រះសង្យ ចំនួន ៥អង្គ មកពីវត្តត្រពាំងជ្រៃ និងវត្តកោះផ្ដៅ និងតាអាចារ្យ ២នាក់ រួមទាំងអ្នកបូជាសព។ នេះជាការធ្វើតេស្ត លើកទី៣ ហើយ ក្រោយពីការធ្វើតេស្ត ២លើកកន្លងមក រកឃើញអ្នកឆ្លងកូវីដ ៣នាក់ហើយ។
ការប្រកាសអោយមកធ្វើតេស្តនេះ បន្ទាប់ពីក្រុមគ្រូពេទ្យ បានពិនិត្យរកឃើញវិជ្ជមានកូវីដ១៩ លើស្ត្រីម្នាក់ ឈ្មោះ ឯម បុប្ផា ដែលបានរៀបចំធ្វើបុណ្យសព អោយប្ដី ដែលបានស្លាប់ នៅមន្ទីរពេទ្យខេត្តកំពត កាលពីថ្ងៃទី២៥ ខែមេសា ឆ្នាំ២០២១។ ពិធីបុណ្យសពនោះ បានធ្វើឡើងតាមប្រពៃណី នៅផ្ទះក្នុងស្រុកកំណើត នៅភូមិដើមចារ ឃុំកំពង់ត្រាចខាងលិច ស្រុកកំពង់ត្រាច។
លោក ង៉ែត សុផល អភិបាលរងស្រុកកំពង់ត្រាច បានចុះជាប់ជាមួយអាជ្ញាធរមូលដ្ឋានឃុំ ធ្វើការងារទប់ស្កាត់ការឆ្លងកូវីដ១៩នេះ បានអោយដឹងនៅព្រឹកថ្ងៃទី៦ ខែឧសភានេះថា បុរសម្នាក់ នៅភូមិដើមចារ មានជងឺឈឺធ្ងន់ ហើយប្រពន្ធបុរសមានជំងឺនោះ ឈ្មោះ ឯម បុប្ផា អាយុ ៣៥ឆ្នាំ។ បុរសដែលមានជំងឺនោះ ត្រូវបានគេដឹកទៅព្យាបាលនៅមន្ទីរពេទ្យព្រះសង្ឃ នៅរាជធានីភ្នំពេញ ហើយប្រពន្ធ បានតាមមកមើលថែជំងឺប្តីនៅមន្ទីរពេទ្យ។ តែនៅថ្ងៃទី១៧ ខែមេសា ឆ្នាំ២០២១ ពេទ្យបានដឹកបុរសមានជំងឺនោះ មកដល់ផ្ទះវិញ ហើយនៅថ្ងៃទី២០ ខែមេសា ឆ្នាំ២០២១ បុរសអ្នកជំងឺរូបនោះ ត្រូវបានដឹកទៅព្យាបាល នៅមន្ទីរពេទ្យបង្អែកខេត្តកំពត។ លុះដល់ថ្ងៃទី២៥ ខែមេសា ឆ្នាំ២០២១ បុរសដែលមានជំងឺឈឺធ្ងន់ ត្រូវបានស្លាប់ ហើយក្រុមសាច់ញាតិ បានដឹកត្រឡប់មកផ្ទះ នៅភូមិដើមចារ ធ្វើបុណ្យទាន។ ពេលចប់បុណ្យសពប្ដី ស្ត្រីជាប្រពន្ធ ឈ្មោះ ឯម បុប្ផា ចាប់មានជំងឺឈឺបំពងក ក្អក និងក្ដៅខ្លួន ថប់ដង្ហើម។ ដោយមានអាការៈបែបនេះហើយ ត្រូវបានក្រុមគ្រូពេទ្យ យកសំណាកទៅតេស្ត ចេញលទ្ធផលបង្ហាញថា ស្ត្រី ឯម បុប្ផា មានវិជ្ជមានកូវីដ១៩។
លោក ង៉ែត សុផល បន្តថា ការធ្វើតេស្តអ្នកចូលរួមបុណ្យសព លើកទី១ និងលើកទី២ មានវិជ្ជមានកូវីដ១៩ ពលរដ្ឋ ៣នាក់។
លោកអភិបាលរង បន្ថែមថា ការធ្វើតេស្ត លើកទី៣ នៅព្រឹកថ្ងៃទី៦ ខែឧសភា នៅសាលាឃុំកំពង់ត្រាចនេះ មានពលរដ្ឋចូលរួម ជាអ្នកប៉ះពាល់ដោយប្រយោល និងអ្នកប៉ះពាល់ផ្ទាល់ ក្នុងនោះ មានព្រះសង្យ និងតាអាចារ្យវត្ត ចំនួន ២វត្ត រួមទាំងអ្នកបូជាសពផង បានមកធ្វើតេស្តទាំងអស់គ្នា នៅសាលាឃុំកំពង់ត្រាច។ ទោះជាបែបណា លោកគ្រូពេទ្យ មិនទាន់បង្ហាញលទ្ធផលនៃការធ្វើតេស្តរកកូវីដ ១៩នេះនៅឡើយទេ៕ កែវ ឆាត
ចែករំលែកព័តមាននេះ