រាជធានីភ្នំពេញ ៖ លោកវរសេនីយ៍ឯក ម៉េង វិមានតារា អធិការនគរបាលខណ្ឌមានជ័យ កាលពីព្រឹកថ្ងៃទី៤ ខែឧសភា ឆ្នាំ២០២១ បានថ្លែងឱ្យដឹងថា…
រាជធានីភ្នំពេញ ៖ លោកវរសេនីយ៍ឯក ម៉េង វិមានតារា អធិការនគរបាលខណ្ឌមានជ័យ កាលពីព្រឹកថ្ងៃទី៤ ខែឧសភា ឆ្នាំ២០២១ បានថ្លែងឱ្យដឹងថា លោកអនុសេនីយ៍ត្រី សុន ពន្លឺ ដែលថ្មីៗនេះបានរងគ្រោះដោយសារតែម៉ូតូបុកបណ្តាលឱ្យរបួសជើងស្តាំធ្ងន់ធ្ងរនោះ នៅមិនទាន់មានភាពប្រសើរនៅឡើយទេ និងកំពុងសម្រាកព្យាបាលជំងឺបន្តទៀត។
លោក អធិការនគរបាលខណ្ឌមានជ័យ បានថ្លែងបញ្ជាក់អំពីស្ថានភាពរបួសរបស់មន្ត្រីនគរបាលរូបនេះ នាឱកាសលោកនាំយកថវិកាចំនួន១លានរៀលរបស់ថ្នាក់លើទៅប្រគល់ជូនលោកអនុសេនីយ៍ត្រី សុន ពន្លឺ មន្ត្រីនគរបាលនៃអធិការដ្ឋាននគរបាលខណ្ឌមានជ័យ ដែលកាលល្ងាចថ្ងៃទី២ ខែឧសភា កន្លងទៅបានជួបនូវឧបទ្ទវហេតុរងគ្រោះថ្នាក់ដោយសារម៉ូតូជិះបុកក្នុងពេលកំពុងបំពេញការងារ ។
ក្នុងនោះផងដែរ លោកអធិការខណ្ឌបានស្នើដល់បងប្អូនប្រជាពលរដ្ឋដែលត្រូវធ្វើដំណើរឆ្លងកាត់តំបន់បិទខ្ទប់បន្ទាន់ ត្រូវមានការលិខិតបញ្ជាក់ជាប់ខ្លួន ហើយត្រូវជៀសវាងនៃការប្រជ្រៀតគ្នាឆ្លងកាត់តំបន់ប្រឈម ដែលនាំឲ្យមានហានិភ័យនៃការឆ្លងកាន់តែខ្ពស់ ។
គួររំលឹកផងដែរថា លោកអនុសេនីយ៍ត្រី សុន ពន្លឺ ដោយសារតែការឈរការពារគោលដៅបិទខ្ទប់ក្រោមកម្តៅថ្ងៃអស់រយៈពេលជាយូរថ្ងៃមកហើយនោះ ធ្វើឲ្យមុខរបស់លោកបានប្រែជាខ្លោចខ្មៅដោយសារតែកម្តៅថ្ងៃ ។ លុះបានមកបំពេញការងារនៅពេលល្ងាច ដែលជាពេលព្រលប់គ្មានកម្តៅថ្ងៃ បែរជាជួបគ្រោះថ្នាក់ដោយសារម៉ូតូជិះបុកបណ្តាលឲ្យរងរបួសជើងស្តាំធ្ងន់ធ្ងរ ខណៈពេលបំពេញការងារទៅវិញ ៕
ចែករំលែកព័តមាននេះ