ខេត្តបាត់ដំបង ៖ ពលករខ្មែរដែលទើបវិលត្រឡប់មកពីប្រទេសថៃចំនួន០៥នាក់ក្នុងចំណោមពលរកសរុបចំនួន៣០នាក់ ត្រូវបានគ្រូពេទ្យធ្វើតេស្ដរកឃើញមាន«វិជ្ជមានកូវីដ១៩»។ នេះបើតាមសេចក្ដីប្រកាសព័ត៏មានរបស់រដ្ឋបាលខេត្តបាត់ដំបង ដែលបានជូន ដំណឹងជាសាធារណៈនព្រឹកថ្ងៃទី០៤ ឧសភា បន្ទាប់ពីមន្ទីរសុខាភិបាលខេត្តប្រកាសរកឃើញមុនមួយថ្ងៃនូវជំងឺឆ្លងដ៏សាហាវ
នេះ។
បើយោងសេចក្ដីប្រកាសព័ត៌មានរបស់រដ្ឋបាលខេត្តដដែល ពលករខ្មែរទាំង០៥នាក់ដែលនាំចូលមេរោគ«កូវីដ១៩»ពីប្រទេសថៃ ចូលមកកាន់ស្រុកខ្មែរនេះ ពួកគេរស់នៅភូមិសម្ដេច ឃុំតាប៉ុន ស្រុកសង្កែ។ ពួកគេមានឈ្មោះ ដុង សត់ ភេទប្រុស អាយុ៤០ឆ្នាំ ។ឈ្មោះ យក់ ស៊ីថា ភេទស្រី អាយុ៣២ឆ្នាំ ។ ឈ្មោះនួន សុខេង ភេទប្រុស អាយុ៣២ឆ្នាំ ។ ឈ្មោះ លាំ គឹមលាង ភេទស្រី អាយុ២០ឆ្នាំ និងឈ្មោះ ពឿន ចិន្តា ភេទស្រី អាយុ២៩ឆ្នាំ ។ ពួកគេជាបុគ្គលិកបំរើការនៅក្នុងក្រុមហ៊ុន វិចខ្ចប់សម្ភារៈមួយកន្លែង នៅទីក្រុងបាងកក ប្រទេសថៃ។
របាយការណ៍រដ្ឋបាលមន្ទីរសុខាភិបាលខេត្ត ដែលបានបង្ហាញកាលពីថ្ងៃទី០៣ ឧសភា អំពីប្រវត្តិនៃការឆ្លងជំងឺដ៏សាហាវដល់ពលករខ្មែរទាំង០៥នាក់នេះយ៉ាងដូច្នេះថា «ដំបូងមានតែពលករម្នាក់ឈ្មោះ ដុង សត់ ត្រូវបានធ្វើតេស្ដនៅមណ្ឌលចត្តាឡីស័ករកឃើញវិជ្ជមាន ហើយក៏បានរកឃើញទៅលើពលករប៉ុន្មាននាក់ថែមទៀតជាបន្តបន្ទាប់ ក្រោយយកសំណាកតេស្ដ»។
នៅក្នុងរបាយការណ៍ដដែល ឈ្មោះ ដុង សត់ បាននិយាយប្រាប់គ្រូពេទ្យថា « កាលនៅប្រទេសថៃ ខ្ញុំធ្លាប់បានប៉ះពាល់ដោយផ្ទាល់ជាមួយ អ្នកកើតជំងឺកូវីដ១៩ »។ នេះជាមូលហេតុ ដែលនាំឲ្យ មេរោគ កូវីដ១៩ ឆ្លងរាលដាលដល់ពលករប៉ុន្មាននាក់ទៀត ដែលធ្វើដំណើររួមគ្នា។
រដ្ឋបាលខេត្តបាត់ដំបង ក៏បានបង្ហាញពីប្រវត្តិ នៃការធ្វើដំណើររបស់ក្រុមពលករខ្មែរទាំងនេះ ពីប្រទេសថៃ ត្រឡប់ចូលស្រុកកំណើតវិញផងដែរ។ បើតាមសេចក្ដីប្រកាសព័ត៏មាន ក្រុមពលករខ្មែរខាងលើសរុបចំនួន១៤នាក់ បានធ្វើដំណើររួមគ្នា ចេញពីទីក្រុងបាងកក ប្រទេសថៃ មកកាន់ព្រំដែន ត្រង់ចំណុច «ច្រកអូរបីជាន់» ខេត្តបន្ទាយមានជ័យ កាលពីថ្ងៃទី០១ ឧសភា។ លុះនៅព្រឹកថ្ងៃទី០២ ឧសភា ក្រុមពលករខ្មែរទាំង១៤នាក់នេះ បានធ្វើដំណើរបន្តតាមរយះរថយន្តយោធាមួយគ្រឿង ឆ្ពោះមកកាន់ស្រុកកំណើត នៅខេត្តបាត់ដំបង ដោយមានអ្នករួមដំណើរបន្ថែមចំនួន១៦នាក់ផ្សេងទៀត។
សេចក្ដីរាយការណ៍បានបញ្ជាក់ថា ពេលមកដល់បាត់ដំបង រថយន្តដឹកពលករបានឈប់នៅរង្វង់មូល «នាងរំសាយសក់» ដើម្បីដាក់មនុស្សចុះចំនួន២៣នាក់ ដាក់ឲ្យចត្តាឡីស័ក នៅមណ្ឌលសាលាបាឡាត់ រីឯចំនួន០៧នាក់ទៀត បញ្ជូនទៅកាន់មណ្ឌលចត្តាឡីស័ក សាលាបឋមសិក្សាអូរដំបង១ និងអនុវិទ្យាល័យអូរដំបង១ នៅស្រុកសង្កែ។ នៅថ្ងៃទី០៣ ឧសភា ក្រោយពីយកសំណាកធ្វើតេស្ដ ទើបគ្រូពេទ្យរកឃើញពលរកចំនួន០៥នាក់ ក្នុងចំណោមពលករធ្វើដំណើររួមគ្នាទាំង៣០នាក់ មាន«វិជ្ជមាន កូវីដ១៩»។
បើតាមរដ្ឋបាលខេត្ត ពេលនេះអ្នកជំងឺកំពុងព្យាបាលនៅមន្ទីរពេទ្យបង្អែកខេត្ត ហើយក្រុមគ្រូពេទ្យកំពុងស្វែងរកអ្នកដែលប៉ះពាល់ អ្នកជំងឺនៅតាមមណ្ឌលចត្តាឡីស័ក មួយចំនួនទៀតដែលបានពាក់ព័ន្ធជាមួយបុគ្គលខាងលើ។
សូមបញ្ជាក់ថា ចាប់តាំងពីមានការផ្ទុះនូវជំងឺ«កូវីដ១៩»ដំបូងរហូតមកដល់ពេលនេះ ខេត្តបាត់ដំបងមានអ្នកឆ្លងជំងឺ «កូវីដ ១៩» ចំនួន៣៥នាក់ និង ជាសះស្បើយមានចំនួន២៨នាក់ និង កំពុងសម្រាកព្យបាលចំនួន០៧នាក់។ នេះបើយោងលើ សេចក្ដីប្រកាសព័ត៏មាន របស់រដ្ឋបាលខេត្ត នៅព្រឹកថ្ងៃទី០៤ ឧសភា ឆ្នាំ២០២១៕ ឆោម ពិសម័យ ED-160
ចែករំលែកព័តមាននេះ