ខេត្តស្វាយរៀង ៖ ជនជាតិចិនចំនួន០៦នាក់ ត្រូវម្ចាស់រថយន្តតាក់ស៊ីបានដឹកមកទម្លាក់ចោលនៅចំណុចខាងកើតវិទ្យាល័យ ហ៊ុនសែន ប្រសូតិ នៅវេលាម៉ោង៨និង៤០នាទីយប់ថ្ងៃទី៣ ឧសភា ២០២១ ស្ថិតក្នុងភូមិប្រសូតិ២ ឃុំកណ្តៀងរាយ ស្រុកស្វាយទាប ក៏ព្រោះអ្នករត់តាក់ស៊ីបានឃើញកម្លាំងសមត្ថកិច្ចនគបាលស្រុកស្វាយទាប ដាក់ប៉ុស្តិ៍ត្រួតពិនិត្យតាមដងផ្លូវជាតិលេខ១ ។
ជនជាតិចិនទាំង០៦នាក់ត្រូវបានតាក់ស៊ីឲ្យចុះដើរវាងប៉ុស្តិ៍សមត្ថកិច្ច និងវាងភូមិទៅតាមវាលស្រែក្រោយផ្ទះអ្នកស្រុក ខណៈនោះត្រូវប្រជាពលរដ្ឋបានឃើញ ក៏ប្តឹងសមត្ថកិច្ចថាមានជនជាតិចិន៦នាក់ដើរមកពីផ្លូវជាតិលេខ១ តាមវាលស្រែ ឆ្ពោះទៅស្រុកកំពង់រោទិ៍ ។
ពេលនោះ សមត្ថកិច្ចក៏បានតាមប្រមាញ់ស្ទាក់នៅផ្លូវជាតិលេខ៣១៤D ស្ថិតក្នុងភូមិប្រសូតិ០១ ឃុំកណ្លៀងរាយ ស្រុកស្វាយទាបក៏ត្រូវសមត្ថកិច្ចនគបាលនៃអធិការដ្ឋាននគបាលស្រុកស្វាយទាបបង្ក្រាបបានតែម្តង ។
ប្រភពបានឲ្យដឹងទៀតថា ម្ចាស់រថយន្តតាក់ស៊ី ប្រហែលជាដឹកជនជាតិចិន០៦នាក់ខាងលើមកពីក្រុងបាវិត តាមផ្លូវជាតិលេខ១ បម្រុងឆ្ពោះទៅរាជធានីភ្នំពេញ ។ លុះមកដល់ចំណុចកើតហេតុខាងលើ ក៏ឃើញសមត្ថកិច្ចដាក់កម្លាំងត្រួតពិនិត្យយានយន្ត តាមដងផ្លូវ ទើបទម្លាក់ជនជាតិចិនឲ្យដើរវាង ហើយរថយន្តបើកទៅចាំនៅខាងមុខ ក៏ប៉ុន្តែទំនងជនជាតិចិន មិនស្គាល់ភូមិសាស្ត្រច្បាស់ទើបមិនហ៊ានដើរវាងឆ្ងាយពីផ្ទះអ្នកស្រុក ក៏ត្រូវអ្នកស្រុកបានឃើញប្តឹងសមត្ថកិច្ចតែម្តង។
ប្រភពបានឲ្យដឹងទៀតថា ក្រោយពីសមត្ថកិច្ចឃាត់ខ្លួនមកសាកសួរ រួចក៏ហៅរថយន្តសាមុយមន្ទីរពេទ្យបង្អែកស្រុកស្វាយទាបដឹកជនជាតិចិនទាំង០៦នាក់ទៅ មណ្ឌល់ធ្វើចត្តាឡីសក័ស្រុកស្វាយទាប និងយកសំណាកពិនិត្យភ្លាមៗ ធ្វើតេស្តរហ័ស លទ្ធផល អវិជ្ជមានទាំង០៦នាក់ ក៏ប៉ុន្តែសមត្ថកិច្ចត្រូវដាក់ជនជាតិចិនខាងលើឲ្យធ្វើចត្តាឡីសក័១៤ថ្ងៃ នៅមណ្ឌលចត្តាឡីសក័ស្រុកស្វាយទាប ហើយនិងបន្តធ្វើការស្រាវជ្រាវរកម្ចាស់រថយន្តតាក់ស៊ីខាងលើនោះ ឱ្យមកទទួលខុសត្រូវចំពោះមុខច្បាប់ ។ ដោយ៖ វ៉ាន់ប៊ុនធឿន
ចែករំលែកព័តមាននេះ