សារព័ត៌មានបរទេសផ្សាយថា កាលពីពេល ថ្មីៗកន្លងមកអ្នកវិទ្យាសាស្ដ្រ បានឃើញសំណាកផូស៊ីលប្រជៀវ អាយុ៤៩លានឆ្នាំ ស្ថិតក្នុងសភាពល្អ មានបំណែករាងកាយគ្រប់គ្រាន់ ។ ផូស៊ីលប្រជៀវបុរាណនោះស្ថិតក្នុងលក្ខណៈសរីរាងល្អទាំងឆ្អឹង ធ្មេញ និងក្រញាំជើង ព្រមទាំងមានសំណល់អាហារនៅក្នុងពោះវៀនទៀតផង ។
អ្នកវិទ្យាសាស្ត្របានត្រូតពិនិត្យយ៉ាងលំអិតឃើញគ្រោងផូស៊ីលបង្កើតម៉ូលេគុល បង្ហាញឱ្យឃើញពីពណ៌របស់រោម ចាត់ទុកថាជាពណ៌រោមរបស់សត្វចឹញ្ចឹមកូនដោយទឹកដោះ ដែលផុតពូជអស់រយៈពេលយូរលុងមកហើយ ។
អ្នកវិទ្យាសាស្ដ្រសន្និដ្ឋានថា អាចជាប្រចៀវចំនួន២ពូជ ចាស់បំផុតដែលធ្លាប់បានស្គាល់ គឺ Palaeochiropteryx និង Hassianycteris ដោយមានរោមពណ៌ត្នោត ។ ចំណែកលោកជេខុប វីនធ័រ អ្នកជីវវិទ្យានៅមហាវិទ្យាល័យប្រ៊ីស្ដុល ចក្រភពអង់គ្លេស និយាយថា ប្រជៀវពួជនេះមានពណ៌ត្នោត ប៉ុន្ដែចម្លែកត្រង់ថា «វាមានអាយុ៤៩លានឆ្នាំ ដែលមានលក្ខណៈស្រដៀងប្រជៀវបច្ចុប្បន្ន» ។
ស្របពេលជាមួយគ្នានេះ លោកខេតលីន កូលៀរី អ្នកជីវវិទ្យាពីស្ថាប័ន «ប៉ូលីតិចនិកវើជីនៀ» និយាយថា «ក្រុមអ្នកជីវវិទ្យាបានយល់ពីដំណើរជីវិតរបស់សត្វ ព្រោះពណ៌អាចបញ្ជាក់ឱ្យដឹងពីបរិស្ថានដែលពូកវារស់នៅ ជាវិធីសាស្ដ្រនៃការការពារខ្លួន និងការទាក់ទាញចំណាប់អារម្មណ៍» ។
តាមការត្រួតពិនិត្យរបស់អ្នកវិទ្យាសាស្ដ្របញ្ជាក់ថា គ្រោងផូស៊ីលដែលមានលក្ខណៈពេញលេញនេះអាចកំណត់បានថា ជាគ្រោងផូស៊ីលដែលសំបូរដោយកំទេច «មេឡា ណូសូម» មិនមែនបាក់តេរី ៕
ចែករំលែកព័តមាននេះ