ខេត្តស្វាយរៀង ៖ ម្តងនេះ កាន់តែច្រើនហើយ មេខ្យល់នាំជនជាតិវៀតណាម និងជនជាតិចិនស្រីប្រុស ប្រមាណ១៣០នាក់ ចេញពីប្រទេសវៀតណាមឆ្លងដែនចូលមកកម្ពុជា ដោយខុសច្បាប់ សមត្ថកិច្ចបង្ហើបថា…
ខេត្តស្វាយរៀង ៖ ម្តងនេះ កាន់តែច្រើនហើយ មេខ្យល់នាំជនជាតិវៀតណាម និងជនជាតិចិនស្រីប្រុស ប្រមាណ១៣០នាក់ ចេញពីប្រទេសវៀតណាមឆ្លងដែនចូលមកកម្ពុជា ដោយខុសច្បាប់ សមត្ថកិច្ចបង្ហើបថា សង្ស័យចូលតាមស្លាបច្រកទ្វាព្រំដែន អន្តរជាតិបាវិត (ក្នុងនោះ គឺមានមេខ្យល់ជាជនជាតិចិន១១នាក់) ហើយសមត្ថកិច្ចកំពុងដាក់ការសង្ស័យថា មានមេខ្យល់ជាជនជាតិខ្មែរនៅពីក្រោយករណីខាងលើនេះ ។
បើតាមប្រភពពីសមត្ថកិច្ចបានឲ្យដឹងថា មេខ្យល់ជាជនជាតិចិនចំនួន១១នាក់ បានលួចនាំជនជាតិវៀតណាម និងជនជាតិចិន១១២នាក់ ចេញពីប្រទេសវៀតណាម ឆ្លងដែនដោយខុសច្បាប់ចូលមកក្រុងបាវិត ដោយឲ្យស្នាក់នៅក្នុងសណ្ឋាគារដែលមានយីហោ «ផ្ទះល្វែងសណ្ឋាគារបួនរដូវ» ដែលគេស្គាល់ថា ម្ចាស់សណ្ឋាគារ គឺជនជាតិចិន ស្ថិតនៅភូមិបាវិតកណ្តាលសង្កាត់បាវិត ក្រុងបាវិតខេត្តស្វាយរៀង ។
ប្រភពដដែលបន្តទៀតថា ករណីខាងលើនេះកើតឡើងចាប់បាននៅវេលាម៉ោង២និង០០នាទីទៀបភ្លឺថ្ងៃទី២៧មេសា២០២១នៅក្រុងបាវិត ខណៈសមត្ថកិច្ចកងរាជអាវុធហត្ថខេត្តស្វាយរៀង និងកងរាជអាវុធហត្ថក្រុងបាវិតបានដើរល្បាតក៏ប្រទះឃើញ ជនជាតិវៀតណាម និងជនជាតិចិនស្រី ប្រុស ប្រមាណជាង១០០នាក់ បានកំពុងចុះពីលើម៉ូតូ ដើរចូលក្នុងសណ្ឋាគារ «ផ្ទះសំណាក់សណ្ឋាគារបួនរដូវ» មានការសង្ស័យក៏ឃាត់សាកសួរ រហូតចាប់ឃាត់ខ្លួនជនសង្ស័យ១១នាក់ ជាជនជាតិចិន មកធ្វើការសាកសួរ និងឆែកឆេ សណ្ឋាគារខាងលើរកឃើញ ជនជាតិវៀតណាម និងជនជាតិចិនស្រី ប្រុស១១២នាក់ផ្សេងទៀត ដែលពួកគេទើបតែចេញពីរប្រទេសវៀតណាមឆ្លងដែនដោយខុសច្បាប់ចូលមកក្រុងបាវិតខេត្តស្វាយរៀង។
ហើយនៅថ្ងៃទី២៧ មេសា ២០២១ សមត្ថកិច្ចបានហៅជនជាតិវៀតណាម និងជនជាតិចិន១១២នាក់ យកសំណាកពេញមួយថ្ងៃ រហូតដល់យប់ជ្រៅ ឈានចូលថ្ងៃទី២៨ មេសានេះ នៅកំពុងបន្តការងារយកសំណាក និងដាក់ជនជាតិវៀតណាម និងជនជាតិចិនទាំងអស់ ខាងលើឲ្យនៅធ្វើចត្តាឡីសក័ ១៤ថ្ងៃ នៅក្នុងសណ្ឋាគារ«ផ្ទះសំណាក់សណ្ឋាគារបួនរដូវ»តែម្តង ។
រីឯប្រភពពីមន្ត្រីម្នាក់ឲ្យដឹងថា តាមពិតជនជាតិវៀតណាម និងជនជាតិចិនខាងលើនេះ គឺជាបុគ្គលិកកាស៊ីណូមួយ នៅក្នុងក្រុងបាវិតនេះ ដោយមួយចំនួនមានសៀវភៅការងារ មិនទាន់ហួសសុពលភាព គឺមានន័យថា ជនជាតិវៀតណាមខាងលើធ្វើការនៅកាស៊ីណូ ពេលរាជរដ្ឋាភិបាលបិទកាស៊ីណូ ជនជាតិវៀតណាមទាំងនោះបានត្រឡប់ទៅប្រទេសវៀតណាមវិញ ខណៈរាជរដ្ឋាភិបាលប្រកាសបើកតំបន់ទេសចរណ៍ឲ្យដំណើការវិញទូទាំងប្រទេស វៀតណាម និងចិនខាងលើក៏បានលួចឆ្លងដែនពីប្រទេសវៀតណាមចូលមកក្រុងបាវិតវិញ ដើម្បីចូលធ្វើការនៅក្នុងកាស៊ីណូវិញ ក៏ប៉ុន្តែខណៈពេលដែលចូលមកស្នាក់នៅក្នុងសណ្ឋាគារ ផ្ទះល្វែងសណ្ឌាគារបួនរដូវ ក៏ត្រូវកងរាជអាវុធហត្ថ ឃាត់សួរនាំ ហើយម្ចាស់សណ្ឋាគារ ជាជនជាតិចិន១១នាក់ បានចេញមករារាំងទើបមានការចាប់ខ្លួនបញ្ជូនទៅទីបញ្ជាការដ្ឋានកងរាជអាវុធហត្ថខេត្តស្វាយរៀង ដើម្បីសួរនាំតាមនីតិវិធី និងយកសំណាករួច នៅថ្ងៃទី២៨ មេសា ២០២១នេះ បានបញ្ជូនខ្លួនទៅធ្វើចត្តាឡីសក័នៅផ្ទះសំណាក់គ្រូបង្រៀនរយៈ១៤ថ្ងៃ ដើម្បីតាមដានទប់ស្កាត់ការឆ្លងជម្ងឺកូវីដ១៩ ទៅសហគមន៍ ក៏ប៉ុន្តែការចោទប្រកាន់ ឬយ៉ាងណានោះមិនអាចសុំការបំភ្លឺពីសមត្ថកិច្ចបានទេនៅរសៀលនេះ ដោយសមត្ថកិច្ចឆ្លើយតបអ្នកសារព័ត៌មានថា សមត្ថកិច្ចកំពុងបន្តនីតិវិធី មិនអាចផ្តល់ព័ត៌មានបានទេ ៕
ចែករំលែកព័តមាននេះ